Efesconenge 3 - Romski prevod Novog zaveta - Srbija

O Pavle kandela e Devlesere garavutnake

¹ Baše odova me sem, o Pavle, phandutno e Isus Hristoso baše tumenge e nadžangledevleserenge.

² Te eke ašunden bašo trinipe e dindipaso e Devlesoro savi si maje dindi baše tumenge,

³ kaj maje po phućardipe mothovđol e garavdini, sar so angleder hramonđum xarne,

⁴ kotar drabarindoj šaj te haljoven mlo penđaripe e Hristosere garavdinako,

⁵ savi ane aver generacije na sine mothovdini e manušengere ćhavenge, sar akana Đesa phućardilo lesere sumnale apostolenge thaj e profetonenge:

⁶ Kaj si e nadžangledevlesere khatanekustikutne thaj khatanetruputne thaj krisarutne lesere dindelafonenge ano Hristo Isuso andar o evangelium,

⁷ savese uljum kandino po dinipe e Devlesere dindipase, savi dindi maje po ćeripe lesere zorako.

⁸ Maje, e najciknese kotar e sa sumnale, dindilo pe akava dindipe te mothovav maškar e nadžangledevlesere birodino barvalipe e Hristosoro,

⁹ thaj kaj te rošalinav sarijenge ane soste si o trinipe e garavdinako kotar o bimeripe garavdine ano Devel, savo ćerđa sa andar o Isus Hristo,

¹⁰ kaj andar e Khanđiri akana te mothovel pe e šeruretnenge thaj e thagarutnenge ko badali butpobaro džandipe e Devlesoro,

¹¹ palo bimeripaso ćhinavdipe savi kerda ano Hristo Isuso amaro Devljutno,

¹² ane savo isiamen muklipe thaj pašipe ano kamipe andar o paćape an Leste.

¹³ Odolese tumen ruđinava te na bizorjavjon bašo mle belave bašo tumenge, save si tumari glorija.

¹⁴ Baše odova teljarđovava mle kočija anglal o Dad amare Devljutnesoro e Isus Hristosoro,

¹⁵ kolestar sako njamo ko badali thaj ki phuv isile plo anav,

¹⁶ kaj tumenge po barvalipe ple šalomipastar te del zor, te zorardon Đesa leseresa ano andruno manuš,

¹⁷ kaj o Hristo paćapnaja te thanardol ane vile tumare,

¹⁸ kaj te darhime thaj temeljime ano kamlipe, šajine te haljoven sarijencar e sumnalencar so si o buhlipe thaj o lunđipe, thaj o xoripe thaj ućipe,

¹⁹ thaj te pendžaren o kamlipe e Hristosoro savi nakhavela o gođipe, te bi pherđona sakona pheripnaja e Devlesereja.

²⁰ A Odolese savo šaj panda thaj pobuter majbut te ćerel katar odova so amen roda ja gndina, pe zor savi ćerela ana mende,

²¹ lese nek ovel glorija ane Khanđiri ano Hristo Isuso andar e sa generacije ano bimeripasoro bimeripe. Amin.