Zabura 92 - Sabon Rai Don Kowa 2020

Zabura 92

Zabura ce. Waƙa ce. Domin ranar Asabbaci.

¹ Yana da kyau a yabi Ubangiji a kuma yi kiɗi ga sunanka, ya Mafi Ɗaukaka,

² don a yi shelar ƙaunarka da safe amincinka kuma da dare,

³ da kiɗin molo mai tsirkiya goma da kuma ƙarar garaya.

⁴ Gama ka sa na yi murna ta wurin ayyukanka, ya Ubangiji; na rera don farin ciki saboda ayyukan hannuwanka.

⁵ Ina misalin ayyukanka, ya Ubangiji, tunaninka da zurfi suke ƙwarai!

⁶ Mutum marar azanci ba zai sani ba, wawa ba zai gane ba,

⁷ cewa ko da yake mugaye suna girma kamar ciyawa kuma dukan masu aikata mugunta suna haɓaka, za a hallaka su har abada.

⁸ Amma kai, ya Ubangiji, za a ɗaukaka har abada.

⁹ Gama tabbatacce abokan gābanka, ya Ubangiji, tabbatacce abokan gābanka za su hallaka; za a watsar da dukan masu aikata mugunta.

¹⁰ Ka ɗaukaka ƙahona kamar na ɓauna; an zubo mai masu kyau a kaina.

¹¹ Idanuna sun ga fāɗuwar maƙiyana; kunnuwana sun ji kukan mugayen maƙiyana.

¹² Adalai za su haɓaka kamar itacen dabino, za su yi girma kama al’ul na Lebanon;

¹³ da aka daddasa a gidan Ubangiji, za su haɓaka a filayen gidan Allahnmu.

¹⁴ Za su ci gaba da ba da ’ya’ya a tsufansu, za su kasance ɗanye kuma kore shar,

¹⁵ suna shela cewa, “Ubangiji adali ne; shi ne Dutsena, kuma babu mugunta a cikinsa.”