Angluni e Timotejese 2 - Romski prevod Novog zaveta - Srbija

Kotar e ruđutni thaj arakhadipe e džuvljengoro

¹ Ruđinav, akana, anglal o sa te kerel pe ruđipna, ruđipe, mangipa, baxtaripe baše sa e manuša,

² bašo thagara thaj baše sa save si ano thagaripe, kaj polokho thaj šalomno dživdipe te dživdina ane sako pherdopaćape thaj paćivalipe.

³ Kaj si akava laćhe thaj kamle anglal o Inkalutno amaro Devel,

⁴ savo mangela kaj sa e manuša te inkalenpe thaj te aven ano penđaripe e čaćipeso.

⁵ Kaj jekh si Devel, thaj jekh maškarutno maškar o Devel thaj o manuša, manuš Hristos Isuso,

⁶ savo pes dinđa ano ćinipe baše sarijenđe, mothovdipe ane semnome vaktija,

⁷ bašo save sem me thodino vakerutno thaj apostoli – čaćipe vakerava ano Hristo, na xoxavava – sikamno e nađangledevleserengoro ano paćape thaj čaćipe.

⁸ Mangava, akana, kaj o roma te ruđinen pe ko sako than, vazdindoj e sumnale vasta bi e xolinako thaj dujegndipasoro.

⁹ Jekhune ađahar, thaj o romnja ane ličime šeja, ladžaja thaj paćivalipnaja te laćharen pe, na khuvdunanca, ni sumnakajesa, ni klejenca, ni kuć fostanjencar,

¹⁰ aj laćhe ćerdipnancar, sar so miazinela e romnjenge save mangle te kamlisarenpe e devleserepaćivalipase.

¹¹ E romni nek sikljol ano šalom sakone peravnipnaja;

¹² Aj e romnjake ni mekava te ovel sikamno, ni te thagarel e romeja, aj te ovel šalomni.

¹³ Kaj si o Adam ćerdo angluno, a napal e Eva;

¹⁴ Thaj o Adam ni xoxavdilo, a e romni xoxavdili, pa ćerdili bipaćamni;

¹⁵ Aj ka inkalel pe bijandipnaja e ćhavoren, te aćhile ano paćape thaj kamlipe thaj ano sumnalipe e paćavalipnaja.