Angluni e Solunjamnenge 1 - Romski prevod Novog zaveta - Srbija

Andripe

¹ O Pavle thaj o Silvan thaj o Timotej e Khanđirjaće e Solunskonake savi si ano Devel o Dad thaj o Devljutno Isuso Hristo: Dindipe tumenge thaj šalom kotar o Devel o Dad amaro thaj o Devljutno Isuso Hristo.

² Ašarinape e Devlese sajekh baše sa tumenđe liparindoj tumen ane ruđutna mle,

³ dindoj godi bićhinadine tumare ćerdipnasere paćapese, thaj bijanuno kamlipe, thaj sipeune adžikerinakoro ano Devljutno amaro Isuso Hristo anglal o Devel thaj o Dad amaro,

⁴ džanglindoj, phraljalen ćumudime e Devlestar, kaj sijen alosarde.

⁵ Kaj o evangeliumo amaro na mothovdilo pe tumenđe semo lafencar, aj vi ane zor thaj ano Đi Sumnalo, e pherde paćavipnaja, sar so džanen save sinjamle maškar tumende baše tumen.

⁶ Thaj tumen dikhljentumen pe amende thaj po Devljutno, lindoj o lafi ane bari belava e lošalipnaja e Đeso Sumnalesoro,

⁷ ađahar kaj uljen misal sarijenđe e paćavutnenge ane Makedonija thaj ane Ahaja.

⁸ Kaj kotar tumendar ašundilo o lafi e Devljutnesoro na semo ane Makedonija thaj ane Ahaja, aj vi ane sakoj than buljardilo o paćape tumaro ano Devel, ađahar kaj amenge nane trubuine so te vakera.

⁹ Kaj on korkore mothovena amendar sar amen tumen adžikerden, thaj sar kotar e idolja irinđen e Devlese, te kanden e dživde Devlese thaj e čaćunese,

¹⁰ thaj te adžikeren e Ćhave lesere e badalestar, save vazdinđa andar e mule, e Isuso, savo amen inkalda kotar e bari xoli savi avela.