Zabura 26 - Sabon Rai Don Kowa 2020

Zabura 26

Ta Dawuda.

¹ Ka nuna rashin laifina, ya Ubangiji, gama na yi rayuwa marar zargi; Na dogara ga Ubangiji ba tare da kaucewa ba.

² Ka jarraba ni, ya Ubangiji, ka kuma gwada ni, ka bincike zuciyata da tunanina;

³ gama ƙaunarka kullum tana a gabana, kuma ina cin gaba da tafiya a cikin gaskiyarka.

⁴ Ba na zama tare da masu ruɗu, ko in yi tarayya da masu riya;

⁵ na ƙi jinin taron masu aikata mugunta na ƙi in zauna tare da mugaye.

⁶ Na wanke hannuwana cikin rashin laifi, ina yawo a bagadenka Ya Ubangiji,

⁷ ina shelar yabonka da ƙarfi ina faɗin dukan ayyukanka masu banmamaki.

⁸ Ina ƙaunar gidan da kake zama, ya Ubangiji, wurin da ɗaukakarka ke zaune.

⁹ Kada ka ɗauke raina tare da masu zunubi raina tare da masu son yin kisankai

¹⁰ waɗanda akwai mugayen dabaru a hannuwansu, waɗanda hannuwansu na dama suna cike da cin hanci.

¹¹ Amma na yi rayuwa marar zargi; ka cece ni ka kuma yi mini jinƙai.

¹² Ƙafafuna suna tsaye daram; cikin taro mai girma zan yabi Ubangiji.