प्रकाशितवाक्य 14 - Sirmouri

छै़ल़्टा अरह् तिनके लोग

¹ तबे मुँऐ झ़ेठ पाऐ, अरह् देखो, सेजा छ़ैल़्टा सिय्योन धारह् गाशी खड़ा असो, अरह् तिनकी गईलो ऐक लाख चौवाल़ीष हजार लोग असो, जिनके माँथें गाशी तिनका अरह् तिनके परमं-पिता को नाँव असो।

² अरह् स्वर्गो शी मेरे ऐक धाव शुँणाँई पड़ी, जू पाँणी के बैजाऐ बड़े ओजाल़ों के गड़गड़ाट की गूँह्ज थी, अरह् जुण्जा गूँह्ज मुँऐं शुँणी, से तेष्णी थी, जैष्णें बैजाऐ भहिते लोग रंण्शिंगें-कनाँल़ी बजाणों वाल़े साथी ऐकी बई भहिते रंण्शिगें-कनाँल़ी बजाँदें लागो।

³ तिन्ऐं सिंगाँस्हणों के सहाँम्णें अरह् चौऊँ जींव, अरह् अगुऐ के सहाँम्णें ऐक नुवों गीत्त गाऐ लों थियो। तिनू ऐक लाख चौवाल़ीष हजार लोगो के सुवाऐं, जू धर्ती गाछ़ै मोंले लुऐ थुऐ थिऐ, अरह् ओके कुँऐ ऐजो गीत्त शिखी ने सको थिऐ।

⁴ से सेजे लोग असो, जुण्जे तिरंई की गईलो हेबी तोड़ी अशुद्ध ने हऐ रंई थी, अरह् से कुँवाँरें असो; से सेजे ही असो, जुण्जे हमेशा छ़ैल़्टे पाछ़ी चालो भाँव छ़ैल़्टा कैथी भे ज़ाँव; तिनू पंण्मिश्वर अरह् छ़ैल़्टे खे बिश्वाष की आगली ही ऊपज का जिया फ़ल़ आदमी मुझ्शे चूणें-छ़ाँटे गुवे।

⁵ तिनके मुँह ज़ात्ती शो हेबी तोड़ी झूठ ने निक्ल़ी रंई थी, से बै-कसूर थिऐ।

च़ींन स्वर्गदूत्त

⁶ तबे मुँऐ बीच अस्माँनों दा ऐक हजो स्वर्गदूत्त ऊड़ादे देखा, जेसी कैई धर्ती गाशी रंहणों वाल़े की ऐकी नाँम राज्य, कुल़-गड़ी, भाषा, अरह् सोभी जात्ती मुँझी प्रचार कर्णों खे पंण्मिश्वर की संदा खे खुषख्बरी थी।

⁷ तेने स्वर्गदूत्ते धाव देऐयों बुलो, “पंण्मिश्वर शे डरोह्, अरह् तिनकी बड़ियाऐ आरार्धना करह् किन्देंखे के तिनके नियाँव कर्णो का बख्त आऐ पईचा, अरह् तिनका भजन करह्, जिन्ऐं स्वर्ग अरह् धर्ती अरह् समुँन्द्र अरह् जल-पाँणी के फट्वाणी बंणाऐं थुऐ।”

⁸ आगले स्वर्गोदूत्त पाछी ओका दुज़ा स्वर्गदूत्त ऐजो बुल्दे आया, “छ़त्तियानाँष हऐ गुवो! बड़े बेबीलोन को छ़त्तियानाँष हुवों! बेबीलोन ऐ जेने बादे देश-राज्य आप्णें कू-कर्म की सूर नाँषे कराऐयों अरह् पियाऐयों सोभी मंचोऐ दिते थिऐ।”

⁹ तबे ईन्दें पाछ़ी ऐक हजो, च़ीज़ा, स्वर्गदूत्त बैजाऐ जुराल़ो, बुल्दे आया, के “जू कुँऐं तेथू बुणेंरो अरह् ऐथू की मुर्तीं की पूजा करह्, अरह् आप्णे माँथे के आप्णें हाथो गाशी ऐथ्की छाप-मुँहर लुवाला,

¹⁰ सेजे भे पंण्मिश्वर के रोष, के सूर पीला, जुण्जी पंण्मिश्वर के रोष के बैलूवें दी पाऐ गऐ थी, तेसी पबित्र-स्वर्गदूत्तो, अरह् छ़ैल़्टे के सहाँम्णें आग, अरह् गंन्धक की गईरी बैद्णीं दे पाऐ ज़ाले।

¹¹ तिनकी बैद्णी-पीड़ो का धुवाँ ज़ूगौ-ज़ूगौ तोड़ी ऊठ्दा रंह्दा, अरह् जू तेथू बुणेंरो अरह् तेथ्की मुर्ती की पूजा करह्, अरह् जू तेथू के नाँव की छाप-मुँहर आपुदी लुवाँव, तिनू रात्ती देसो चऐनं ने भेटो।”

¹² ईन्देंखे ऐजो जरूरी असो, के पबित्र लोगो का धीरज ईन्दी ही असो, के जुण्जे पंण्मिश्वर की आत्त्मा की अज्ञाँ माँनों अरह् प्रभू यीशू गाशी बिश्वाष थंह्।

¹³ तबे मुँऐ स्वर्गो शी ऐजी धाव शुणीं, “लिख: भागोईत हंदें से मंरे अंदे, किन्देंखे के ऐबे तिनकी मंऊँत प्रभू दे हंदी,” ऐजो “साच्चो असो!” पबित्र-आत्त्मा बुलो, “होर, से आप्णी कष्टो-मेंह्नत शा बिषाँव कर्दे, किन्देखे के तिनके भले काँम-काज़ तिनकी ही गईलो असो।”

शाखो लणों को कत्तिऐटू

¹⁴ मुँऐ झ़ेठ पाऐ, अरह् देखो, ऐक ऊज्ल़े बाद्ल़ो गाशी आदमी के बैटे जेष्णाँ कुँऐं बऐठी रूवा थिया, जेस्के मुँढों गाशी सुन्नें को मुँकुट-ताज अरह् हाथो दो पुईनों कत्तिऐटू असो।

¹⁵ तबे ऐक स्वर्गदूत्त देऊँठी शा बाँईडा नींक्ल़ा, अरह् तैस्खे बुलो, जुण्जा बाद्ल़ो गाशी बऐठी रूवा थिया, तेने जुराल़ी धाव देऐयों बुलो, “आप्णों कत्तिऐटू करियों लुण्दा लाग, किन्देंखे के लोण्णों का बख्त आऐ गुवा, ईन्देंखे के संईसारी धर्ती के खेच़ौ पाची रूऐ।”

¹⁶ तबे: तिन्ऐं जुण्जे बादल़ों गाशी बंईठें अंदे थिऐ, तिन्ऐ संईसारी धर्ती गाशी आप्णों कत्तिऐटू लाओं, अरह् धर्ती की लूणाँऐं करी।

¹⁷ तबे ऐक हजो स्वर्गदूत्त तियों देऊँठी शा बाईंडा नींक्ल़ा जुण्जी स्वर्गो दी असो, तेस्की हाथो दो भे ऐक पंईनों कत्तिऐटू थियों।

¹⁸ तबे ऐक ओका स्वर्गदूत्त, जेस कैई आगी गाशी हंक-अधिकार थिया, से बेदी-पूजो मुँझ शा बाँईडा नींक्ल़ा, अरह् तेसी कैई भे पंईनों कत्तिऐटू थियों, तिन्ऐं जुराल़ों बुलो, “आप्णों पंईनों कत्तिऐटू लई संईसारी धर्ती गाशी दाख्ह-अंगूरोह् के गुँछ़ै काटी दियों, किन्देंखे के ईन्दें की बाली दे गुंछ़ै पाची रूऐ।”

¹⁹ तबे तेने स्वर्गदूत्तें धर्ती गाशी आप्णों पंईनों कत्तिऐटू फेरो अरह् धर्ती के दाख्ह-अंगूरोह् के फल़ काटियों आप्णे पंण्मिश्वर के रोष के बड़े रंस कुँड दे पाऐ दिते;

²⁰ अरह् नंगर शे बाऐर तेसी रंस कुँड दे सेजे दाख्ह घीजे गुऐ, अरह् रंस कुँड दो ऐत्रो लह्ऊँ नींक्ल़ो के तेसी कुँड की लंम्बाऐ च़ीन षौ किलोमीटर अरह् ऊँचाऐ घोड़े के लगाम जेतोड़ी थी।