तीतुस 3 - Sirmouri

मसीही चाल-चल़्ण

¹ लोगो कैई शो चिते करा, के हाकमों अरह् अधिकारी के अधीन रंह्, अरह् तिनकी अज्ञाँ माँनों, अरह् ऐक नाँम आच्छ़ै काँम-काज़ कर्णो खे तैयार रंह्,

² कोसी बदनाँम ने करे, झगड़ू ने बंणें; परह् नरंम सभाव के हों, अरह् बादे आदमी की गईलो बह्ड़े निम्ताई-गरबाई शे रंह्।

³ किन्देंखे के आगे आँमें भे बै-अक्ले, अरह् अज्ञाँ ने माँनणों वाल़े थिऐ, धोखे अरह् ऊकी हिछ़या की सूख-विलास के कर्जदार थिऐ, बईर भाव, अरह् डाह-जल़ंन कर्णो दा जीवन बिताँव थिऐ, अरह् ओकी दे शंगाँव थिऐ, अरह् ओकी शो बईर करह् थिऐ।

⁴ परह् जबे अमाँरें मुँक्त्ति कर्णो वाल़े पंण्मिश्वर की कृपा अरह् आदमी गाशी तिनका प्यार पर्गट हुआ,

⁵ तअ तिन्ऐ अमाँरी मुँक्त्ति कराऐ; अरह् ऐजो अमाँरे धर्म की काँम-काज़ के जाँणें ने, जुण्जे आँमें आपु करे, परह् तिनकी दया-रंय्म के जाँणें नुंऐं जन्म के नहाँण-नहाँणों अरह् पबित्र-आत्त्मा के जाँणें नुंऐं बणाऐं गुऐ।

⁶ तिन्ऐं अमाँरी मुँक्त्ति देणों वाल़े यीशू मसीया के जाँणें आँमों गाशी बैजाऐ आशीष के बर्षा करी।

⁷ जिन्दे लई आँमें तिनकी कृपा शे पंण्मिश्वर की नंजरी दे बै-कसूर बंणियों, अमर हणों के जीवन के हंकदार बंणों।

⁸ ऐजी बात साच्ची असो, अरह् हाँव ऐशो चहाँऊ के तू ईनू बातों के बारे दो दीड़-हिम्मत करियों बुले, ईन्देंखे के जिन्ऐं पंण्मिश्वर गाशी बिश्वाष करा, के भले-भले काँम-काज़ दा लागे रंहणों का ख्याल थुऐ। ऐजी बातो भली अरह् आदमी के फाय्दे की असो।

⁹ परह् मुरूख्ता के बाद-विबाद, अरह् पीढ़ियों, अरह् बिरूध अरह् झगड़े जू ऋषी-मूसा खे भेटे गुऐ अज्ञाँ-निय्म के मुँताबिक असो, तिन्दे शा तू बंचियों रूऐ; किन्देंखे के तिन्देका किऐ फल़ ने आथी, से बै-कार असो।

¹⁰ कोसी चुगलियारा ऐकी-दूई बई सम्झाऐ-बुजाऐयों तेस कैई शा दुर्का रंह्,

¹¹ ऐजो जाँणियों के ऐष्णा आदमी भट्की रूवा, अरह् आपु-आप्खे कसूरबार बंणियों पाप करह्।

आखरी की अज्ञाँ

¹² जबे हाँव ताँव कैईं भाऐ-अरतिमास, अरह् भाऐ-तुखिकुस डेयाल़ुबा, तअ मुँह कैईं निकुपुलिस नंगर दी आँणों की कोशिष करे, किन्देंखे के मुँऐं तेथै हेंऊँदो काट्णों का ईरादा करी थुवा।

¹³ जेनास-बकील, अरह् भाऐ-अपुल्लोस खे तिनकी बाटो-हाड्णों खे जे किऐ तिनू जरूरत हों, तअ तिनकी पुरी मद्त करे; जू तिनके कियों ही चींजो के कंम्मी ने हों।

¹⁴ अमाँरे लोग भे जरूर्तो पुरी कर्णो खे आच्छ़ी काँम-काज़ दो लागो रंहणो शिखो, जू नि-षफल़ ने रंह्।

¹⁵ मेरे बादे साथी का ताँव्खे नमंष्कार। जू बिश्वाष के जाँणें आँमों आरी प्यार करह्, तिनखे भे नमंष्कार। तुँओं गाशी कृपा हंदी रंह्।