फिलिप्पियों 4 - Sirmouri

¹ ईन्देंखे हे मेरे प्यारे भाऐ-बईणों, जिंदा मेरा जिऊँ लागी रंह्, जू मेरा आनन्द, अरह् शीर का ताज असो, हे मेरे दोस्तो, प्रभू दे ऐष्णें ही अट्ल़ रंह्।

चाल-चलण खे हुकम

² हाँव बंईण-यूओदिया अरह् बंईण-सुन्तुखे, ईनू दु:ई खे ढाल-अरज करू; के तुँऐं प्रभू दी ऐक च़ीत्त-मंन रूऐ।

³ हे साच्चै साथी, हाँव तुँओं खे भे ढाल-अरज करू, के तिनू तिरंई की साय्ता करह्, किन्देंखे के तिन्ऐं मेरी गईलो खुषख्बरी फईलाँणों खे, भाऐ-क्लेमेंस अरह् मेरे ओके साथी, समेंत मेंह्नत करी थऐ, जिनके नाँव जीवन की कताबे दे लिखे अंदें असो।

⁴ प्रभू दे सदा खुशी रंह्, हाँव हजो बुलू, के खुशी रंह्।

⁵ तुँवारी नरमाँऐं बादे आदमी गाशी पर्गट हों, प्रभू नंजीक असो।

⁶ कोसी भे बात का फिकर ने करे, परह् बादी बातो दे तुवाँरे ढाल-अरज, प्रार्थना अरह् ढाल-अरज के जाँणें धन्यबाद आरी पंण्मिश्वर के संहाम्णें हाजिर हों।

⁷ तबे पंण्मिश्वर के शाँण्त्ति, जू बादी संम्झ शे बाऐर असो, तुवाँरें दिल अरह् तुवाँरे बिचार मसीया प्रभू यीशू दे बचाऐं दियों।

⁸ ईन्देंखे हे भाऐ-बईणों जू-जू बातो साची असो, अरह् जू-जू बातो ईज्जत की असो, अरह् जू-जू बातो पबित्र असो, अरह् जू-जू बातो मंन लुभाणी असो, अरह् जू-जू बातो मंन दी भाँव, मतल्व जू भे सत्तगुण, अरह् तारीफ की बातो असो, तिन्दे गाशी ध्याँन लाव।

⁹ जुण्जी बातो तुँऐं मुँह कैई शी शिखी अरह् तुऐ माँनी, अरह् शुँणीं अरह् मुँदी देखी, तिन्दी का पाल़्ण करिया करह्, तबे पंण्मिश्वर जू शाँण्त्ति का दाता असो, से तुँवारी गईलो रह्दा।

दाँणो खे धन्यबाद

¹⁰ मुँह प्रभू दी ऐत्री बडी खुशी हऐ, के मेरे बारे दो प्यार देखाणों का मुँका तुँओं जू ऐबे भेटा; ईदे शा आगे भे तुवाँरे मेरा फिकर जरूर थिया, परह् सेजा प्यार देखाणों का मुका तुँओं भेटी ने रंई थी।

¹¹ ऐजो ने के हाँव आप्णी जरूरत्त के कारण ऐजो बुलू, किन्देंखे के मुँऐ ऐजो शिखी थो, के जेसी दषा दा हाँव असो, तिदा ही खुशी भे रऊँ।

¹² हाँव गरीबाऐ, अरह् अंमिराई दु:ई बातों शा भुगत्तियों आऐ रूवा; हर ऐक बात अरह् बादे हालात दा मुँऐं राजी रहणों, अरह् भूखो रहणों, अरह् बड़णों, अरह् घट्णों शिखी थो।

¹³ जू मुँखे तागत दियों, तिन्दे खे हाँव सब-कुछ करी सकू।

¹⁴ तबे भे तुँऐं भलो कोरो, के मेरी कल़ेश-दु:ख्ह दे मेरे साथी बणें।

¹⁵ हे फिलिप्पियों, तुँऐं आपु भे जाँणोंऐं के खुषख्बरी के प्रचार के शुरू दे जबे हाँव मकिदुनिया शा बिदा हुआ, तबे तुँओं छुड़ियों ओकी कोसी भी कलीसिया शी मुँखे किऐ भे मंद्दत्त-साय्ता ने भेटी।

¹⁶ जेशी दाँई जबे हाँव थिस्सलुनीके नंगर दा थिया, तबे भे तुँऐं मेरी घटी पुरी कर्णो खे बार-बार किऐ ना किऐ जरूर डेयाल़ो थिऐ।

¹⁷ ऐजो ने के हाँव दाँण चहाँऊ, परह् हाँव ऐशा फल़ चहाऊँ; जुण्जा तुवाँरे फाय्दे खे बढ़दा ज़ाओं।

¹⁸ मुँह कैई सब-कुछ असो, परह् बैजाऐ भे असो, जुण्जी चींजो तुँऐं भाई-इपफ्रुदीतुस कैई डियाल़ी थी, तिनू भेंटियों हाँव छ़क्की गुआ, से तअ सु:खदाय्क खुशबू-दार बंल़ीदाँण असो; जू पंण्मिश्वर के आछ़ा लागो।

¹⁹ मेरा पंण्मिश्वर भे आप्णे तेसी धन के मुँताबिक शो जू बड़ियाऐ लई, मसीया यीशू दा असो, तुँवारी ऐक नाँम घटी पुरी कर्ले।

²⁰ अमाँरे परंम-पिता पंण्मिश्वर की बड़ियाऐ ज़ूगौ-ज़ूगौ दी हंदी रंह्। आमीन।

आखरी नमंष्कार

²¹ मसीया प्रभू यीशू के ऐक नाँम भगत्तो खे नमंष्कार; मेरी गईलो जू भाऐ असो, से भे तुँओं बिश्वाषी भाईयों खे नमंष्कार करह्।

²² बादे पबित्र लोग, जुंण्जे खास-करियों कैसर के घराने के असो, से तुँओं खे नमंष्कार करह्।

²³ अमाँरे प्रभू यीशू मसीया के कृपा तुँवारी आत्त्मा आरी सदा रंह्।