Efesconenge 6 - Romski prevod Novog zaveta - Srbija

¹ Ćhavoralen, ašunen tumare bijanden ano Devljutno, kaj si akava hakajune.

² Paćival e dade kle thaj e daja; akava si angluno čhinavdipe e dinde lafeja:

³ Te ovel će šukar, thaj kaj but berša te dživdine ki phuv.

⁴ Thaj tumen dadalen, ma xoljaren e ćhavoren tumaren, aj vazden len ano barjaripe thaj džanipe e Devljutnesoro.

⁵ Robonalen, oven kandine tumare devljutnenge po trupo, sar e Hristose, daraja thaj bara daraja, ano aćaripe tumare vilesoro,

⁶ na kerindoj semo načaćune sar kaj te ugodinen e manušenđe, aj sar kandine e Hristosere, ćerindoj kamipe e Devlesoro vilestar,

⁷ kandindoj kamlekamnipnaja sar e Devljutnese, a na sar e manušenđe,

⁸ džanindoj kaj sakoj ako so šukar ćerela, odova ka lel e Devljutnestar, aj si robo ja mukljutno.

⁹ Thaj tumen devljutnonalen, ćeren odova jekhune lenđe, bizo daravdipe, džanindoj kaj si thaj lengoro thaj tumaro Devljutno ko badalija, a Ov na dikhel ko si ko.

Gatipe vaš maribnase

¹⁰ A poangle mle praljalen, zoravđon ano Devljutno, thaj ane zorali zor lesiri.

¹¹ Hurjaven tumen ano sabandukipe e Devlesoro, kaj bi šajine te ićeren tumen opipe e bengesere bižajipnastar.

¹² Kaj na maramen opipe e ratesoro thaj trupesoro, aj opipe e šerutnipasere, thaj thagaripnasere, thaj devljutnesoro tunjarikosoro akale themeso, opipe e džungale đesa telal o badali.

¹³ Odolese len sa o bandukipe e Devlesoro, te bi te šajine te ušten ano džungalo dive, thaj inćardindoj baše sa, te ićeren tumen.

¹⁴ Terđoven, akana, paćarindoj tumare bedrija e čaćipnaja thaj hurjavindoj ano arakhavutno e hakajipnaso,

¹⁵ thaj hurjavindoj o pre ano gatipe bašo evangeliumosoro šalomipe;

¹⁶ A upral o sa len o štit e paćapnesoro, savestar ka šaj te aćhaven sa e jagale strele e bipaćivalesere;

¹⁷ Thaj e kaciga ikaldipnasiri len, thaj o mač e Đesesoro, savo si o lafi e Devlesoro.

¹⁸ Thaj sakona ruđipnaja thaj ruđutnunaja ruđinen tumen ano Đi ano sako vakti, thaj uzo odova, džangavđon sakona trajipnaja thaj ruđipnaja baše sa e sumnale,

¹⁹ thaj baše maje, te delpe maje o lafi kana phravava o muj mlo, kaj tromale te mothovav o garavdipe e evangeliumosoro,

²⁰ baše savese kandava ane sinđirja, kaj lestar te vakerav tromaline, sar so sem kamino te vakerav.

Agoripnasiri bićhalutni thaj bićhaldo sastipe

²¹ A kaj te bi thaj tumen džanena sar sem me thaj so ćerava, sa tumenđe ka mothovel o Tihik, ćumudino phral thaj paćavino kandutno ano Devljutno,

²² save akana baše odova thaj bićhalđum ke tumende, te džanen sar sam thaj te kovljarel e vile tumare.

²³ Šalom e phraljenđe thaj kamlipe e paćapnaja kotar o Devel o Dad thaj o Devljutno Isuso Hristo!

²⁴ Dindipe sarijencar save sajekh ćumudinena e Devljutne amare e Isuso Hristo. Amin.