Evangelium e Markostar 5 - Romski prevod Novog zaveta - Srbija

¹ Thaj avile prekal o derav ane phuv Gadarinoski.

² Thaj kana inklilo andar e barka, sigo malavda les andar e limora o manuš đesa biužesa.

³ Savo đivdini an limora thaj khonik les naštisarda te phandel ni sinđirenca;

⁴ Kaj but droma sasa phandlo an sastrena thaj sinđirja, vov pale čhinda e sinđira thaj e sastrena phagla; thaj khonik naštisarda te banđaren les.

⁵ Thaj sajekh rat thaj dive vov sas an limora thaj pe plaina, vikindoj thaj marindoj pes barenca.

⁶ A kana dikhla e Isuso dural, prasla thaj telilo angla leste.

⁷ Thaj vikindoj andar sa o krlo phenda: So mange mandar, Isuso Ćhaveja Devlesko e Učesko? Sovel dav tut Devlesa, ma mučin man!

⁸ Kaj leske vakerdasa: Ikljov, ođi biužo, andar o manuš!

⁹ Thaj phučla les: Sar si ćiro alav? Thaj vov phenda leske: Legion si munro alav; kaj sam amen but.

¹⁰ Thaj ruđisarde les but te na bičhalel len andar okova agor.

¹¹ A gothe pe jek plaj ćaronas but bale.

¹² Thaj ruđisarena les sa e benga vakerindoj: Bičhal amen an bale an lende te das.

¹³ Thaj mekla lenge o Isuso sigo. Thaj inklindoj e biuže đi dije an bale: thaj prastande dije e bale oto plain an derav; a sesa von trujal duj milje; thaj taslile an derav.

¹⁴ A e balenge arakhavne našle, thaj mothode ano foro thaj pe gava. Thaj inklile e manuša te dikhen so kerdilo pes.

¹⁵ Thaj avile e Isusoske, thaj dikhle e diljarde an savo sas o legiono kaj bešel, uravdo thaj gođaver; thaj darajle.

¹⁶ Thaj mothode lenge von so dikhle so kerdilo e diljardeske, thaj e balendar.

¹⁷ Thaj lije te ruđisaren les te đal andar lenge agora.

¹⁸ Thaj kana dija an barka, ruđisarda les godova so sas diljardo te ovel lesa.

¹⁹ A o Isuso ni dija les, thaj leske phenda: Đa khere tute thaj će kherutne, thaj vaker lenge so o Devlutno kerdas, thaj sar sastarda tut.

²⁰ Thaj vov gelo thaj lijas te vakerel an Dekapoljo, so kerdas leske o Isuso; thaj savorenge ile bajrardile.

Đivdinisaripe e Jairosko ćhejako thaj sastaripe e đuvljako ratesko ćhordipe

²¹ Thaj kana nakhlo o Isuso an barka pale pe okoja rig, kidlepes butesa seloro uzalo leste; thaj sas uzal o derav.

²² Thaj dikh, avilo jekh katar e phurederutne e sinagogako po anav Jair; thaj dikhindoj les pelo angla punre leske.

²³ Thaj ruđisardale but, vakerindoj: E ćhejori mori si po meripe; te aves thaj te meke pe late će vasta, te sastol thaj đivdi te ačhel.

²⁴ Thaj lija te đal lesa. Thaj pala leste đana manuša but thaj tanđarena les.

²⁵ Thaj e đuvli jek savi dešuduj berš nasvali sas katar o thavdipe e ratesko.

²⁶ Thaj but dukha sinela e bute sastarutnendar, thaj xala sa so sala, thaj khanči ni ažutisardala, no sar sas lake po bilaćhe sinele.

²⁷ Kana ašunda e Isusoske, avili ano seloro karing palal, thaj azbavda palal o fustano lesko.

²⁸ Kaj vakerela an peste: Te azbavdem o fustano lesko, ka sastijav.

²⁹ Thaj sigo ačhilo te thavdol o rat latar, thaj aćarda an peste kaj sastili e nasvalimastar.

³⁰ Thaj sigo o Isuso aćarda an peste i zor kaj inklistilo lestar, thaj irindoj po šel phenda: Kon godova azbavda pes munro fustano?

³¹ Thaj phende lese e sikavne leske: Dikhes kaj e seloro tanđaren tut, thaj phućes: kon azbavda man?

³² Thaj vov leja pese sama te dikhel godola savi godova kerda.

³³ A e đuvli, darandoj thaj tresindoj, đanglindoj so kerdilo lake, avili thaj peli pe čanga anglal leste, thaj phenda lese sa o čačipe.

³⁴ A vov lake phenda: Čhaje, o paćape ćiro sastarda tut; đa krotkipna, thaj ov sasti katar o nasvalipe ćiro.

³⁵ Đikaj vov vađe vakerela, avile katar e phurederutne sinagogake vakerindoj: E ćhej ćiri muli; so pana deš zori e Sikamne?

³⁶ A o Isuso sar ašundas o lafjori so vakerde, phenda e sinagogake phurederutnese: Ma dara, de paći!

³⁷ Thaj ni dija khanikas pala leste te đal sem o Petar thaj o Jakovo thaj o Jovano o phral Jakovesko.

³⁸ Thaj avilo ano kher e sinagogakere phurederutnese, thaj dikhla bute dženen sar e dukhatar roven thaj rindonena but.

³⁹ Thaj dindoj andre phenda lenge: So sen darade thaj roven? E ćhajori ni muli, aj sovel.

⁴⁰ Thaj asavile lestar. Vov tradla savoren avri thaj lija e dade thaj e daja e ćhajake thaj godolen save sesa lesa, thaj dijas kaj sasa pašljardi e ćhajori.

⁴¹ Thaj lija e ćhajorja vastestar thaj phenda lake: Talita kumi, so averčhande si: Ćhajorije, tuke vakerav, ušti!

⁴² Thaj sigo uštili e ćhajori, thaj phirda; voj sasa katar e dešuduj berš. Thaj naštisarde te aven peste bare sikadimasa.

⁴³ Thaj but darada len kaj khoni te na đanel godoleske; thaj phenda te den la te xal.