Zabura 61 - Sabon Rai Don Kowa 2020

Zabura 61

Don mai bi da kaɗe-kaɗe. Da kayan kiɗi masu tsirkiya. Ta Dawuda.

¹ Ka ji kukata, ya Allah; ka saurari addu’ata.

² Daga iyakar duniya na yi kira gare ka, na yi kira yayinda zuciyata ta karai; ka bishe ni zuwa dutsen da ya fi ni tsayi.

³ Gama kai ne mafakata, hasumiya mai ƙarfi gāba da maƙiyi.

⁴ Ina marmari in zauna a tentinka har abada in sami mafaka a cikin inuwar fikafikanka. Sela

⁵ Gama ka ji alkawarina, ya Allah; ka ba ni gādo na waɗanda suke tsoron sunanka.

⁶ Ka ƙara kwanakin ran sarki, shekarunsa su kasance a zamanai masu yawa.

⁷ Bari yă yi mulki a gaban Allah har abada; ka sa ƙaunarka da amincinka su tsare shi.

⁸ Sa’an nan zan riƙa rera yabo ga sunanka in kuma cika alkawarina kowace rana.