Efesconenge 2 - Romski prevod Novog zaveta - Srbija

Dindipnaja sem akharde ane jek Hristosoro trupo

¹ Thaj tumen save sena mule bašo ćerdo ćerdipe thaj bezeha tumare,

² ane save nekana phirđen po đi akale themeso, po knezo savo thagarel ano ajri, po đi savo akana deluini ane ćhave e opipeipasere,

³ maškar save thaj amen savore dživdinđam nekana pe mangipa amare trupesoro, ćerindoj kamipe e trupeso thaj gindipa, thaj sema pe natura ćhavore bare xoljinaće sar vi e aver;

⁴ A o Devel, savo si barvalo ane dindipa, bašo baro kamlipe plo savaja amen kamlja,

⁵ thaj amen, save injamle mule bašo bezeha, dživdininđa e Hristoja – dindipnaja sinjen ikalde –

⁶ Thaj Leja khatane dživdininđa thaj khatane sijinđa po badali ano Hristo Isuso,

⁷ te mothovel ane bimeripa save avena but baro barvalipe ple dindipasere laćhipnaja mamuj amende ano Hristo Isuso.

⁸ Kaj dindipnaja sijen ikalde andar o paćape; thaj odova nane tumendar, dindipe si e Devlesoro;

⁹ Na kotar e ćerdipna, te na bi ko ašarinela pes.

¹⁰ Kaj sinjam lesoro ćeripe, ćerde ano Hristo Isuso baše šukar ćerdipna, save o Devel anglal gatinđa kaj ane lende te phira.

¹¹ Odolese ićeren ane godi kaj tumen, save nekana po trupo nađangledevlesere so injen, akhardine nasunetipe kotar odola save akhardona trupeso sunetipe vastesa ćerdino,

¹² kaj injenle ane odova vakti bi Hristoso, cidimo kotar o khatanipe e Izrailjesoro thaj nađande ane xape sovlja dinde lafonengo, adžikeripe nanindoj, thaj bi e Devlesoro po them.

¹³ A akana ano Hristo Isuso, tumen save nekana injenle dur, uljen paše e Hristosere rateja.

¹⁴ Kaj Ov si šalom amaro, savo thaj e jekhen thaj e dujtonen phandlja ano jekh thaj peravđa o ulavipe savo ulavela, odova si dušmanluko,

¹⁵ ćhinavindoj trupeja pleja o kanuni lesere ćhinavdipenca thaj propisonencar, kaj solduj ćerđa ana korkoro peste ano jekh nevo manuš, ćerindoj šalom;

¹⁶ Thaj te šalominel e Devleja thaj e jekhen thaj e dujtonen ano jekh trupo trušuleja, mudarindoj o dušmanluko upro leste.

¹⁷ Thaj Ov avindoj džangljarda o šalom tumenge save sijen dur thaj odolenge save si paše.

¹⁸ Kaj andar Leste isiamen thaj e jekhune thaj e dujta pašipe premalo o Dad ano jekh Đi.

¹⁹ Ađahar, eke, nasijen maj avrune ni avune, aj sen khatanedizutne e sumnalencar thaj ćherutne e Devlesere,

²⁰ duvarime po temeli e apostolengo thaj e profetonengo, kaj si x'nzuno bar korkoro o Isus Hristos,

²¹ pe savo sa o ćerdipe, laćhe phandino, barjola ano hramo sumnalo ano Devljutno.

²² Ane saveste thaj tumen khatane duvarinena aso kher e Devlesoro ano Đi.