Angluni e Solunjamnenge 3 - Romski prevod Novog zaveta - Srbija

¹ Odolese, na šajindoj maj te inćarel, arakhljam bašo laćhipe te aćhova korkore ane Atina,

² ta bićhalđam e Timoteje, e phrale amare thaj kandino e Devlesoro thaj kupaćerutne amare ano evangeliumo e Hristosoro, tumen te zorarel thaj tumen te vazdel ano paćape tumaro,

³ kaj nikoj te na xasarel pe ane akala bilaćhipa; kaj korkore džanen kaj adava amenđe anglalterđola.

⁴ Kaj kana sama pana ke tumende, amen phenđam tumenđe anglal kaj ka ovel amen bilaćhipa, thaj sar so džanen odova thaj ulo.

⁵ Baše odova thaj me, na šajindoj maj te inćerav, bićhalđum te džanav kotar o paćape tumaro, kaj tumen sar na zumavđa o zumavutno, ta kaj amari munka te ovel andodilipe.

⁶ A akana, kana amenđe o Timotej alo tumendar, thaj anđa amenđe šukar nevipa kotar tumaro paćavipe thaj o kamlipe, thaj kaj amendar sajekh kamljune denatumen godi, manglindoj te dikhen amen, sar thaj amen tumen.

⁷ Odolese tumencar kovljardilam, phraljalen, tumare paćapnaja ane sa amaro bilaćhipe thaj ćororipe.

⁸ Kaj akana sem dživde, kana tumen zorale terđovena ano Devljutno.

⁹ Kaj savo ašaripe šaj te mothova e Devlese baše tumende, bašo sa o lošalipa savesa lošalinape baše tumende anglal o Devel amaro?

¹⁰ Raći thaj dive majtatine ruđinape e Devlese te dikha e muja tumare thaj te phera odova so naćhola tumare paćapnase.

¹¹ A korkoro o Devel thaj o Dad amaro thaj o Devljutno amaro o Isus Hristo te bićhalel o drom amaro ke tumende.

¹² A tumen o Devljutno nek barvarel thaj te phreperel kamlipnaja jekhune premalo e averune thaj premalo sarijende, savi si thaj amari premalo tumende.

¹³ Kaj te zorarđon e vile tumare paćivale ano sumnalipe anglal o Devel thaj o Dad amaro kotar o avipe amare Devljutnesoro e Isus Hristosoro sa e sumnalencar leserencar. Amin.