Evangelium e Matejestar 13 - Romski prevod Novog zaveta - Srbija

Paramiča

¹ A godova dive, iklindoj o Isus andar o kher, bešela pašo derav.

² Thaj čidinisajle uzal leste o but seloro, geja kaj musaj te del ani barka thaj bešel; a o seloro sa terdine pe phuv zalo derav.

³ Thaj vov lenge mothoda but ane paramiča vakerindoj: Dikh, inklilo o sijutno te sejil.

⁴ Thaj kana sijisarda, jekh kučin peli pašo drom, thaj avile e čiriklja thaj xale len.

⁵ A e avera pele pe barale thana, kaj najsas but phuv, thaj sigo inklile, kaj najsa e phuv xor.

⁶ Thaj kana strefisarda o kham, šućile; thaj avune kaj najsalen žile, šućardile.

⁷ A e avera pele ano kare, thaj barile e kare thaj tasavde len.

⁸ A e avera pele pe phuv lačhi, thaj ande bijanipe, jekh po šel, a jekh po šovardeš, a jekh po trianda.

⁹ Kas isi kana te šunel, nek šunel!

¹⁰ Thaj avindoj e sikljovnenge phende leske: Sose lenge vakere ano paramiča?

¹¹ A ov irisarindoj phenđa lenge: Godolese kaj si tumenge dindo te đanen e garamne e Thagareske badalesko, a lenge naj dindo.

¹² Kaj kas isi, ka del pes leske, thaj ka nakhavel leske; a kas nane, ka lel pes lestar vi gova so sile.

¹³ Godoleske lenge vakerav ano paramiča, kaj dićhindoj ni dićhen, thaj ašundoj ni ašunen, ni haljaren.

¹⁴ Thaj pherel pes pe lende o anglalmothodipe e Isaijesko, savo vakerel: Kanenca ka ašunen, thaj ni ka haljaren; thaj jakhenca ka dikhen, thaj ni ka dićhen!

¹⁵ Kaj si zorardilo o vilo akale seloroso, thaj kanenca phare ašunen, thaj jakhenca pirenca phangle kaj sar jakhenca ni dikhen, thaj kanenca ni ašunen, thaj vilesa ni haljaren, thaj ni aven te sastarav len.

¹⁶ A mila tumare jakhenge kaj dićhen thaj kanenge tumarenge kaj ašunen.

¹⁷ Kaj čače tumenge phenav, kaj si bute profetura thaj čačutne mangle te dikhen so tumen dikhen, a ni dikhle; thaj ašunen so tumen ašunen, thaj ni ašunde.

¹⁸ Tumen pa šunen e paramiči e sijutnestar!

¹⁹ Savoneske savo šunel o lafi e Thagaripastar thaj ni haljarel, avel o bilačho thaj čorel o sijisardo ano vilo lesko; godova si pašo drom sijisardo.

²⁰ A po baralo than sijisardo, godova si savo šunel o lafi thaj sigo lošalimasa lela,

²¹ aj najle darhina ana peste, desar si binajstalo, ta kana si đi bilačhipe ja les traden pašo lafija, sigo tradel pes po bezeh.

²² A sijisardo ano kare, godova si savo šunel o lafi, aj e pharipe akale themesko thaj xoxadipe barvalimasko tasaven o lafi thaj bi bijanimasko ačhel.

²³ A sijisardo pe lačhi phuv, godova si savo šunel o lafi thaj haljarel, savo, akana, vi bijanipe bijanel, thaj anel jekh po šel, a jekh po šovardeš, a jekh po trianda.

²⁴ Aver paramiči mothovda lenge vakerindoj: o Thagaripe badalesko si sar o manuš kaj sijisarda lačhi kučin ane umal pli.

²⁵ A kana e manuša zasute avilo olesko dušmano thaj sijisarda o kukolji po điv, thaj đelo.

²⁶ A kana inklilo o điv thaj bijanipe anda, atoska mothovda pes o kukolji.

²⁷ Atoska avile e kandine e kherutneske thaj phenđe leske: Barutnea, na li tu lačhe kučin sijisardan pe umal tiri? Kotar, akana, o kukolji?

²⁸ A vov lenge phenđa: O dušmano manuš godova čerđa. A e kandine leske phenđe: Mange li, akana, te đa te ikala les?

²⁹ A ov phenđa: Na, te na ka ma ikalindoj o kukolji ikala kethane lesa vi o điv.

³⁰ Meken nek barjon solduj kethane đi o čhinipe; a ano vaxto čhinimasko ka phenav e čhinutnenge: Čiden majanglal o kukolji thaj phanden les ane dreza ta te phabarel pes, a o điv inđaren ani mli đivutni.

³¹ E aver paramiči mothovda lenge vakerindoj: O Thagaripe badalesko si sar e kučin morjaki savi lel o manuš thaj sijisarel pe pli umal.

³² Godova si, čačipe, najcikni si katar e sa kučin, aj kana barjol, najbari si katar e sa vunatimata, thaj ovela kaš kaj e čiriklja badaleske avena thaj thanardon pe leske krangore.

³³ E aver paramiči mothovda lenge: O Thagaripe badalesko si sar e majava savi lel e đuvli thaj čhivel ano trin balaje varesere đikaj sa ni šukljol.

³⁴ Sa akava ano paramiča vakerel o Isus e manušenge, thaj bi paramičengo khančik lenge ni vakerda.

³⁵ Te pherel pes so si vakerdo prekal o profeto savo vakerel: Ka putrav ano paramiča o muj mlo, ka vakerav o garavdo katar o kerdipe e themesko.

³⁶ Atoska mekla o Isus e selore, thaj avilo ano kher. Thaj ale đi oleste e sikljovne leskere vakerindoj: Mothov amenge e paramiči e kukoljestar pe umal.

³⁷ A vov irisarindoj phenđa lenge: Savo sijisarel lačhi kučin, godova si o Čhavo e Manušesko;

³⁸ A e umal si them; a e lačhi poćin si e čhave Thagaripeske, a o kukolji si e čhave đungalimaske.

³⁹ A o dušmano savo les sijisarda si o beng; a čhinipe si agoripe e themesko, a o čhinutne si e phakale.

⁴⁰ Sar kaj, akana, o kukolji so čidel pes thaj jagasa phabarel, geja ka ovel pe agor akale themesko.

⁴¹ Ka bičhalel o Čhavo e Manušesko e phakalen plen, thaj ka cidel andar o thagaripe lesko sa tradimata pe bezeha thaj godolen save čeren bikrisipe.

⁴² Thaj ka čhudel len ane jagaći bov; gothe ka ovel rovipe thaj krcipe dandengo.

⁴³ Atoska e čačutne ka strefisaren pes sar o kham ano Thagaripe ple Dadesko. Kas isi kana te šunel, nek šunel!

⁴⁴ Panda si o Thagaripe e badalesko sar barvalipe garavdo ano umal, savo arakhavindoj, o manuš garavđa thaj katar o lošalipe plo đelo thaj sa so sinele bićinđa thaj ćinđa godi umal.

⁴⁵ Panda si o Thagaripe e badalesko sar manuš trgovco savo rodel lačhe kleja.

⁴⁶ Ta kana arakhlja jek butmoldi kučin klej, đelo thaj bićinda sa so sinele thaj ćindala.

⁴⁷ Panda si o Thagaripe e badalesko sar safin savi čhudel pes ano derav thaj čidel e mačhen katar sakoj njamo.

⁴⁸ Kana pherdol pes, ikalen la pe phuv zalo pani thaj, bešindoj, alosaren e lačhe ane vasore, a e đungale čhuden avrial.

⁴⁹ Geja ka ovel po agor e themeskosko: ka inklen e phakale thaj ka ulaven e džungalen e čačutnendar,

⁵⁰ thaj ka čhudel len ane jagaći bov; gothe ka ovel rovipe thaj krcipe dandengo.

⁵¹ Phenđa lenge o Isus: Haljaren li sa akava? Phende leske: Va, Devljutneja!

⁵² A vov lenge phenđa: Godolese sakoj lilvarno savo sićilo o Thagaripe e badalesko sar ćherutno savo ikalel andar e riznica pli nevo thaj purano.

Napaćape e Nazarećango

⁵³ Thaj kana agorisarda o Isus e paramiča akala, đelo athar.

⁵⁴ Thaj avindoj ano plo bijandimasko than, sikavela len ane sinagoga lengiri geja kaj ćerena baripe lesa thaj vakerena: Katar akalese but gođovaripe akava thaj zor?

⁵⁵ Naj li akava e kaštunaresoro čhavo? Na vikinelpe li e daj lesiri Marija, thaj e phrala lesere o Jakov thaj o Josija thaj o Simon thaj o Juda?

⁵⁶ Thaj e phenja leske naj li sa ke amende? Kotar leske sa akava?

⁵⁷ Thaj tradena pes pe bezeha lestar. A o Isus lenge phenđa: Naj profeto bi paćivako sem ano than bijandimasko plo thaj ano kher plo.

⁵⁸ Thaj ni čerda gothe bute ačharhimata bašo lengo bipaćajpe.