Angluni e Solunjamnenge 4 - Romski prevod Novog zaveta - Srbija

Zorardipe ko sumnalipe

¹ A poangle, phraljalen, ruđina tumen thaj phurederina ano Devljutno Isuso, kaj sar so leljen amendar: sar tumen valjani te arakhen tumen thaj e Devlese te laćharen, kaj pana pobut te anglalinen.

² Kaj džanen save tumenđe sikavipa dinđam andar o Devljutno Isuso.

³ Kaj si akava kamipe e Devlesoro: o sumnalipe tumaro, te arakhen tumen kotar o rumipe,

⁴ thaj sako tumendar te džanel te ićeri plo trupo ano sumnalipe thaj ano paćivalipe,

⁵ a na ano zoralo mangipasoro haćaripe, sar thaj o nadžangledevlesere save na pendžarena e Devle;

⁶ Thaj kaj nikoj te na nakhavel thaj te na globinel ple phrale ane sa odova, kaj si o Devljutno irisarutno baše sa odova, sar so tumenđe thaj anglal vakerđam thaj mothovđam.

⁷ Kaj amen na vičinđa o Devel ano bikhoslipe, aj ano sumnalipe.

⁸ Savo, akana, frdela, na frdela e manuše aj e Devle, savo thaj dinđa ple Sumnale Đe tumenđe.

⁹ A kotar o phraloćumudipe na valjani tumenđe te hraminel pe, kaj sen korkore e Devlestar sikavde te ćumudinen tumen maškar peste,

¹⁰ kaj tumen odova thaj ćerena premalo sa e phralja pe sa e Makedonija. Aj ruđina tumen, phraljalen, kaj pana pobut te ćeren,

¹¹ thaj kaj tate te phurederinen tumen te dživdinen šalomno, thaj te dikhen tumare buća, thaj te ćeren tumare korkorune vastencar, sar tumenđe so čhinavđam;

¹² Kaj te arakhavdon paćivale premalo odola so si avrijal, thaj kaj tumenđe niso te na valjani.

Kotar e Hristoso avipe

¹³ Na manga eke, phraljalen, kaj tumenđe te na ovel bipenđardo so si odolencar save si mule, te ne bi tumen dukhavđona sar okola save nane len adžikeruna.

¹⁴ Aj te paćajam kaj o Isus mulo thaj dživdinisajlo, ađahar thaj ka vi o Devel odolen save si mule ano Isuso ka anelen Leja.

¹⁵ Kaj tumenđe akava mothovaja e Devljutnesere lafeja kaj amen save ovaja dživde kotar o avipe e Devljutnesoro, na ka resa odolen save kola si mule.

¹⁶ Kaj korkoro o Devel e čhinavdipnaja, e arhangelosere krleja thaj e Devlesere trubaja, ka huljel kotar o badali, thaj majanglal o mule ano Hristo ka dživdinisaren;

¹⁷ A napal amen e dživde save aćhovaja ka ova khatane lencar vazdime ane nuvere ano reslipe e Devljutnese ano ajri, thaj ađahar sajekh e Devljutneja ka ova.

¹⁸ Ađahar kovljaren jekh averen akale lafijencar.