Evangelium e Matejestar 12 - Romski prevod Novog zaveta - Srbija

Čhudipe po Hristo, mahripe, e Jonesko semno

¹ An godova vaxto đala o Isus ko savato maškar e givora; a e sikljovne leske bokhajlile thaj lije te čhinen e kaniša thaj xale.

² A e Fariseja dićhindoj godova phenđe leske: Dikh, e sikljovne tire keren so ni trubul te kerelpes ko savato.

³ A ov lenge phenđa: Na li drabarden so kerda o David kana bokhajlo, ov thaj save sinele lesa?

⁴ Sar dija ano kher e Devlesko thaj e mare inkaldenge xala, save ni trubuja te xal leske ni godolenge so sinele lesa, aj numa e rašajenge.

⁵ Ja ni drabarden ano Kriso sar savatosa e rašaja o hramo savatone uštaven, ta naj bange?

⁶ A me tumenge phenav kaj si akate majbaro e hramostar.

⁷ Kana kama pale đanen so si godova: Mila mangav a na viktimapašaripe, ni ka krisisaren e bidošalen.

⁸ Kaj si o Čhavo e Manušesko barutno thaj e savatoske.

⁹ Thaj đapeindoj gothar, avilo ani sinagoga lengi.

¹⁰ Thaj dikh, gothe sasa o manuš e šuke vasteso; thaj phučle les vakerindoj: Šaj li savatosa te sastarelpe? – kaj te krisisaren le.

¹¹ A vov lenge phenđa: Savo si maškar tumende o manuš savo isile bakri jek, ta voj ano savato te perel ane xar, te ni ka lela thaj inkalela?

¹² A kobor li si o manuš majbarikano e bakrijatar? Akana, šaj savatosa lačhe te keres.

¹³ Atoska phenđa e manušeske: Inzar o vast tiro. Thaj inzarda. Thaj kerdilo sasto sar e dujto.

¹⁴ A e Fariseja inklindoj inčarde svato opipe lestar sar te mudaren le. Aj o Isus, đanglindoj godova, đelo gothar.

¹⁵ Thaj palo leste đana bute selore, thaj sastarda len sa.

¹⁶ Thaj daravda len te na phučaren le;

¹⁷ Te pherel pes so si phendo prekal o Isaija profeto, savo vakerel:

¹⁸ Dikh, kandino mlo, save alosardem, Čumidino mlo, savo si po kamipe ođesko mlesko: ka ćhuvav o Đi mlo upro leste, thaj o kris e butdevleskerenge ka mothovel.

¹⁹ Ni ka xal pes ni vika ka del, ni ka ko ašunel pe trgura o krlo lesko.

²⁰ E trska mardi ni ka phagel thaj e skimtija phabindoj ni ka aćhavel đikaj ni anel o čačipe đi o phagaripe.

²¹ Thaj ano alav lesko ka paćan e selore.

²² Atoska leske ande e diljarde savo sasa kororo thaj laloro; thaj sastarda les geja kaj o kororo thaj o laloro dikhlja thaj vakerda.

²³ Thaj kerena baripe sa o seloro vakerindoj: Naj li akava o Čhavo e Davidosko?

²⁴ A e Fariseja ašundoj godova phenđe: Akava averčhande ni tradla e bengen đi mažutimasa e Veelzevulesko, thagarutne e bengengo.

²⁵ A o Isus, đanglindoj e gnd lengiri, phenđa lenge: Sakoj thagaripe savo ulavel pes numa ana peste, ka šućarel; thaj sakoj foro ja kher savo ulavel pes korkoro ana peste, ni ka inćarel pes.

²⁶ Thaj te o beng e benge tradel, korkoro ana peste uladilo; sar akana, ka ačhel o thagaripe leskoro?

²⁷ A thaj me e Veelzevulesa mažutimasa tradav e bengen, e čhave tumare kase mažutimasa traden? Godolese tumenge von ka oven krisara.

²⁸ A ako li me Đi Devlesko tradav e bengen, napal avilo tumende o Thagaripe Devlesko.

²⁹ Ja sar šaj ko te del ano kher e zoraleske thaj e kheresko barvalipe te lel, te majanglal ni phandel e zorale? – thaj napal o kher lesko ka čorel.

³⁰ Savo naj manca, opipe mandar si; thaj savo ni čidel manca, čhorel.

³¹ Godolese tumenge phenav: Sakoj bezeh thaj mahripe ka jertisavol pes e manušenge, a mahripe po Đi Sumnalo ni ka jertisarel pes e manušenge.

³² Thaj te phenđa ko lafija opipe e Čhave Manušestar, ka jertisavol pe leske; a savo phenđa opipe e Đe Sumnalestar, ni ka jertisavol pes leske ni ano akava them ni ano avuno.

³³ Ja sijisaren lačho kaš, thaj o bijanipe lesko ka ovel lačho, ja sijisaren đungalo kaš, thaj o bijanipe lesko ka ovel đungalo; kaj po bijanipe o kaš penđarel pes.

³⁴ Njamura aspidenge, sar šaj lačhe te vakeren, kana sen đungale? Kaj katar o najbut vilo o muj vakarel.

³⁵ Lačho manuš andar e lačhi riznica inkalel lačhipe; a o đungalo manuš andar e džungali riznica inkalel đungalipe.

³⁶ A me tumenge phenav, kaj vaš sakoj čučo lafi savo vakeren e manuša ka del irisaripe ano dive e Krisosko.

³⁷ Kaj ando tire lafija ka ove čačardo thaj ando tire lafija ka ove krisime.

³⁸ Atoska irisarde nesave katar e lilvarne thaj e Fariseja vakerindoj: Sikamneja, manga tutar o semno te dikhas.

³⁹ A vov irisarindoj vakerda lenge: O bijanipe đungalo thaj anglačumidino rodel semno; thaj ni ka del pes leske o semno sem semno e Jone profetosko.

⁴⁰ Kaj sar so o Jona sas ano vođi kitosko trin dive thaj trin raća, geja vi o Čhavo e Manušesko ka ovel ano vilo e phuvjako trin dive thaj trin raća.

⁴¹ E Ninevljanura ka ušten po Kris e bijanimasa akalesa, thaj ka krisin les; kaj jertisajle e Jonose vakerimasa; a dikh, akate si majbaro e Jonestar.

⁴² E Thagarni jugoski ka uštel ko Kriso e bijanimasa akalesa, thaj ka krisil les; kaj voj avel katar o agor e phuvjako te ašunel baro bižajipe e Solomonosko; a dikh, akate si majbaro e Solomonostar.

⁴³ A kana o biužo đi inklel andar o manuš, đal andar e bipanjeske thana rodindoj lačhipe, a ni arakhel.

⁴⁴ Napal phenel: Te iriv man ano kher mlo katar inklilem; thaj avindoj arakhla čučo, šilado thaj lačhardo.

⁴⁵ Atoska đelo thaj lela pesa efta aver đi majdžungale pestar, thaj dindoj bešlo gothe; thaj ovel majpalal majdžungalje e manušeske godoleske e anglunestar. Geja ka ovel vi akale bijanimaske džungaleske.

E daj thaj e phrala e Hristoske

⁴⁶ Đikaj vov vađe vakerela e selorenge, dikh, e daj thaj e phrala leske ačhena avral rodindoj te vakeren lesa.

⁴⁷ Thaj nesavo leske phenđa: Ake e daj tiri thaj e phrala tire ačhen avral, rodindoj te vakeren tusa.

⁴⁸ A vov irisarda thaj vakerda godoleske so leske phenđa: Ko si e daj mli, thaj ko si e phrala mle?

⁴⁹ Thaj inzarindoj o vast plo pe sikljovne ple, phenđa: Ake e daj mli thaj e phrala mle.

⁵⁰ Kaj ko del agor o kamipe e Dadesko mlesko savo si po badali, godova si o phral mlo thaj e phen thaj e daj.