Evangelium e Matejestar 14 - Romski prevod Novog zaveta - Srbija

Meripe e Jovan Bolipesarutnesko

¹ An godova vaxto avilo o krlo đi o Irod štarthagarunesko e Isusestar.

² Thaj phenđa ple kandinenge: Godova si o Jovan Bolipesarutno, vov uštino taro mule, thaj godolese ćerel ačharhimata.

³ Kaj o Irod astarda e Jovano, phangla les thaj ćhudla ano phandipe paši Irodijada, e romni Filiposki ple phraleski;

⁴ Kaj leske o Jovan vakerela: našti tu ola te le.

⁵ Thaj mangla te mudarel les, aj darajlo e selorestar; kaj inćarena les baš o profeto.

⁶ A kana sasa bijandimasko dive e Irodosko, khelel e ćhej e Irodijaki anglal lende thaj kerda šukaripe e Irodeske.

⁷ Godolese pa xalja sovlja thaj dija lafi kaj ka dela so god mangela.

⁸ A oj, sikavdi katar e daj pli, phenđa: De ma akate po čaro o šero e Jovan Bolipesarutnesko.

⁹ Thaj dukhardilo o thagar; aj ando xape sovlji thaj godolengo save xale pile lesa, vakerda te den lake.

¹⁰ Thaj bičhalda ta čhinde e Jovano ano phandipe.

¹¹ Thaj ande o šero lesko po čaro, thaj dije e ćhijake thaj inđarda ple dajake.

¹² Thaj avindoj e sikljovne leske, lije o trupo lesko thaj parunde les; thaj avile ta mothovde e Isuseske.

O Isus parvarel pandž milje manuša

¹³ Thaj ašundoj o Isus, đelo gothar barkasa ano čučo than korkoro. A kana godova šunda o seloro, lijape pala leste phirindoj andar e forura.

¹⁴ Thaj inklindoj o Isus dikhlja but seloro, thaj kovljilo pe lende, thaj sastarda e nasvalen lengeren.

¹⁵ A anglal e rat ale paše leske e sikljovne leskere vakerindoj: Akate si čučo than, a ake si majpalal; mukljar e manušen nek đan ano gava te ćinen peske xape.

¹⁶ A o Isus lenge phenđa: Naj trubune te đan; den lenge tumen nek xan.

¹⁷ A on leske phende: Najamen akate đi numa pandž mare thaj duj maćhe.

¹⁸ A ov phenđa: Anen len mange akari.

¹⁹ Thaj vakerda e selorenge te bešen pe ćar, ta leja godola pandž mare thaj e duj maćhe, thaj dićhindoj po badali baxtarda, thaj phađindoj dija e sikljovnenge, a e sikljovne e selorese.

²⁰ Thaj xale savore thaj čalile, thaj ćidle kotora kaj aćhile dešuduj krošnice pherde.

²¹ A godola so xale sasa manuša trujal e pandž milje, sem đuvlja thaj ćhavore.

O Isus phirel po pani

²² Thaj sigo tradla o Isus ple sikljovnen te den ani barka thaj te đan anglal leste pe okoja rig đikaj ov mukljarel e selore.

²³ Thaj mukljarindoj e selore, inklilo pe plajin korkoro te ruđil pes. A raćajlo thaj sasa gothe korkoro.

²⁴ A e barka sasa ake maškar o derav, daravdi e talasendar, kaj sasa opipeuni balval.

²⁵ A ano štarto arakhajpe e raćako đelo lende o Isus phirindoj po derav.

²⁶ Thaj dićhindoj les e sikljovne kaj đal po derav, darandile vakerindoj: Godova si angladićhipe; thaj katar e dar dije vika.

²⁷ A o Isus lenge sigo phenđa vakerindoj: Ma daran, me sem, ma daran!

²⁸ A o Petar irisarindoj phenđa leske: Devljutneja, te san tu, phen mange te avav tuke po pani.

²⁹ A vov phenđa: Phir! Thaj iklindoj andar e barka, o Petar đala po pani te avel e Isusoske.

³⁰ Aj dićhindoj zorali balval darajlo, thaj lija te tasavdol, dija vika vakerindoj: Devljutneja, inkal man!

³¹ Thaj sig o Isus lunđarindoj o vast astarda les, thaj phenđa leske: Zalapaćamneja, sose sungajan?

³² Thaj kana dije ani barka, aćhadili e balval.

³³ A on ani barka ale paše thaj pele pe čanga leske vakerindoj: Čače tu sijan o Čhavo e Devlesko.

³⁴ Thaj nakhlindoj avile ani phuv e genisaretsko.

³⁵ Thaj penđarindoj les e manuša andar godova than, bićhalde pe sa godova trujalipe, thaj ande leske sa e nasvalen.

³⁶ Thaj ruđisarde les kaj numa te azbaven e pođa katar o fustano lesko; thaj save azbavde pes sastile.