Zabura 20 - Sabon Rai Don Kowa 2020

Zabura 20

Don mai bi da kaɗe-kaɗe. Zabura ta Dawuda.

¹ Ubangiji ya amsa maka sa’ad da ka yi kira cikin wahala; bari sunan Allah na Yaƙub yă kiyaye ka.

² Bari yă aiko maka da taimako daga wuri mai tsarki yă kuma ba ka gudummawa daga Sihiyona.

³ Bari yă tuna da dukan sadakokinka yă kuma karɓi hadayunka na ƙonawa. Sela

⁴ Bari yă biya maka bukatan ranka yă kuma sa dukan shirye-shiryenka su yi nasara.

⁵ Za mu yi sowa ta farin ciki sa’ad da ka yi nasara mu kuma ɗaga tutotinmu a cikin sunan Allahnmu. Bari Ubangiji yă biya maka dukan bukatunka.

⁶ Yanzu na san cewa, Ubangiji yakan cece shafaffensa. Yakan amsa masa daga samansa mai tsarki da ikon ceto na hannun damansa.

⁷ Waɗansu sun dogara a kekunan yaƙi waɗansu kuma a dawakai, amma mu, mun dogara a cikin sunan Ubangiji Allahnmu.

⁸ Za a durƙusar da su, su kuma fāɗi, amma mu za mu tashi mu tsaya daram.

⁹ Ya Ubangiji, ka ba da nasara ga sarki! Ka amsa mana sa’ad da muka yi kira!