Angluni e Timotejese 4 - Romski prevod Novog zaveta - Srbija

¹ A o Đi haljovine vakerela kaj ka ane palune vaktija ka crden pes nesave kotar o paćape ašundoj e đen e xoxajipnasere thaj o džanipe e bengesere,

² ano dujmujipe e xoxamnengo, kolesoro si mincope phabardino,

³ save čhinavena te prandon pes, thaj rodena aćhavdipe kotar o xape save o Devel ćerđa kaj te ašaripasa lena len o paćavne thaj odola save penđarde o čaćipe.

⁴ Kaj si sako ćerdipe e Devlesoro laćho thaj niso nane bašo frdipe kana lela pe ašaripnaja.

⁵ Kaj sumnarela pe e Devlesere lafeja thaj e ruđutnaja.

Laćho e Hristosoro kandutno

⁶ Akava phurederindoj o phralja, ka ove laćho kandino e Isus Hristoso, barjardo e paćapnesere lafonencar thaj laćhe džanipnaja savo thaj leljan.

⁷ A e melalendar thaj e babengere paramićendar citut lendar thaj ćer buti ano pherdo paćape.

⁸ Kaj e trupeso ćeripe bašo hari si labhino, a o pherdo paćape si labhino ano sa, poso ola isila lafidindipe akale dživdipasoro thaj e avutnesoro.

⁹ Akava si čaćino lafi thaj paćivalo sakone leipnase;

¹⁰ Kaj baše odova thaj ćeraja thaj ova ladžarde, kaj adžikerape ano dživdo Devel, savo si inkalutno sa e manušenge, ulavdine o paćavutne.

¹¹ Akava ćhinavdisar thaj sikljov.

¹² Nikoj te na teljarel klo ternipe, aj ov misal e paćavnenge ane lafija, ano dživdipe, ano kamlipe, ano ođi, ano paćape, ano khoslipe.

¹³ Džikote na avava arakh po drabaripe, kovljaripe thaj sikljope.

¹⁴ Ma aćhav o ašaruno dindipe ana tute savo tuće si dindo andar o anglalmothovdipe ćhivipnaja o vasta e phurederutnesere pe tute.

¹⁵ Akava sikljov, ane akava terđov, kaj o anglipe klo sikavel pe ano sa.

¹⁶ Arak pe tute thaj po džanipe, trajin ane odova; kaj ćerindoj akava, ka inkale thaj tut thaj odolen save šunena tut.