Evangelium e Markostar 2 - Romski prevod Novog zaveta - Srbija

Sastaripe e leljarčerde

¹ Thaj dijas pale an Kapernaum kana nakhle nekobor divesa, thaj ašundilo kaj si ano kher.

² Thaj sigo čidepe but đene, geja kaj naštisarde ni anglal o vudar sare te resen; Thaj lija te vakerel lenge o lafjori.

³ Thaj avile leste e leljačerdea save indjarena štar đene.

⁴ Thaj sar naštisarde te nakhen đi leste e bute manušendar, phutarde o ćhatlo e kheresko kaj vov sasa, handle o than thaj mekle e leljačerde unzardo kaj pašljola.

⁵ A o Isus dikhla lengo paćape, phenda e lindineske: Ćhaveja, jertisavon tuke e bezexa ćire!

⁶ A gothe bešena nesave e lilvarnendar thaj gindisarde an ile pire:

⁷ So akava ađar dela armanja e Devle? Kova šaj te jertisarel e bezexa semo jekh Devel?

⁸ Thaj sigo haljovindoj o Isuso đesa piresa kaj von geja gindisarde an peste, phenda lenge: So geja gindisaren an ile tumare?

⁹ So si majloke? Te phenes e leljačerdese: Jertisaren pes tuke e bezexa; ja te phenel pes: Ušti thaj les pašljarimasko than ćiro, thaj phir?

¹⁰ Si te đanen kaj o Čhavo Manušesko si les gavanmano pe phuv te jertisarel e bezexa, phenda e leljačerdese:

¹¹ Tuke vakerav: Ušti thaj les pašljarimasko than ćiro, thaj đa ćire khereske.

¹² Thaj uštilo sigo, thaj lindoj pašljarimasko than, inklisto angla savorende a von savore barikindepe thaj ašarisardes e Devle vakerindoj: Nikana geja so ni dikhlam.

O Isus akharel e Levija

¹³ Thaj inklilo palem đi deraveste; thaj sa o manuša lije te đan leste, thaj sikavda len.

¹⁴ Thaj nakhljindoj dikhla e Levija Alfejeve kaj bešel pe huduti, thaj phenda leske: Phir pala mande. Thaj uštindoj đelo pala leste.

¹⁵ Thaj kana bešela o Isus te han maro ano kher lesko, bute hudutara thaj e bezaxale bešle lesa thaj leske sikavnenca, kaj sesa but save đana pala leste.

¹⁶ A e lilvarne thaj e fariseja, dikhindoj les kaj xal e hudutnencar thaj e bezexalencar, phende leske sikavnenge: Soske e hudutnencar thaj e bezexalencar xal thaj pijel?

¹⁷ Thaj ašundoj o Isus, phenda lenge: Ni trubun e saste sastarutne aj e nasvale. Me ni avilem te akharav e čačutnen po jertisaripe, aj e bezexalen.

Katar o postipe

¹⁸ Thaj sesa e Jovanoske thaj farisejenge sikavne save postina, thaj avile thaj vakerde leske: Soske e sikavne Jovanoske thaj farisejenge postin a ćire sikavne ni postin?

¹⁹ Thaj phenda lenge o Isus: Sar šaj e abijavara te postin đikaj si lenca o terno e borako? Sa đi kaj si lenca o terno e borako, von našti te postin.

²⁰ Aj ka aven e divesa kana ka našaldol katar lende o terno e borako, thaj tegani ka postisaren an odola dive.

²¹ Thaj khonik ni suvdarel neve kotora po purano fustani kaj o nevo kotor šaj te perel e puranestar, thaj pobari xuv ka ovel.

²² Thaj khonik ni čhorel i nevi mol an e xala purane; kaj i nevi mol pharavel e xala, thaj i mol čhordol thaj e xala ćernon; godoleske i mol nevi trubul te čhorel pes an neve xala.

Barutno e savatosko

²³ Thaj ine sasa kana vov iklilo an savato maškar o giv kaj e sikavne leske lije te keren drom te čhinen e giveske kaniša.

²⁴ A e fariseja phende leske: Dik, sose keren an savato godova so naj lačhe?

²⁵ A vov lenge vakerda: Ni drabarden nikana so kerdas o David kana pelo an pharipe thaj lija les i bokh thaj okola so sesa lesa.

²⁶ Sar dijas ano kher e Devlesko, vaš o vaxto Avijataresko anglunorašajesko thaj xala e čite mare, save ni tromaja khonik te xal, semo e rašaja, thaj dija godolenge, save sesa lesa.

²⁷ Thaj vakerela lenge: O savato si kerdo e manušeske, a naj kerdo o manuš e savatoske.

²⁸ Godoleske si o Čhavo Manušesko barutno thaj katar o savato.