Zabura 130 - Sabon Rai Don Kowa 2020

Zabura 130

Waƙar haurawa.

¹ Daga cikin zurfafa na yi kuka gare ka, ya Ubangiji;

² Ya Ubangiji, ka ji muryata. Bari kunnuwanka su saurara ga kukata ta neman jinƙai.

³ In kai, ya Ubangiji, za ka lissafta zunubai, Ya Ubangiji, wa zai tsaya?

⁴ Amma tare da kai akwai gafartawa, saboda haka ake tsoronka.

⁵ Zan jira Ubangiji, raina zai jira, kuma a cikin maganarsa na sa zuciyata.

⁶ Raina na jiran Ubangiji fiye da yadda mai tsaro yakan jira safiya, fiye da yadda mai tsaro yakan jira safiya.

⁷ Ya Isra’ila, sa zuciya ga Ubangiji, gama tare da Ubangiji akwai ƙauna marar ƙarewa kuma tare da shi akwai cikakkiyar fansa.

⁸ Shi kansa zai fanshi Isra’ila daga dukan zunubansu.