Angluni e Solunjamnenge 5 - Romski prevod Novog zaveta - Srbija

Oven gati

¹ A e vaktonendar thaj ćhinade divesendar, phraljalen, na valjani tumenđe te hraminel pe;

² Kaj tumen korkore šukar džanen kaj ka o Dive e Devljutneso ka avel sar ćor ane raći.

³ Kaj kana vaćerena: Šalom si thaj arakhavdipe, tegani ka avel pe lende biadžikerune o mudaripe, sar e dukh pe khamni romni, thaj na ka našel.

⁴ Aj tumen, phraljalen, nasijen ano raćipe, kaj tumen odova Dive te arakhel sar ćor.

⁵ Kaj sen tumen sare ćhave e rošipasere thaj ćhave divesere; nasijam e raćakere ni e tunjarikakere.

⁶ Odolese ma te sova, sar thaj e avera, aj te ova džangavde thaj te ova bimate.

⁷ Kaj save sovena, raćate sovena, thaj save maćovena raćate maćovena.

⁸ A amen save sam ćhave e divesere te ova bimate thaj hurjavde ano oklopo e paćapesoro thaj e kamlipasoro thaj e kacigaja e adžikerune inkaldipase.

⁹ Kaj amen o Devel na čhinavđa baše bari xoli, aj te la o inkaldipe andar o Devljutno amaro o Isuso Hristo,

¹⁰ savo mulo baše amende te bi amen, ja te ova džangavde ja te sova, khatane lesa te dživdina.

¹¹ Odolese kovljardon udžiljune, thaj vazden jekh avre, sar so thaj ćerena.

Ulavdone ćhivipa sama

¹² Ruđina tumen eke, phraljalen, den ašaripe odolenđe save ćerena buti maškar tumende, thaj tumare anglathodinutnenđe ano Devljutno, thaj odolenđe save tumen sikavena,

¹³ thaj len te paćivalen but majbut kamlipnaja baše lengere ćerdipna. Dživdinen ano šalomipe maškar tumende.

¹⁴ Ruđina tumen eke, phraljalen, phurederinen e birendonen, kovljaren e hariođutnen, den inćardipe e bizoralen, oven bareođesere premalo sarijende.

¹⁵ Dikhen kaj nikoj te na irinel kase džungalipe bašo džungalipe; aj sajekh džan palo šukaripe, thaj maškar tumende thaj premalo sarijende.

¹⁶ Lošalen tumen sajekh,

¹⁷ ruđinen tumen bi ćhinavdipasoro,

¹⁸ pe sa ašarinen; kaj si akava o kamipe e Devlesoro baše tumende ano Hristo Isuso.

¹⁹ O Đi ma aćhaven,

²⁰ o profetipe ma peraven.

²¹ Sa phućljaren, e šukaripnastar ićeren tumen.

²² Kotar o džungalipe ane sako dikhipe duraren tumen.

Agoripaso bićhaldo sastipe thaj bahtardipe

²³ A korkoro o Devel e šalomnipaso te sumnarel tumen pherdine, thaj celo tumaro đi thaj ođi thaj o trupo kaj te arakhel pe bi o rumipe bašo avipe amare Devljutnesoro e Isus Hristoso.

²⁴ Paćavno si Odova savo tumen vičini, savo kaj odova thaj ćerela.

²⁵ Phraljalen, ruđinen tumen baše amende.

²⁶ Bićhalen sastipe sa e phraljenđe e sumnale ćumudipnaja.

²⁷ Dava sovel tumen e Devljutneja te drabarel pe akaja bićhalutni sa e sumnale phraljenđe.

²⁸ Dindipe amare Devljutnesoro e Isus Hristosoro tumencar! Amin.