Evangelium e Matejestar 11 - Romski prevod Novog zaveta - Srbija

¹ Thaj kana dija agor o Isus e vakerimata e Dešudujenge sikljovnenge plenge, đelo gothar te sićol thaj te vakerel pe lengere forura.

Bićhaldipe e Jovan Bolipesarutnesko

² A o Jovan, ašundoj ano phandipe kotar čerdipe e Hristosko, bičhalda dujen katar e sikljovne ple.

³ Thaj phenđa leske: San li tu Godova so ka avel, ja avere te ađičera?

⁴ A o Isus irisarindoj phenđa lenge: Đan thaj mothoven e Jovanoske akava so ašunen thaj dikhen:

⁵ E korore dikhen thaj e bange phiren, e đeramne užen pes thaj e kašuke ašunen, e mule ušten thaj e čororenge vakerel pes o evangelium.

⁶ Thaj bahtaripe godoleske savo ni tradla po bezeh mandar.

⁷ A kana von đele, lija o Isus te vakerel e selorese e Jovanostar: So inklisten te dićhen an drmina? E trska savi banđarel e balval?

⁸ Aj so inklisten te dićhen? E manuše an kovlo fustano uravdo? Eke, savo kovlo fustano inđaren ko thagareske si palate.

⁹ Aj so inklisten te dikhen? E Profeto? Va, phenav tumenge, thaj majbut katar o profeto.

¹⁰ Kaj vov si godova savestar si hramome: Eke, me bičhalav e phakale mle anglal o muj tiro, savo ka gatisarel o drom tiro anglal tute.

¹¹ Čače tumenge phenav: Maškar e bijande katar e đuvlja ni sikadilo majbaro katar o Jovano Bolipesarutno; a najcikno ano Thagaripe badalesko najbaro si lestar.

¹² A katar o vaxto e Jovan Bolipesarutnesko đi akana o Thagaripe badalesko zorasa astarel pes, thaj e mukljutne len les.

¹³ Kaj sa e Profetura thaj o Kris mothona đi o Jovano.

¹⁴ Thaj te manglen te paćan, vov si o Ilija so ka avel.

¹⁵ Kas isi kana te šunel, nek šunel!

¹⁶ Aj kasa ka sikavdol o bijandipe akava? Jekćhane si e ćhavorenge save bešen pe trgura thaj akharen e amalen plen vakerindoj:

¹⁷ Bašaldam tumenge, thaj ni čhelden; kućisardam tumenge, thaj ni riknisarden.

¹⁸ Kaj avilo o Jovan, savo ni xal ni pijel, a von phenen: O beng si ano leste.

¹⁹ Avilo o Čhavo e Manušesko, savo vi xal vi pijel, a von phenen: Dikh manuše xandžvale thaj molpilo, amal e šulkarenge thaj e bezehenge. Thaj sas čačardo o bižajipe katar e ćhavore lake.

Daravipe e bijertime foronenge

²⁰ Atoska lija o Isus te mahrisarel e forura ano save kerdile bute ačharhimata leske, kaj ni jertisajle pes:

²¹ Pharipe tuke, Horazino! Pharipe tuke, Vitsaido! Kaj te ano Tiro thaj Sidona ačharhimata save ano tumende kerdile, dumutan ka ma ano gono thaj ano praxo jertisavona.

²² Aj tumenge phenav: E Tiroske thaj e Sidonoske majloke ka ovel ano dive e Krisosko na tumenge.

²³ Thaj tu, Kapernaumo, savo đi ko badali vazdlan pes, đi ke bengengi jag ka ulje; kaj ano Sodomo te oven e ačhardimata so ana tute kerdile, ka ačhela đi avdive e ađivesesko.

²⁴ Aj tumenge phenav kaj e phuvjake sodomoski majloke ka ovel ano dive e Krisesko na tuke.

²⁵ Ano godova vaxto irisarda o Isus, thaj phenđa: Ašarav tut, Dade, Devlutneja badalesko thaj phuvjako, so akava garadan katar e gođaver thaj haljarune, a phućardan e bidžungalenge.

²⁶ Va, Dade, kaj geja sasa kovlo kamipe tiro.

²⁷ Sa mange mekla o Dad mlo, thaj khonik ni đanel e Čhave aj o Dad; ni e Dade ko đanel aj o Čhavo, thaj te o Čhavo mangel kaske phučarel.

²⁸ Aven mande savore save sen ćherdipe thaj ladavde thaj me tumen ka hodiniv.

²⁹ Len e drez mli pe tumende thaj sićon mandar; kaj sem me kovlo thaj kovljardo vilesa, thaj ka araćhen šandipe tumare ođenge.

³⁰ Kaj e drez si mli kovli, thaj o ladavipe si mlo loko.