Zabura 36 - Sabon Rai Don Kowa 2020

Zabura 36

Don mai bi da kaɗe-kaɗe. Ta Dawuda bawan Ubangiji .

¹ Akwai magana a cikin zuciyata game da zunubin mugu. Babu tsoron Allah a idanunsa.

² Gama a idanunsa yana ganin kansa wani abu ne wanda ya sha ƙarfi a gane ko ya ƙi zunubinsa.

³ Kalmomin bakinsa mugaye ne da kuma ruɗu; ya daina zama mai hikima da yin alheri.

⁴ Ko a kan gadonsa ma yana shirya mugunta; yakan sa kansa ga aikata zunubi kuma ba ya ƙin abin da ba shi da kyau.

⁵ Ƙaunarka, ya Ubangiji, kan kai sammai, amincinka har sararin sammai.

⁶ Adalcinka yana kama da manyan duwatsu, hukuncinka kamar zurfi mai girma. Ya Ubangiji, kana lura da mutum da dabba.

⁷ Ina misalin ƙaunarka marar ƙarewa! Mutane manya da ƙanana kan sami mafaka cikin inuwar fikafikanka.

⁸ Suna biki a yalwar gidanka; kakan ba su sha daga rafin farin cikinka.

⁹ Gama a gare ka akwai maɓulɓular rai cikin haskenka mukan ga haske.

¹⁰ Ka ci gaba da ƙaunarka ga waɗanda suka san ka, adalcinka ga masu gaskiyar zuciya.

¹¹ Kada ka bari ƙafar mai girman kai yă fāɗa mini, ko hannun mugu ya kore ni.

¹² Dubi yadda masu aikata zunubi suka fāɗi, a zube, ba za su kuwa iya tashi ba!