प्रकाशितवाक्य 16 - Sirmouri

पंण्मिश्वर के रोष के सात्त बैलुऐ

¹ तबे मुँऐ देऊँठी मुँझ्शी ऐक जुराल़ी धाव तिनू सात्त स्वर्गदूत्तों का स्वागत्त् कर्दे शुणाँई दिता: ज़ाओ! पंण्मिश्वर के रोष के सात्ते बैलुऐ धर्ती गाशी पेरी दियों।

² ईन्देंखे आगले स्वर्गदूत्त ऐ ज़ाऐयों आप्णा बैलुवा धर्ती गाशी पेरी दिता। जिन्दें का नंतिजा ऐजा हुवा, तिनू आदमी ऐ, जिनू गाशी तेथू खराब-खाऊरे बुँणेंरो की छाप-मुँहर थी, अरह् जुण्जे तेथू खाऊरे बुँणेंरो की मुर्ती के पूजा करह् थिऐ, तिन्दे फोड़े-दु:ख्णें फाटे।

³ दुज़े स्वर्गदूत्ते आप्णा बैलुवा समुँन्द्र दा पेरा, अरह् समुँन्द्र मंरे अंदे आदमी के लह्ऊँ जेष्णाँ बंणी गुवा, अरह् समुँन्द्रो का ऐक नाँम जींव मँरी गुवा।

⁴ च़ीज़े स्वर्गदूत्ते आप्णा बैलुवा नंदी अरह् पाँणी के फट्वाँणी गाशी पेरा, अरह् से लह्ऊँ बंणी गुवो।

⁵ तबे मुँऐं बादे पाँणी के हाकम स्वर्गदूत्त ऐजो बुल्दे शुँणों: “हे पबित्र, जू असो, अरह् जू थिया, तू नीयाँईच़ू असो, अरह् तुँऐं ऐजा नियाँव करा।

⁶ किन्देंखे के तिन्ऐ पबित्र लोगो अरह् ऋषियों को लह्ऊँ बुवाओं थियो: अरह् तुँऐं तिन कैई शो लह्ऊँ पियाओं; किन्देंखे के से ईन्दी ज़ूगै असो।”

⁷ तबे मुँऐं बैदी पूजों शी ऐजी गूँह्ज शुँणीं: “होर, हे सर्ब-शक्त्तिमाँन प्रभू पंण्मिश्वर, तेरे फऐंस्ले ठीक अरह् साच्चे असो।”

⁸ चौऊथे स्वर्गदूत्ते आप्णा बैलुवा सुर्जो गाशी पेरा, अरह् तिन्दें लई आदमी फुक्णों खे तेस कैई हंक-अधिकार दिता गुवा।

⁹ ईन्देंखे आदमी तियों बैजाऐ गर्मी शे ऊबल़ियों जल़ी गुऐ, अरह् से पंण्मिश्वर के नाँव शी तिनू बादी बिब्त्ती-ओब्ल़ी गाशी हंक-अधिकार असो, से श्राप देदें लागे, से पसतावा करियों पंण्मिश्वर की बड़ियाऐ कर्णो खे भाजी गुवे।

¹⁰ पाँचवें स्वर्गदूत्ते आप्णा बैलुवा तेथू बुँणेंर के सिंगाँस्ण गाशी पेरा, अरह् तेथ्के राज्य गाशी ईनाँरो पड़ो। अरह् लोग बैद्णी-पीड़ो के माँरे आप्णें-आप्णें दाँदों की च़ुरी च़ाक्दें लागे,

¹¹ बैद्णी-पीड़ो अरह् दोख्णें के कारण से स्वर्गो के पंण्मिश्वर खे श्राप देंदे लागे, से आप्णें कू-कर्णी शा पसतावा कर्दे भाजी गुवे।

¹² छठवें स्वर्गदूत्ते आप्णा बैलुवा बड़ी नंदी फरात्त गाशी पेरा, अरह् तिन्दे को पाँणी शुक्की गुवो, के पुर्बो दिशा के राजाओं खे बाट तैयार हंऐ ज़ाँव।

¹³ तबे मुँऐ तेसी बड़े अजंगर के मुँह शो, अरह् तेथू बुँणेंर के मुँह शी, अरह् तेसी झूठे ऋषियों के मुँहों शी च़ींन अशुद्ध आत्त्मा मिढके जिऐ नीकल़्दे देखे।

¹⁴ से ऐजी दुष्ट-आत्त्मा असो, जुण्जी चींन-नीशाँणी देखाँदें संईसारी धर्त्ती के बादे राज्य खे सर्ब-शक्त्तिमाँन पंण्मिश्वर के तेसी नियाँव के देसो खे लड़ाई-ज़ूद्ध कर्णो खे कठे करह्।

¹⁵ “चित्ते थुऐ: हाँव चोर जेष्णाँ आँदा! भागोईत असो, सेजा जू बीऊँजी रंह्, अरह् आप्णें खोट्णों के च़क्क्षी करह्, के हाँव लोगों के सहाँम्णें नाँग्गी हऐयों शर्मिन्दा ने हंऊँ।”

¹⁶ अरह् तिन्ऐ तिनू तेसी जागे दे कठे करे, जिन्देंखे इब्रानी भाषा दो हरमगिदोन बुली।

¹⁷ सात्तवें स्वर्गदूत्तें आप्णा बैलुवा बागुरी दा पेरी दिता, अरह् देऊँठी के सिंगाँस्ण शा ऐजा बड़ा गूँह्ज हुआ, “पुरो हुवो!”

¹⁸ तेख्णी बिज्ल़ाव चंम्मके, अरह् गुड़ाको पड़ी, अरह् बाद्ल़ो के नाँद-गुँह्ज हई, अरह् ऐक बोड़ो भूईच्ल़ लागो जेष्णों आदमी के पय्दा उत्पत्ति शो आगे धर्ती दो आगे कद्दी ने हई थी।

¹⁹ तेसी भूईच्ल़ो लई तेसी बड़े नंगर के च़ींन टूक्ड़े हुऐ, अरह् जात्ती-जात्ती के नंगर ढल़ी गुऐ; अरह् बड़े बेबीलोन को चींत्ते पंण्मिश्वर कैई कराऐ गुवो, के से आप्णें रोष की डाह्-जल़्ण की सूर तिन कैई शी पियाँव।

²⁰ अरह् ऐक नाँम बादे टापू आप्णी जागे शे टल़ी गुऐ, अरह् धारंह् का भी पता ही ने लागी।

²¹ अस्माँनों शे आदमी गाशी मंण-मंण भरी के शोरू पढे़, अरह् ईन्देंखे के ऐजी बिब्ती-अब्ल़ी बैजाऐ भारी थी, अरह् लोगे बिब्त्ती-अब्ल़ी के जाँणें पंण्मिश्वर की चूगली करी।