तीतुस 2 - Sirmouri

आछे सभाव खे आच्छ़ी शिक्क्षा

¹ परह् तू ऐशी बातो बुलिया करह्, जू आच्छ़ी शिक्क्षा ज़ूगी हों।

² मतल्व बुड़े मरोद् सकन्नै, धीरज-बाँन, अरह् आपु आप्णे बष दे रंह्; तिनका बिश्वाष, प्यार अरह् धीरज-सबैर पाका हों।

³ तेष्णी ही बूड़ी तिरंई का चाल-चल़्ण भे पबित्र लोगो जेष्णाँ हुआ चेंई; से बदी लाँणों वाल़ी, अरह् पिय्कड़ ने हई चेंई, परह् आच्छ़ी बातो शिखाँणों वाल़ी हई चेंई

⁴ जू से जवाँन तिरंई खे शिक्क्षा देंदी रंह्, के आप्णे घरवाल़े अरह् नहाँन्ड़िया शो प्यार करह्;

⁵ अरह् से झ़ूक्की-शियाँगी अंदी ने हों, से पत्ति-बरत्ता, अरह् आप्णे घरह् की आच्छ़ी काँम-काज़ कर्णो वाल़ी, भली, अरह् आप्णे-आप्णे घरवाल़े के बंष दी रंहणों वाल़ी हों, जू पंण्मिश्वर के बचन की नीदया ने हों।

⁶ तेष्णें ही जवाँन मरोद् भे सम्झाया करह्, के से भे झ़ूकै-शियाँगी अंदे ने हों।

⁷ बादी बातो दे आपु-आप्खे भले काँम-काज़ खे ऐक नंमुना बंणो। तेरी शिक्क्षा दी सफाऐ, गम्बीरता,

⁸ अरह् ऐशी अछाई हऐं चेंई, के कुँऐं तिन्देखे बुरो ने बुली सको, जिन्दे लई बिरूध कर्णो वाल़े आँमों दी बंदी लाँणों का मुका ने भेंट्णों गाशी सरमाँऐ ज़ाँव।

⁹ दास, दासी, सम्झाँव के आप्णे-आप्णे स्वामी-माँलिक के बंष दी रंह्, अरह् बादी बातो दे तिनू खुशी थंह्, अरह् पाछू फिरियों तिनखे जबाब ने दियों।

¹⁰ चोरी चलाकी ने करे, परह् हर-तरह् शे बिश्वाष दे नींक्ल़ै रंह्, अरह् से बादी बातो दे अमाँरे छूट्कारा देणों वाल़े पंण्मिश्वर की शुभा बड़ाँव।

¹¹ किन्देंखे के पंण्मिश्वर की सेजी कृपा पर्गट असो, जू बादे आदमी खे छुट्कारे के जाँणें असो।

¹² अरह् आँमों खे चिताँव्णी दियों, के आँमें मुँरूख्ता अरह् संईसारी की लाल़्चो शा मंन बद्ल़ियों ऐसी ज़ूगौ दे द्रिडता, धर्म अरह् भक्त्ति शा जीवन बिताँव;

¹³ अरह् तेसी धन्यबाद के भुर्षें दे मतल्व आप्णे बड़े पंण्मिश्वर अरह् छुट्कारे देणों वाल़े प्रभू यीशू मसीया कि बड़ियाऐं के पर्गट हंणों की ताक दे रंह्।

¹⁴ जिन्ऐं आपु-आप्खे अमाँरी ताँईऐं देऐ दिता, के आँमें हर प्रकार के पाप-अ-धर्म शे छुढ़ोऐ दियों, अरह् शुद्ध करियों आप्खे ऐक ऐशे लोग बाँणों, जू भले-भले काँम-काज़ खे तैयार रंह्।

¹⁵ आप्णें बादे हंकधिकार आरी ऐजी बातो बुल, अरह् सम्झा, अरह् शिखाँदा रंह्। जिन्दें लंई कुँऐं ताँव्खे छोटा ने जाँणों।