Angluni e Timotejese 3 - Romski prevod Novog zaveta - Srbija

Kotar o rašajipe

¹ Čaćino si o lafi: ako ko episkope mangela, laćho ćerdipe mangela.

² Aj o episkopo valjani te ovel bi manevako, jekh romnjakoro rom, haljovuno, gođaver, paćivalo, điađikerutno, kadari te sikavel;

³ Na matoro, na mudarutno, na zelenaši, aj laćheđeso, šalomkamuno, na lovengokamuno;

⁴ Savo ple ćhereja laćhe vastarela, isile kandine ćhavore sakone ašaripnaja;

⁵ A ako nesavo na džanela ple ćhereja te vastarinel, sar ka šaj te phurederinel pe baše Devlesiri Khanđiri?

⁶ Na nevotrušulimo, te na bi baripnela pe thaj perela ano krisipe e bengese.

⁷ A valjani te ovel le thaj laćho dikhipnasoro vakeripe kotar odola save si avrijal, te na bi perela ano lađipe thaj xoxavipe e bengesoro.

⁸ Ađahar thaj e đakonija valjani te oven paćivale, na dujemujengere, na save but mol pijen, na savo but mangel pese,

⁹ save isile garavdini paćapesi ane khoslo gndipe.

¹⁰ A thaj akala majanglal te kontrolinenpe, pa tegani te kanden, poso si bi manavakere.

¹¹ Ađahar thaj e romnja valjani te oven ašaripne, te na phukaven, haljovine, paćivane ano sa.

¹² E đakonija te oven roma jekhe romnjaće, save laćhe vastarena e čhavorencar thaj ple ćherencar.

¹³ Kaj save laćhe kandle, resena pese laćhi skala thaj baro tromalipe ano paćape ano Hristo Isuso.

Opipe e xoxamne sikljovipendar trubul te maretu

¹⁴ Akava tuće hraminav ađikerindoj kaj ka sigate avava ke tute;

¹⁵ Ako li zabitisajlem, te džane sar valjani te arakhetu ano kher e Devlesoro, koja si Khanđiri e dživde Devlesiri, direko thaj tvrđava e čaćipasiri.

¹⁶ Thaj hemčaće bari si garavdini e pherde paćapesiri: O Devel mothovdilo ano trupo, čačavda pe ano Đi, sikavdilo e phakalenđe, vakerđa pe e nađangledevleserenđe, paćajepe ano them, vazdisalo ane glorija.