Efesconenge 1 - Romski prevod Novog zaveta - Srbija

Andripe

¹ O Pavle, apostoli e Isus Hristosoro po kamipe e Devlesoro, e sumnalenge save si ano Efes, thaj e paćavnenge ano Hristo Isuso:

² Bahtaripe tumenge thaj šalom kotar o Devel o Dad amaro thaj Devljutneso e Isus Hristoso.

Himna mukljaripasiri ano Hristo

³ Bahtardo o Devel thaj o Dad amare Devljutneso e Isus Hristoso, savo amen bahtarda ano Hristo sakone bahtaripnaja đesesa po badali,

⁴ sar so amen thaj alonđa ane Leste angleder o ćerdipe e themeso te ova sumnale thaj birumime anglo Leste, ano kamlipe,

⁵ anglalindoj amen pese ko leibe andar o Isus Hristo, po laćho ođipe ple kamipaso,

⁶ po ašaripe ple šalomipaso dindipe, saveja bahtarđamen ano Ćumudino,

⁷ ane kaste isiamen ikaldipe lesere rateja, jertipe e bezehengo po barvalipe lesere dindipnaja.

⁸ Sava barvalipnaja ćhorđa an amende ane sako bižajipe thaj džanipe,

⁹ mothovindoj amenge ple garavdipasoro kamipe, pe plo šukaripe savo anglal bićhalđa ane Leste,

¹⁰ bašo ćeripa e vahtesere pheripnase, kaj sa te phandel pe ano Hristo, odova so si po badali thaj so si pe phuv, ane Leste,

¹¹ ane savo thaj uljam kustikutne anglal bićhalde mamuj e irada Odolesi savo sa ćerel po phurederipe ple kamipaso,

¹² te ova po ašaripe lesere šalomnipase, amen save anglal paćajam ano Hristo,

¹³ an saveste thaj tumen, ašunindoj o lafi e čaćipnaso, o evangelium tumare ikalipnaso, thaj paćavindoj ane Leste, sena štambilime dindelafeja e Đesa Sumnalesa,

¹⁴ savo si zalgo amare kustipnaso, bašo ćedinipe e therdipnaso, po ašaripe lesere šalomnipase.

E Pavlesoro ašardipe thaj ruđutni vaš e paćamnenge

¹⁵ Odolese thaj me, ašundoj baše tumare paćapnase ano Devljutno Isuso thaj kamlipe mamuj sarijenge e sumnalenge,

¹⁶ na aćhovava te bahtarav tumenge liparindoj tumen ane mle ruđutna:

¹⁷ Kaj tumenge o Devel amare Devljutneso e Isus Hristoso, Dad gloripnaso, dinđa o Đi bižajipnaso thaj phućaripnaso te pendžaren le,

¹⁸ thaj majrošisarde jakha tumare vilesere te bi džanena ane soste si o adžikeripe lesere akharipnaso, thaj savo si barvalipe o šalomipe lesere kustikipaso ane sumnale,

¹⁹ thaj savo si bimerimo baripe lesere zorako pe amende save paća po ćeripe lesere zorale zoralipnase,

²⁰ savo ćerđa ano Hristo dživdisarindoj le andar e mule, thaj thanarđa pese pe laćhi rig po badali,

²¹ upral sarsavo šerutnipe, thaj thagaripe, thaj zor, thaj devljutnipe, thaj upral sarsavo anav so šaj te akharel pe, na semo an akava bimeripe, aj thaj ano avino;

²² Thaj sa telaćerđa telal e pre lesere, thaj Le ćhuta upral o sa bašo šero e Khanđirjakoro,

²³ savo si o trupo lesoro, pherdipe Odolesoro savo sa pherela ane sa.