Evangelium e Jovanostar 3 - Romski prevod Novog zaveta - Srbija

Vaćaripe e Nikodimosa

¹ A sine manuš maškar e fariseja, po anav Nikodim, knezo e judejengo.

² Ov avilo e Isusese raćasa thaj phenđa lese: Ravi, đana kaj san sikamno e Devlestar avilo; kaj khonik našti akala ćerimata te ćerel save tu ćereja te naj o Devel lesa.

³ Irisarda o Isus thaj phenđa lese: Čače, čače tuće vaćerav: te na ko ni bijandol upral, našti dikhel o Thagaripe e Devlesoro.

⁴ Phenđa lese o Nikodim: Sar šaj o manuš te bijandol kana si purano? E da li šaj po dujto drom te đerdini ano vođi ple dajako thaj te bijanđol?

⁵ Irisarda o Isus: Čače, čače tuće phenav: te na ko ni bijanđol panjesa thaj Đesa, našti te đerdini ano Thagaripe e Devlesoro.

⁶ So si bijando e trupostar, trupo si; a so si bijando e Đestar, đe si.

⁷ Ma čudipe so phendem će: trubul tumenge te bijanđoven upral.

⁸ O Đi phurdel kaj mangel, vi o krlo lesko ašune, a ni đane kotar avel thaj kotar đal: ađahar si sarsavo savo si bijando e Đestar.

⁹ Irisarda o Nikodim thaj phenđa lese: Sar šaj odova te ovel?

¹⁰ O Isus irisarđa thaj phenđa lese: Tu sijan sikamno e Izrailjeso, a odova li na đane?

¹¹ Čače, čače tuće vaćerav kaj odova so đana vaćera thaj so dikhljam mothova, thaj o mothovdipe amaro na lena.

¹² Kana tumenge vaćerdem odova so si phuvutno ta ni paćan, sar ka paćan te phendem tumenge odova so si badalesko?

¹³ Thaj khonik ni uklilo po badali sem Odova savo hulilo e badalestar, o Čhavo e Devlesoro savo si po badali.

¹⁴ Thaj sar so o Mojsije vazdla e sape ane drmina, ađahar trubul te vazdel pe o Čhavo e Manušesko,

¹⁵ ta sarsavo savo paćal ano leste ni mudarđol, aj te ovele bimerutneso đivdipe,

¹⁶ kaj o Devel ađahar kamlja o them kaj e Čhave ple Jekhebijande dija, kaj sarsavo savo paćal ano leste ni mudarđol, aj te ovele bimerutneso đivdipe.

¹⁷ Kaj ni bičhalda o Devel e Čhave ple po them te krisil e themese, aj kaj o them te ikalel pe maškaro leste.

¹⁸ Savo ano leste paćal ni krisil pe lese, a savo ni paćal ake si krisimo, kaj ni paćaja ano anav e Jekhebijande Čhave e Devlesere.

¹⁹ A akava si kris so o rošlipe avilo po them, a e manuša majbut kamle o raćipe nali o rošlipe; kaj lengere kotora sine đungale.

²⁰ Kaj sarsavo savo kerel đungalipe mrzol o rošlipe thaj ni đal premalo o rošlipe, te na phućardon e kotora lesere, kaj si đungale.

²¹ A ko o čačipe kerel, đala premalo o rošlipe, te dićhon e kotora lesere – kaj si ano Devel kerde.

E Jovanesoro mothovdipe e Isusestar

²² Pale odova avilo o Isus thaj e sikljovne lesere ane judejengiri phuv, thaj odothe thanardilo lencar thaj bolela.

²³ A vi o Jovan bolela ano Enon paše o Salimo, kaj odothe sine but pani; thaj avena ta bolena pe.

²⁴ Kaj pana na sine o Jovan čhudino ano phandlipe.

²⁵ Teg ulo ćingar maškar e sikljovne e Jovanosere thaj nesavo Judejco trujal o užaripe.

²⁶ Thaj avile e Jovanose thaj vaćerde lese: Ravi, odova so sine tusa prekal o Jordano, baš savese tu mothovdan, eke bolela, thaj savore đana leste.

²⁷ O Jovan irisarda thaj phenđa: Našti o manuš khanči te lel te na dindilo lese e badalestar.

²⁸ Tumen mange korkore mothoven kaj phendem: Najsem me o Hristos me sem bičhaldo anglal leste.

²⁹ Kas isi terni terno e borjako si, a o amal e ternese borjako ačhel thaj ašunel le, thaj lošalimasa lošalel pe krlese e borjakere ternese. Akaja, akana, lošalipa mli pherdini si.

³⁰ Ov trubul te barjol, a me te tiknovav.

³¹ Savo upral avel upreder savorende si. Savo si e phuvjatar kotar e phuv si, thaj e phuvjatar vakerel; a savo avel e badalestar upreder savorende si;

³² Thaj so dikhlja thaj šunđa, odova mothovel; thaj o mothovdipe lesoro khonik na lel.

³³ Ko lel o mothovdipe lesoro, čačavel kaj si o Devel čačuno.

³⁴ Kaj kas o Devel bičhalda, odova e lafija e Devlesere vaćerel: kaj o Devel e Đese ni del pe mera.

³⁵ Kaj o Dad čumidel e Čhave, thaj sa dija lese ano vast.

³⁶ Ko paćal ano Čhavo, isile đivdipe bimerutno; a te si bikandino e Čhavese, ni ka dikhel đivdipe, aj e xoli e Devlesiri ačhel pe leste.