प्रकाशितवाक्य 17 - Sirmouri

बड़ी बैष्या अरह् बुणेंर

¹ तबे बैलुऐ लई सात्त स्वर्गदूत्तों मुँझ्शे ऐकी ऐ आऐयों मुँखे बुलो, “ईथे आओ, हाँव तुँओं कैई शी सेजी माँनी अंदी बड़ी बैष्या जियों खे सजा आगे ही तैयार असो सेजी तुँओं कैई शी देखाऊँबा, जुण्जी आगे ही बैजाऐ पाँणी गाशी बऐठी रंऐ

² जियाँरी गईलो धर्ती के राजा लोगे कू-कर्णी बिचका-काँम करी थुऐ; अरह् धर्ती दे रंहणों वाल़े लोगे तियारें कू-कर्णी बिचका-काँम अरह् सूरो लई माँच़ी रूऐ थिऐ।”

³ तबे तेने मुँह पबित्र-आत्त्मा शा जाँगल़ों दा नींयाँ, अरह् मुँऐ लाल रंग को बुँणेंर गाशी जू नीदया-चुगली के नाँमों लई भरो अंदो थियों, अरह् जेथ्के सात्त मुँढों थिऐ, अरह् दषं शिंगो थिऐ, तेथै मुँऐं ऐक तिरंऐंं आपु बऐठी अंदी देखी।

⁴ तियों तिरंई ऐ शागो के बतिया के रंगों के जैष्णें खोट्णों बाँम्बी थुऐ थिऐ, अरह् से सुन्नें अरह् किमम्त्ती मंणी अरह् मोत्ती के गुंहणें लेई सज्जी-धज्जी अंदी थी, अरह् तियाँरे हाथो दा ऐक सुन्नें का बैलुवा थिया जू शंगाऊँणी चीजो शा अरह् कू-कर्णी बिचका-काँम की अशुद्ध चींजो शा भरा अंदा थिया।

⁵ तियाँरे माँथे गाशी ऐजो नाव लिखी थो थियों: “भेद्; बड़ा बेबीलोन धर्ती की बैष्याँवों अरह् शंगाऊँणी चींजो के माँता, अरह् शंगाऊणीं चीजों के जननी थी।”

⁶ मुँऐ देखो, के सेजी तिरंऐं पबित्र लोगो अरह् मसीया प्रभू यीशू के लह्ऊँ के गुवाह्-शाज़्त्त को लह्ऊँ पीणों लई माँचीं अंदी देखी; तियों देखियों मेरे तोरबाँणच़ूटें।

⁷ तबे स्वर्गदूत्ते मुँखे बुलो, “तेरे तोरबाँण कैई च़ूटे? हाँव ईयो तिरंई अरह् तेथू बुँणेंर को, जिन्दे गाशी ऐ अशवार असो, अरह् जेथ्के सात्त मुँढों अरह् दष शींगो असो, ताँव कैई तिन्दें का भेद् बुलू।

⁸ जुण्जों बुँणेंर तुँऐं देखो, से आगे तअ थियों, परह् ऐबे ने से आथी, अरह् अथाह् कुँड शो नीक्ल़ियों नाँष दो पड़्दो, अरह् धर्ती दे रंहणों वाल़े जिनके नाँव संईसारी की उत्पत्ति के बख्त्तो शे जीवन की कताबे दे लिखी ने थई, से ऐथू बुँणेंर की ऐजी दंषा देखियों, के आगे थियों अरह् ऐबे ने आथी, अरह् से हजो आँदों, तबे तिनके तोरबाँण च़ूट्दे।

⁹ तियों बुद्धी खे जिन्दा ज्ञाँन असो, ऐजा ही मोंक्का असो: सेजे सात्त मुँढों सात्त धारंह् असो, जिन्दे गाशी सेजी तिरंऐंं बऐठी रंऐ।

¹⁰ ऐजे सात्त राजा भे असो, पाँच तअ हऐ गुऐ, अरह् ऐक हेभी असो, अरह् ऐक हेभी तोड़ी आऐ ने रंई, अरह् जबे आला तअ किऐ बख्त्तो तोड़ी रंह्दा भे जरूरी ही असो।

¹¹ जुण्जो बुँणेंर आगे थियों, अरह् ऐबे ने आथी, से आपु आठ्वाँ राजा असो, अरह् ईनू सात्तों राजा मुँझ शा ऐक हुआ, अरह् नाँष दा पड़्ला।

¹² जुण्जे दष शीगों तुँऐं देखे, से दष राजा असो, जिनखे हेभी तोड़ी राज्य ने भेंटी रंई, परह् तेथू बुँणेंर आरी ऐगड़ी खे राजे का जिया हंक-अधिकार पाँदें।

¹³ से बादे ऐक मंन हले, अरह् ऐ आप्णी-आप्णी शक्त्ति अरह् हंक-अधिकार तेथू बुँणेंर खे देले।

¹⁴ से छैल़्टे आरी लड़्दे, परह् छैल़्टा तिन शा जींत्ती ज़ाँदा, किन्देंखे के से प्रभूओं का प्रभू, अरह् राजाओं का राजा असो, अरह् जू बईदे अंदे, अरह् चूणें-छाँटे अंदे अरह् बिश्वाषी असो, से तेस्की गईलो असो; से भे राज्य पाँदें।”

¹⁵ तबे तेने मुँखे बुलो, “जुण्जो पाँणी तुँऐं देखो, जिन्दे गाशी बैष्या बऐठी अंदी असो, से तअ लोग अरह् भीड़ अरह् जात्ती-जात्ती के भाषा असो।

¹⁶ जुण्जे दष शींगों तुँऐं देखे, से अरह् बुँणेंर अरह् बैष्या आरी बईर कर्ले, अरह् तेथू लाचार अरह् नाँगी करी देले, अरह् तेथू को माँस खाऐ देले, अरह् तेथू आगी दो जल़ाऐ देले।

¹⁷ किन्देंखे के पंण्मिश्वर तिनके मंन दो ऐजो पाऐ देला, के से तिनकी हिछ़या पुरी करह्, अरह् जबे तोड़ी पंण्मिश्वर के बचन पुरे ने हुऐ ताँव-तोड़ी ऐक मंन हऐयों आप्णें-आप्णें राज्य तेथू बुँणेंर खे देऐ दियों।

¹⁸ सेजी तिरंऐंं, जियों तुँऐं देखी थी, से बड़ा नंगर असो, जू धर्ती के राजाओं गाशी राज्य करह्।”