Evangelium e Matejestar 10 - Romski prevod Novog zaveta - Srbija

E Apostolengiri misija

¹ Thaj akharindoj ple dešuduj sikljovnen, dija lenge kriso upral o biuže đe kaj len te traden, thaj te sastaren katar sakoj nasvalipe thaj sakoj bizuralipe.

² A e anava e dešuduje apostolengoro si akala: angluno o Simon, savo akharelpe Petar, thaj o Andrej o phral lesoro; o Jakov Zevedejev thaj o Jovan o phral lesoro;

³ O Filip thaj o Vartolomej; o Toma thaj o Matej šulkari; o Jakov Alfejev thaj o Levej akhardo Tadej;

⁴ O Simon Kananit thaj o Juda Iskariotsko, savo le vi dija muj.

⁵ Kala Dešudujoren bičhalda o Isus thaj čhinada lenge vakerindoj: Po drom e butdevlengoro ma đan, thaj ano foro samarjango ma den.

⁶ Aj đan majanglal e našalde bakrenge e khereske Izrailjeske!

⁷ Thaj phirindoj mothoven thaj phenen kaj alo paše o Thagaripe badalesko.

⁸ E nasvalen sastaren, e đeramnen khosen, e mulen vazden, e bengoren traden; po davipe lijen, po davipe thaj den.

⁹ Ma inđaren sumnakaj, ni rup, ni xarkuma, ano kustika tumare.

¹⁰ Ni traste po drom, ni duj fostanja, ni pođipe, ni rovli; kaj o bućarno si paćavdo xapesko piresko.

¹¹ A kana an savo foro ja gav den, Phučen kon si an leste paćavdo thaj gothe ačhen đikaj ni inklen.

¹² A dindoj ano kher, bahtaren vakerindoj: Šandipe akale khereske!

¹³ Thaj te si o kher pačivuno, nek ovel o šandipe tumaro pe leste; a te na li avel pačivuno, nek o šandipe tumaro tumenge iril pes.

¹⁴ Te tumen ko ni lel ni šunel e lafija tumare, iklindoj andar o kher, ja andar o foro godova, činosaren o praxo tumare prendar.

¹⁵ Čače tumenge phenav: Majloke ka ovel e phuvjake sodomeski thaj gomoreski ano dive Krisosko na li godole foroske.

¹⁶ Eke, me tumen bičhalav sar bakre maškar e ruva. Oven, akana, gođaver sar sapa thaj bidžungale sar golubura!

¹⁷ A arakhen tumen katar e manuša; kaj tumen ka den e krisonenge, thaj pe sinagoge ple ka maren tumen.

¹⁸ Thaj anglal e phurederutne thaj thagara ka inkalen tumen baše mande vaš mothodipe lenge thaj butedevlengere.

¹⁹ A kana tumen den, ma grižen pes sar ka ja so ka vakeren; kaj tumenge an godova časo ka del pes so ka phenen.

²⁰ Kaj ni tumen ka vakeren, aj ka o Đi e Dadesko tumaresko ka vakerel andar tumende.

²¹ A ka del o phral e phrale po meripe thaj o dad e čhave; thaj ka ušten e ćhavore pe bijande thaj ka mudaren len.

²² Thaj savore tumen ka riton paše alav mlo; aj savo ka nakhavel đi agor godova ka inkalel pes.

²³ A kana tumen ka traden ano jekh foro, našen ano aver. Kaj čače tumenge phenav: Ni ka phiren e forura Izrailjeske đikaj ni avel o Čhavo e Manušesko.

²⁴ Naj sikljovno upral o sikamno plo ni kandino upral barutno plo.

²⁵ Ma maj si e sikljovnese te ovel sar sikamno lesko thaj e kandineske sar barutno lesko. Te e kherutne akharde Veelzevulosa, kobor ka anglal e kherune leskere?

²⁶ Ma daran lendar, akana; kaj naj khanči garavdino so ni ka phučarel pes, ni garadune so ni ka đanel pes.

²⁷ So tumenge vakerav an tunjariko, mothoven po rošlipe; thaj so tumenge vorbil pes ano kana, mothoven katar e ćatle.

²⁸ Thaj ma daran godolendar save mudaren o trupo, a o ođi našti mudaren; aj majbut daran godolestar savo šaj vi o ođi vi o trupo te xasarel ani benđenđi jag.

²⁹ Ni bikindon li duj čirikle vaš jekhe loveske? Ta ni jekh katar lende ni perel pe phuv bi e Dadesko tumaresko.

³⁰ A tumenge si thaj i e bala ko šero sa đende.

³¹ Ma daran, akana; tumen sen majlačhe katar e but čirikle.

³² Sakoj savo paćivalisarel man anglal e manuša, ka paćivalisarav thaj me le anglal o Dad mlo savo si po badali.

³³ A ko durol mandar anglal e manuša, ka durivavav vi me lestar anglal o Dad mlo savo si po badali.

³⁴ Ma den godi kaj aviljem te anav šandipe pe phuv; ni avilem te anav šandipe aj xanrri.

³⁵ Kaj avilem te ulavav e manuše katar o dad lesko thaj e ćheja katar e dej lakiri thaj e bora katar e sasuj lakiri.

³⁶ Thaj dušmaja e manušeske ka oven o kherutne leskere.

³⁷ Savo čumidel e dade ja e deja majbut katar mande, naj mlo paćavdo; thaj savo čumidel e čhave ja e ćheja majbut katar mande, naj mlo paćavdo.

³⁸ Thaj savo ni lel o trušul plo thaj ni phirel pala mande, naj mlo paćavdo.

³⁹ Savo arakhel o đivdipe plo, ka xasarel les, a savo xasarel o đivdipe plo ana mande, ka arakhel les.

⁴⁰ Savo tumen lel, man lel; a savo lel man, lel Godole savo man bičhalda.

⁴¹ Savo lel e profeto ano alav profetosko, e počini profetoski ka lel; thaj savo lel e čačune ano alav čačimasko, e počini čačimaski ka lel.

⁴² Thaj te savo del te pijel jekhe katar akala cikne numa taxtaj šudre pajesa ano alav sikavimasko, čače tumenge phenav, ni ka peradol leski počini.