Dujto e Solunjamnenge 3 - Romski prevod Novog zaveta - Srbija

Ulavdine phurederipa

¹ Majpalal, phraljalen, ruđinen tumen baše amende, kaj o lafi e Devljutneso sigo te buhljol thaj te glorisini pe sar thaj ke tumende;

² Thaj te inkalape kotar e bilaćhe thaj džungale manuša, kaj na mangena sare o paćape.

³ Aj paćavino si o Devljutno; Ov tumen ka zorarel thaj arakhel kotar o bižajutno.

⁴ A dandinape ano Devljutno baše tumende, te ćeren thaj kaj ka ćeren odova so tumenđe čhinavaja.

⁵ A o Devljutno mek opravini e vile tumare po kamlipe e Devlesoro thaj po trpipe e Hristosoro.

⁶ Ćhinavaja eke tumenge, phraljalen, ano anav amare Devljutnesoro e Isus Hristosoro, te durjaron kotar sako phral savo dživdinela birendone, a na po mothovdipe savo leljen amendar.

⁷ Kaj korkore džanen sar valjanena te dikhentumen pe amende, kaj na dživdinđam birendine maškar tumende,

⁸ ni pak badavake na xaljam ane nekaste maro, aj pharipnaja thaj munkaja, ćerindoj buti dive thaj raći, te na bi ovaja ko pharipe nekase tumendar;

⁹ Na sar te na ovel amen o thagaripe, aj kaj amen te da tumenđe bašo misal, te bi dikhljardona pe amende.

¹⁰ Kaj kana sinjamle ke tumende, akava tumenge ćhinavdam: Ako nesavo na mangela te ćerel buti, ma vi te xal.

¹¹ Kaj ašuna kaj nesave maškar tumende dživdinena birendone, na ćerena niso, a ane sa haminena pe.

¹² Odolese asavkenđe ćhinavaja thaj ruđina len ano Devljutno amaro Isuso Hristo kaj šalomime te keren buti a plo maro te han.

¹³ A tumenge, phraljalen, te na ovel phare šukaripe te ćeren.

¹⁴ Ako li ko na šunela o lafija amare ane akaja bićhalutni, odole semninen, thaj ma amalinen tumen leja, te bi ladžala;

¹⁵ Aj le ma dikhen sar dušmano, aj haljovinen le sar phrale.

Agoripasoro bićhaldo sastipe thaj bahtardipe

¹⁶ A korkoro o Devljutno e šalomnipaso mek tumenge del šalom sajekh thaj ane sako situacia. O Devljutno sarijencar tumencar!

¹⁷ Bićhalava sastipe mle vasteja e Pavlesereja, so si semno ane sako bićhalutni, ađahar hraminava:

¹⁸ Dindipe amare Devljutnesoro e Isus Hristosoro sarijencar tumencar. Amin.