प्रकाशितवाक्य 11 - Sirmouri

दो गुवाह्-शाज़्त्त

¹ तबे मुँखे मिण्णों खे ऐक बंष्याठा दिता गुवा, अरह् कुणिऐ बुलो, “बिऊँज पंण्मिश्वर की देऊँठी अरह् बैदी पूजों, अरह् बर्तो कर्णो वाल़े नाँप अरह् तेथै हाजिर हुऐ प्रार्थना कर्णो वाल़े की गिनत्ती करह्।

² परह् देऊँठी शो बाईलो आँगण गंगवाड़ी मिण्णीं छुड़ी दिऐ; तैथू ने मिणें, किन्देंखे के ऐथू गऐर यहूदी खे देऐ थुवो, अरह् से तैथू पबित्र नंगर बयाल़ीष भीने तोड़ी घींज्ले।

³ हाँव आप्णे दो गुवाह्-शाज़्त्त खे ऐजा हंक-अधिकार देऊँबा, के टाट मेठियों ऐक हजार दो षौ षाठ देसो तोड़ी बरंम्बाँणीं करह्।”

⁴ सेही जैतून के दो डाल़ अरह् दो दियट असो, जू धर्ती के प्रभू के सहाँम्णें खह्ड़े रंह्।

⁵ जे कुँऐं तिनका नुकसाँन करणा चहाँव, तअ तिनके मुँह शी आग निकल़ियों तिनके बऐरी भसंम कर्दे, अरह् जे कुँऐं तिनका नुकसाँन करणा चहाँव, तअ तेसी जरूरी तेष्णा ही माँरा ज़ाला।

⁶ तिन कैई हंक-अधिकार असो, अस्माँन बंद कर्णो का, के तिनकी बरंम्बाँणीं के देसो दो पाँणीं ने आँव; अरह् तिनका बादे पाँणी गाशी हंक-अधिकार असो, के तिन्दें को लह्ऊँ बंणाव, अरह् जबे-जबे चहाँव तबे-तबे धर्ती गाशी साँत्त-भाँत्ती बिब्त्ति पाँणों के शँक्त्ति तिन कैई असो।

⁷ जबे से आप्णी गुवाऐ-शाज़्त्त देऐ पाले, तअ सेजो जाँगल़ो को बुँणेंर जू अथाह् कुँड मुँझ्शो निक्ल़ी रूवो थियों, तिनशो से लड़ियों जींत्ती ज़ाँदो, अरह् से तिनू माँरी देन्दों।

⁸ तिनके मित्त्के तेसी बह्ड़े नंगर के चौक दे पड़े अंदे रह्ले, जिन्देंखे आत्त्मिक रूप शे सदोम अरह् मिस्र बुलो ज़ाँव, जेथै तिनका प्रभू शुँल़ी-फ़ाँशी दे चढ़ाऐ गुवे।

⁹ बादे लोगो अरह् कुल़ो अरह् भाषा अरह् जात्ती-जात्ती के लोग तिनके मुँड़्दे साढ़े च़ींन देसो तोड़ी देख्दे रंह्ले, अरह् तिनके मित्त्के खात्ती दे थंणों ने देले।

¹⁰ धर्ती दे रंहणों वाल़े, तिनके मँर्णों शे आँनन्द-खुशी अरह् मंगन हले, अरह् ओका ओकी कैई भेंट डेयाल़्ले, किन्देंखे के ईनू दुईनें बरंम्बाँणीं कर्णो वाल़े धर्ती दे रंहणों वाल़े लोग सताऐ थुऐ थिऐ।

¹¹ साढ़े च़ींन देसो बित्त्णों गाशी, पंण्मिश्वर की ढबे शी जीवन की साँस तिन्दी बऐठी गऐ, अरह् तिनू जीवन के साँस शे भरे गुवे, से आप्णें लातो के सहारे खह्ड़े हऐ, अरह् तिनके देख्णों वाल़े बैजाऐ डरी गुऐ।

¹² तबे तिनू स्वर्गो शी ऐक धाव शुँणाई दिती, “ईथै ऊबे आओ!” ऐजो शुँणियों से बाद्ल़ो दे अशवार हऐयों आप्णें बईरी के देख्दे-देख्दे स्वर्गो दे हुटे।

¹³ तबे तेख्णी तियों ही घड़ी ऐक बड़ो भूईच्ल़ लागो, अरह् नंगर का दषंवाँ हिस्सा ढल़ी गुवा; अरह् तेसी भूईच्ल़ों लई, सात्त हजार आदमी मँरी गुऐ, अरह् ऊके डरी गुऐ, अरह् स्वर्गो के पंण्मिश्वर की बड़ियाऐं करी।

¹⁴ दुज़ी बिब्त्ति बिती गऐ; देखो, च़ीज़ी बिब्त्तिी शीघी आँणों वाल़ी असो।

सात्ते रंणशिंगें-कनाँल़ी

¹⁵ जबे सात्ते स्वर्गदूत्त ऐ रंणशिंगें-कनाँल़ी फूकरी, तबे स्वर्गो दी साँत्त-भाँत्ती गुड़ाको की गूँह्ज शुँणाँई पड़ी: “संईसारी को राज ऐबे अमाँरें प्रभू का अरह् तिनके मसीया को राज हऐ गुओ; से ही ऐबे ज़ूगौ-ज़ूगौ राज कर्ले।”

¹⁶ तबे चौबीष अगुऐ जू पंण्मिश्वर के सहाँम्णें आप्णें-आप्णें सिंगाँस्हणों गाशी बईठे अंदे थिऐ, से उटमुँल़े खे लाँम्बे पसरियों पंण्मिश्वर के आरार्धना कर्दे लागे।

¹⁷ ऐजो बुल्दे लागे: “हे सर्ब-शक्त्तिमाँन प्रभू पंण्मिश्वर, जू असो ऐ, अरह् जू थिया, आँमें तेरा धन्यबाद करह्, के तुँऐं आप्णी बड़ी शक्त्ति काँम-काज़ दी लाऐयों राज करी थो।

¹⁸ सोभी जात्ती के लोगे ऐ रोष-कुरूध करा: अरह् तिनू गाशी पंण्मिश्वर की माँर पड़ी, अरह् सेजा बख्त आऐ पईचा के मँरे अँदे का नियाँव करा ज़ाँव, अरह् तेरे दास ऋषियों, अरह् पबित्र लोगो खे अरह् तिनू छुटे बड़े खे जू तेरे नाँव शे डरो ऐ, बद्ल़ा दिया ज़ाँव, अरह् धर्ती के बिगाढ़्णों वाल़े नाँष करे ज़ाँव।”

¹⁹ तबे पंण्मिश्वर की जुण्जी देऊँठी स्वर्गो दे असो, सेजी खुली गऐ, अरह् तेस्की देऊँठी दा तेस्के वाचा का संनदूक देखिया; जिन्दें शे बिज्ल़ाव गुड़ाको की धूमराल़ों अरह् भूईच्ल़ो हुऐ, अरह् बैजाऐ शोरू पड़े।