Evangelium e Matejestar 17 - Romski prevod Novog zaveta - Srbija

Averćhandipe

¹ Thaj pale šov dive lija o Isus e Petre thaj e Jakove thaj e Jovano, phrale leskere, thaj inkalda len pe uči plajin korkore.

² Thaj averćhandilo ulo anglal lende, thaj strefisajlo o muj lesko sar o kham, a e fustanja leske ćerdile parrne sar rošlipe.

³ Thaj dikh, mothodilo lenge o Mojsije thaj o Ilija save lesa vakerde.

⁴ A o Petar irisarindoj phenđa e Isuseske: Devljutneja, lačhe si amenge akate te ova; te manglan te ćeras akate trin khasora: tuke jekh, thaj e Mojsijaske jekh, thaj jekh e Ilijaske.

⁵ Đikaj ov pana vakerela, e nuvera strefimi ućharda len, thaj dikh, krlo andar e nuvera savo vakerel: Akava si o Čhavo mlo čumidino, savo si pe mlo kamipe; les šunen.

⁶ Thaj ašundoj e sikljovne pele mujea natele thaj but darajlje.

⁷ Thaj alo paše o Isus astarda len thaj phenđa: Ušten thaj ma daran.

⁸ A on, vazdindoj pe jakha, khanika ni dikhle sem e Isuse korkore.

⁹ Thaj kana huljona e plajinatar, čhinada lenge o Isus vakerindoj: Khanikaske ma mothoven so dikhlen đikaj o Čhavo e Manušesko andar e mule ni đlvdinisavol.

¹⁰ Thaj phučle les e sikljovne leskere vakerindoj: Sose, akana, e lilvarne phenen kaj o Ilija majanglal trubul te avel?

¹¹ A o Isus irisarindoj phenđa lenge: O Ilija čače ka avel majanglal thaj sa ka laćharen.

¹² Numaj phenav tumenge kaj o Ilija akana avilo, thaj ni penđarde les, aj čerde lesa so mangle; ađaar vi o Čhavo e Manušesko ka mudardol lendar.

¹³ Atoska haljarde e sikljovne kaj lenge phenđa baš o Jovan Bolipesarutno.

Sastaripe e čhonutaresoro

¹⁴ Thaj kana avile e selorese, alo đi o leske o manuš thaj pelo pe čanga anglal oleste vakerindoj:

¹⁵ Devljutneja, maznosar e čhave mle, kaj si čhonutari thaj mučil pes xoljarne; kaj but droma perel ani jag, thaj but droma ano pani.

¹⁶ Thaj andem les tire sikljovnenge thaj naštisarde te sastaren les.

¹⁷ A o Isus irisarindoj phenđa: O bijanipe bipaćamno thaj rumime! Đikote ka ovav tumenca? Đikote tumen ka nakhavav? Anen le akari mange.

¹⁸ Thaj daravda les o Isus; thaj o beng inklilo andar leste; thaj sastilo o ternoro katar godova časo.

¹⁹ Atoska ale paše e sikljovne e Isuseske thaj korkore phenđe leske: Sose amen naštisardam ole te tradas?

²⁰ A o Isus lenge phenđa: Bašo bipaćajpe tumaro. Kaj čače tumenge phenav: Te isitumen paćape kobor e kučin morjaki, ka phenen e plajinake akalake: nakh akatar okori, thaj ka nakhel, thaj khanči tumenge ni ka ovel bišajune.

²¹ A kava bijanipe ni tradla pes sem ruđipnasa thaj postimasa.

O Isus pale anglalmothol po meripe thaj đivdinisaripe E Hramosko harači

²² A kana phirde pe Galileja, phenđa lenge o Isus: O Čhavo e Manušesko ka ovel muklo ano vasta e manušenge;

²³ Thaj ka mudaren les, ta o trito dive ka uštel. Thaj but dukhardile.

²⁴ A kana avile ano Kapernaum, paše ale e Petroske godola so ćinena didrahme, thaj phenđe: Sar o sikamno tumaro ni del didrahme?

²⁵ O Petar phenđa: Del. Thaj kana dija ano kher, angleder olestar o Isus vakerda: So de godi, Simone? E thagara e phuvjakere kastar len harači ja šulkara, ple ćhavendar ja avređenendar?

²⁶ Phenđa leske o Petar: E avređenendar. Phenđa leske o Isus: Viz e čhave si mukljarde.

²⁷ Numaj kaj len te na la po bezeh, đa po derav thaj čhude e vudica, thaj savo mačho angluno astare, le les; thaj kana putres lesko muj, ka arakhe o statiro; les le thaj de lenge baše mande thaj baše tute.