Evangelium e Matejestar 15 - Romski prevod Novog zaveta - Srbija

O sikavipe e puranengoro

¹ Atoska ale paše e Isusoske e lilvarne thaj e Fariseja katar o Jerusalim vakerindoj:

² Sose e sikljovne tire nakhen i tradicija e puranengi? Kaj ni thoven pe vasta kana maro xan.

³ A ov irisarindoj phenđa lenge: Sose thaj tumen nakhen o vakeripe e Devlesko vaš tradicija tumari?

⁴ Kaj o Devel čhinada vakerindoj: Paćivalisar e dade thaj e daja; thaj savo džungarel e dade ja e daja merimasa te merel.

⁵ A tumen phenen: Te savo phenel e dadeske ja e dajake: pherdipe si godova soa ka tut me šaj te mažutiv;

⁶ Šaj thaj te na paćivalisar e dade ple thaj e daja. Thaj čhinaden o vakeripe e Devlesko vaš tradicija tumari.

⁷ E dujemujenge, lačhe baš tumenge anglaldikhljarda o Isaija vakerindoj:

⁸ Pašol mange o seloro akava ple mujenca thaj voštenca man paćivalisaren, a o vilo lengo dur si mandar.

⁹ Aj andodilipe man paćivalisaren sićindoj džanglimata thaj vakerimata e manušenge.

¹⁰ Thaj akharindoj e selore phenđa lenge: Šunen thaj haljaren.

¹¹ Na mahril e manuše so đerdini ano muj; aj so inkjol andar o muj godova mahril e manuše.

¹² Atoska ale paše e sikljovne leske thaj phende lese: Đane li kaj e Fariseja, ašundoj godova lafi, kovlile peske?

¹³ A ov irisarindoj phenđa: Sakoj kaš savo ni sijisarda o Dad mlo badalesko, ka xasavel pes.

¹⁴ Muken len, o korore si e hulaje e kororenđe; a o kororo e korore te legarđa, sovduj ani xar ka peren.

¹⁵ A o Petar irisarindoj phenđa leske: Mothov amenge akaja paramiči.

¹⁶ A o Isus phenđa: Te na li sen vi tumen panda bihaljarutne?

¹⁷ Sar panda ni đanen kaj sa so đerdini ano muj đal ano vođi thaj čhudel pes avrial?

¹⁸ A so inkljol andar o muj inkljol andar o vilo, thaj godova mahril e manuše.

¹⁹ Kaj andar o vilo ikljen e đungale ginda, mudaripe, anglačumidipe maladipe, čoripe, xoxamne mothojba, mahripe.

²⁰ Thaj akava si so mahril e manuše, a e bithode vastenca te xalpe ni mahril e manuše.

E Hananejako paćape

²¹ Thaj iklindoj gothar o Isus đelo ane agora e tirskake thaj sidonoske.

²² Thaj dikh, e đuvli Hananejka inklili andar akala agora thaj dija vika leske vakerindoj: Maznosar ma, Devljutneja, čhavo e Davidosko, e ćheja mla but mučil o beng!

²³ A ov lake ni irisarda ni lafi. Thaj paše ale e sikljovne leskere, ruđina les vakerindoj: Mukljar la, kaj dela vika pala mende.

²⁴ A ov irisarindoj phenđa: Me sem bičhaldo numa e našalde bakrenge e Izrailjeskere khereske.

²⁵ A oj ali paše peli pe čanga leske vakerindoj: Devljutneja, mažutisar man!

²⁶ A vov irisarindoj phenđa: Naj lačhe te lel pes o maro e ćhavorendar thaj te ćhudelpe e džuklenge.

²⁷ A voj phenđa: Va, Devljutnea! Aj vi e đućela xan katar e prušuka kaj peren e astalestar lengere barutnendar.

²⁸ Atoska irisarda o Isus thaj phenđa lake: O đuvlije, baro si o paćape tiro; nek tuke ovel sar mange! Thaj sastili e ćhej laki katar godova časo.

O Isus parvarel štar milje manuša

²⁹ Thaj đapeindoj o Isus gothar, avilo pe Galilejosko derav, thaj iklindoj pe plajin, bešlo gothe.

³⁰ Thaj ale paše leske but seloro savo sinele pesa bange, korore, lalore, sakata thaj but aver, thaj pašljarde len anglal e pre e Isusoske, thaj sastarda len,

³¹ ađaar kaj o seloro barikindilo, dićhindoj e kašuken kaj šunen, e laloren kaj vakeren, e sakaten sastarde, e bangen kaj đan, e kororen kaj dikhen; thaj ašarisarena e Devle e Izrailjeske.

³² A o Isus akharindoj e sikljovnen plen phenđa: Dukhalama e selorese, kaj ake trin dive ačhen ke mande thaj najlen so te xan; a najsem manglino te mekav len bokhale te na malaksin po drom.

³³ Thaj phende leske e sikljovne leskere: Katar amenge ani drmina edobor mare kaj te čaljardon edobor seloro?

³⁴ Thaj phenđa lenge o Isus: Kobor mare isi tumen? A on phende: efta, thaj zala mačhore.

³⁵ Thaj vakerda e selorese te bešen ki phuv.

³⁶ Thaj lelja okola efta mare thaj maćhe, thaj bahtarindoj, phaglja thaj dija ple sikljovnenge, a e sikljovne e selorese.

³⁷ Thaj xalje savore thaj čajlile; thaj ćidle kotora so aćhile efta krošnice pherde.

³⁸ A godola kaj xale sesa sine štar milje manuša, sem đuvlja thaj ćhavore.

³⁹ Thaj muklindoj e selore, dija ane barka thaj avilo ane agora e magdaleske.