Efesconenge 4 - Romski prevod Novog zaveta - Srbija

Akharipe po jekhipe

¹ Ruđinav tumen, eke, me phandlo ano Devljutno, te arakhavđon paćivale akharipasoro pe savo sijen vičime,

² sa sako teljardipe thaj krotkipe, e baretrpimnaja, trpindoj jek avre ano kamlipe,

³ phurederindoj te arakhen o jekhipe e Đesoro phandino e šalomnipaja:

⁴ Jekh trupo, jekh Đi, sar so sijen vičime ani jekh adžikerutni tumare vičipnasoro;

⁵ Jekh Devljutno, jekh paćape, jekh bolipe,

⁶ jekh Devel thaj Dad sarijengoro, savo si upral sarijende, andar e sa, thaj ana amende sarijende.

⁷ A sakonese kotar amende dinđape dindipe pali mera o dinipe e Hristosoro.

⁸ Odolese phenela: Iklindoj po ućipe lelja o astaripe thaj dinđa e dinipa e manušenge.

⁹ A odova „inklilo” so si, semo kaj anglune thaj huljel ane najtelune thana e phuvljakere?

¹⁰ Odova savo huljel odova si jekhuno savo thaj inklilo majbut sarijendar e badalendar te pherel sa.

¹¹ Thaj Ov dinđa jekhen sar apostolija, a e averen sar profetija, jekhen sar evangelistija, a e averen sar čobanja thaj sikavne,

¹² bašo laćhardipe e sumnalengoro ane kandipasere ćerdipna, bašo duvaripe e Hristosere trupose;

¹³ Džikote na resaja sa ano jekhipe e paćapeso thaj penđaripe e Devlesere Ćhaveso, ano manuš pherdino, ani mera e baripnasoro e Hristosere pheripnase;

¹⁴ Te na ova maj tikne ćhavore, saven kunadel thaj ingarel sako balval sikljobasiri, manušesere xoxavipnasa, thaj bižajipnasa bašo andipe ano dujgođipe;

¹⁵ Aj te ova čaćikane ano kamlipe kaj ano sa te barjova ane Odova savo si šero – o Hristos.

¹⁶ Kotar savo si sa o trupo, ćerdino thaj phandino ažutipnaja sa e kokalengo, ađahar kaj jekh avere te ažutinel pali mera pojekhune dženese, ćerela kaj o trupo te barjol po ćeripe korkoro pes ano kamlipe.

Hrišćanjengoro sumnalipe

¹⁷ Akava, eke, vakerava thaj mothovava ano Devljutno kaj maj na dživdinena sar so dživdinena thaj e avera e nadžangledevlesere ano čućogođipe plo,

¹⁸ tunjarićume gndipa, durarde kotar o dživdipe e Devlesoro bašo bidžandipe savo si ano lende, bašo barardipe lengere vilesoro.

¹⁹ On tupavindoj angladinđe pes e mekljardipnase ta ćerena sako melalipe e pohlepnaja.

²⁰ A tumen ađahar na pendžarđen e Hristo,

²¹ te li le šunđen thaj ano Leste sikavde sijen, sar so thaj o čaćipe ano Isuso,

²² kaj tumen te frden o angleder načino e dživdipasoro e purane manušeso, savo preperela ane xoxavne mangipa,

²³ a te obnovinen tumen đesa tumara gođaja,

²⁴ thaj huraven tumen ano nevo manuš, ćerdino po Devel ano hakajutnipe thaj sumnalipe e čaćipnasoro.

²⁵ Odolese frdindoj o xoxajipe, vakeren o čaćipe sako sa plo najpašutno; kaj sam kotora e truposere jekh avrese.

²⁶ Xoljajvon aj na te keren doš; o kham te na nakhel ane xoli tumari;

²⁷ Ni te na den than e bengese.

²⁸ O ćor te na maj te ćorel, aj pošukar nek phurederinel pe te ćerel ple vastencar odova so si šukar te bi ovelale te del odolese kolese valjani.

²⁹ Nisavo džungalo lafi te na ikljol andar e muja tumare, aj semo šukar bašo ćeripe odolesoro so valjani, te anel dindipe odolenđe save ašunen.

³⁰ Thaj ma dukhaven e Sumnale Đe e Devlesere, kolesa sijen štambilime bašo dive e inkalipnasoro.

³¹ Sako ćerkipe thaj xoljaripe thaj xoli thaj vika thaj akošipe e sakone džungalipnaja, nek oven dur tumendar.

³² A oven maškar tumende kovle, dindipasere, jertindoj jekh averese, sar so thaj o Devel ano Hristo jertinđa tumenđe.