प्रकाशितवाक्य 9 - Sirmouri

¹ जबे पाँचवें स्वर्गदूत्ते रंणशिंगें-कनाँल़ी फूकरी, तअ तबे मुँऐ स्वर्गो शा धर्ती गाशी ऐक तारा च़ूटा अंदा देखा, अरह् तैस्खे अथाह् कुँड की ताल़ी-कुँन्जी देई गई।

² तेने अथाह् कुँड खुला, अरह् तेसी कुँड शा भाठो का जिया धुवाँ नींक्ल़ा, अरह् तेसी कुँड के धुऐं के जाँणें सुरूज अरह् बागुर ईनाँरखे हुऐ।

³ तेसी धुऐं के जाँणें धर्ती गाशी थाढ़ै निक्ल़े, अरह् तिनखे धर्ती के जिऐ बीच्चू की शँक्त्ति देई गई।

⁴ तिनखे बुलो गुवो थियो, के ना धर्ती की घास, ना किऐ हरियाल़ी, ना कोसी डाल़ो का नुकसाँन करे, सिर्फ तिनू आदमी का नुकसाँन करे, जिनकी माँथे गाशी पंण्मिश्वर की छाप ने आथी।

⁵ तिनखे लोगो माँर्णो का तअ ने, परह् पाँच भीने तोड़ी पीड़-बेदणीं देणों का हंक-अधिकार दिया गुवा: अरह् तिनकी पीड़-बैद्णीं ऐशी थी, जेष्णी बीच्चू के डंक-झ़ाह्टी मार्णो लई आदमी के हों।

⁶ तिनू देसे आदमी मऊँत्त जुह्ले परह् तिनू मंऊँत्त ने भेटो; अरह् मर्णो की हिछ़या कर्ले, अरह् मंऊँत्त तिन कैई शी भागी लागली।

⁷ सेजे थाढ़ै लड़ाई खे तैयार करे अंदे घोड़े जेष्णे थिऐ, अरह् तिनके मुँढों गाशी जैष्णें सुन्नें के मुँकुट-ताज थिऐ; अरह् तिनके मुँहों आदमी के जैष्णें थिऐ।

⁸ तिनके बाल़ तिरंई के बाल़ों जैष्णें अरह् दाँद शेरो के जिऐं थिऐ।

⁹ तिन्ऐं लोंहे के जिऐ संजुवें बाँम्बि थुऐ थिऐ; अरह् तिनकी पाखो के गूँह्ज तेष्णी थी, जेष्णाँ रंथह् अरह् बैजाऐ घोड़े का जू लड़ाई दे बिच़्ड़ो थिऐ।

¹⁰ तिनकी लीघह् बीच्चू की जेई थी, अरह् तिनके डंक-झ़ाह्टी बीच्चू की जेई, अरह् तिनखे पाँच भीने तोड़ी आदमी खे दु:ख बैद्णीं देणों की शक्त्ति भेटी रंऐ थी, जुण्जी तिनकी लीघह् दे थी।

¹¹ अथाऐं कुँड का दूत्त तिनका राजा थिया; तेस्को नाँव इब्रानी भाषा दो अबद्दोन, अरह् यूनानी भाषा दो अपुल्लयोन थियो।

¹² आगली बिबत् तअ बिती गऐ, देखो, ऐबे ईन्दें पाछी दो बिब्त्ति हजो आँणों वाल़ी असो।

¹³ जबे छ़ठ्वें स्वर्गदूत्ते रंणशिंगे-कनाँल़ फूकरी तअ सुन्नें की बैदी पूजों जू पंण्मिश्वर के सहाँम्णें असो, तिन्देके शिंगो मुँझ़्शी मुँऐ ऐशी गूँह्ज शुँणीं,

¹⁴ जू छठे स्वर्गदूत्त खे जेने रंणशिंगों-कनाल़ फूकरी थी, तैस्खे ऐजी अज्ञाँ दिती, के “बड़ी नंदी फ़ूरात दे जुण्जे चार स्वर्गदूत्त, बाँनें अंदे असो, तिनू तैख्णी अजाद करी दिते।”

¹⁵ तिनू चारे स्वर्गदूत्त खुली दिते, जुण्जे तेसी बख्ते, अरह् तेसी देसे, अरह् भींन्नै, अरह् साल्ह खे आदमी का ऐक च़ीज़ा हिस्सा माँरी देणों खे तैयार करी थुऐं थिऐ।

¹⁶ मुँह कैई बुलो गुवो, के घोड़शवारों के फोऊँजी की गिनत्ती बीष करोड़ असो।

¹⁷ मुँऐं दर्शण दे घोड़े अरह् तिनके ऐशे अशवार देखें, जुण्जे तिनू गाशी बईठे अंदे थिऐ, जिनके संजूवें आग, के जैष्णें लाल, धूम्रकाँन्त्त, अरह् गंन्धक जैष्णें पीऊँल़े रंग के थिऐ; घोड़े के मुँढों सिंहों शेरों के जिऐ थिऐ, अरह् तिनके मुँहों शी आग गंन्धक अरह् धुवाँ नींकल़्दा लागा थिया।

¹⁸ तिनके मुँह शी निकल़्दी रंई च़ीन मुँरी—आग, गंन्धक, अरह् धुऐं शी ऐक च़ीज़ा हिस्सा आदमी नाँष हऐ गुऐ।

¹⁹ किन्देंखे के तिनू घोड़े की शक्त्ति तिनके मुँह अरह् लीघह् दे थी; ईन्देंखे के तिनकी लीघह् शंगाव जिऐं थिऐ, अरह् तिनू लीघह् दे मुँढों भे थिऐ, अरह् तिन्दी ही लई से बैद्णी भे लुवाँव थिऐ।

²⁰ ओके आदमी जू तियों मूँरी लई ने मँरी थी, तिन्ऐ आप्णी हाथों के करे अंदे काँम-काज़ शा आप्णा मंन ने बद्ल़ी, के दुष्ट-आत्त्मा की, हजो सुन्नें अरह् चाँदी अरह् पीतल अरह् पात्त्थर अरह् काठ की मुर्त्तियों की पूजा ने करह्, जू ना देख्दी, अरह् ना शुँण्दी, अरह् ना से आगु हाँड्दी;

²¹ अरह् जू खूँन, अरह् जादू-टूँणें, अरह् चुरी-जारी अरह् आप्णीं करी अंदी चुरियों खे भे तिन्ऐ पस्तावा ने करी थंई थी।