फिलिप्पियों 3 - Sirmouri

¹ ईन्देंखे हे मेरे भाऐ बंईणों, प्रभू दे आँन्दित्त-खुशी रंह्; सेजी ही बातो तुँओं खे बार-बार लिख्णों खे, मुँह किऐ भे कष्ट ने हंदी; अरह् ईन्दी तुँवारी भलाऐ असो,

² बुरे काँम-काज़ कर्णो वाल़े कुत्ते जैष्णें लोगो शे च़ौक्क्ष रूऐ, जू अंग छुलियों खतना करह्;

³ किन्देंखे के खतना वाल़े तअ आँमें ही असो, जू पंण्मिश्वर की आत्त्मा के गुवाह्-शाज़्त्ति शी आरार्धना करह्, अरह् मसीया यीशू गाशी तारीफ करह्, अरह् आप्णी देह्-शरीर की बातो गाशी भूर्षा ने कर्दे।

⁴ परह् हाँव तअ देह्-शरीर दा भे भूर्षा करी सकू। जे कोसी ओकी देह्-शरीर गाशी भूर्षा थणों का बिचार हों, तअ हाँव तिनशा भे बड़ियों भूर्षा करी सकू।

⁵ आठवें देसे मेरा खतना हुआ, इस्राएल के बष, शा अरह् बिन्यामीन के गोत्र का असो; अरह् इब्रानी माँ-बाब का जाया, इब्रानी असो; शिक्क्षा-निय्म के बारे दा जे बुलो तअ यहूदी भाट-बाँम्ण असो,

⁶ यहूदी धर्म दा ऐत्रा पाक्का थिया, के हाँव कलीसिया का सताँणों वाल़ा थिया; अरह् शिक्क्षा धार्मिक्त्ता के बारे दा जे बुलो तअ बै-कसूर असो।

⁷ परह् जुण्जी-जुण्जी बातो मेरे फाय्दे-लाभ की थी, तिन्दे का मुँऐ मसीया के जाँणें आप्णा नुकसाँन जाँणा।

⁸ ऐती ने, परह् हाँव आप्णें प्रभू मसीया यीशू पंह्छ़याँण्णों खे सोभी शा आछा फाय्दा जाँणू; अरह् ऐसी ज्ञाँन की बरा-बरी दी ऐक नाँम चींजो नुकसाँन ही जाँणू, तिनही के कारण मुँऐ हर ऐक च़ीज छ़ुड़ी दित्ती, अरह् सेजो सब-कुछ़ मुँऐ कुडा़-कर्क्ट जाँणों, जिन्दे लई मुँह मसीया भेटी सको;

⁹ अरह् हाँव तिन्दा संमाँऐ ज़ाऊँ, के आप्णी तियों धार्मिक्त्ता आरी, जुण्जी अज्ञाँ-निय्म शी माँनी ज़ाँव; परह् तेसी धार्मिक्त्ता आरी, जुण्जें के मसीया दी बिश्वाष कर्णों के कारण असो; अरह् तेसी बिश्वाष लंई पंण्मिश्वर आँमों आप्णी नंजरी दे धर्मी बंणाँऐ दियों।

¹⁰ हाँव ऐजो चहाऊँ, के हाँव मसीया जाँणी पाऊँ, अरह् तियों शक्त्ति का तजरबा करणा चहाऊँ, जिन्दे लई से मँरियों पाछु ऊबे जीऐं; अरह् मऊँदी दा तिनू जेष्णाँ बंणियों तिनके दु:ख भोगणों दा साथी बंण्णा चहाऊँ।

¹¹ तेसी भूर्षे आरी के हाँव भे मँरे अँदे मुँझ्शा पाछ़ू ऊबा जीऊँदा हंऊँबा।

आप्णे निषाँणे तोड़ी की दोऊँड़

¹² ऐजा मतल्व ने आथी के मुँह् से भेटी रूऐ, के हाँव सिद्ध बंणीं गुवा; परह् हाँव तियों चींजो थाँमबड़णों खे दोऊँड़ी रूआ, जिन्दे की ताँईऐ मसीया यीशू ऐ मुँह थाँम्बड़ी थुवा।

¹³ हे भाऐ-बईणों मेरी हिछा ऐजी ने आथी, के मुँह थाँम्बड़ी थुवा; परह् सिर्फ ऐजा ऐक काँम-काज़ करू, के जुण्जी बातो पाछु छुटी गई, तिनू बिसरियों आगे की बातो की ढबे, बड़दा ज़ाँऊ,

¹⁴ अरह् नीशाँणें के ढबे दोऊँड़दा ज़ाँऊ, जू सेजा ईनाँम पाऊँ, जिन्दे की ताँईऐं पंण्मिश्वर मुँह मसीया यीशू दा ऊँबा बय्दी थुवा।

¹⁵ आँमों मुझ्शे केतोड़े लोग आपु आप्खे सीद्ध जाँणों, अरह् ऐजा ही बिचार थुऐं; अरह् जे कोसी बातो दे तुवाँरा ओका ही किऐ बिचार असो, तअ पंण्मिश्वर तेसी भे तुँओं गाशी पर्गट करह्।

¹⁶ ईन्देंखे तेथै तोड़ी आँमें पह्ऊची रूऐ, आँमों तिदो ही चालणों पड़ो।

¹⁷ हे भाऐ-बईणों तुँऐं बादे मीलियों मेरी जेष्णी चाल-चालो, अरह् तिनकी मिशो करह्, जू ऐसी ढंग शे चालो; जिन्दे का उदारण तुँऐ आँमों दा पाँव,

¹⁸ किन्देंखे के कऐयों ऐशी चाल-चालो, जिनकी चर्चा मुँऐ तुँओं कैई बार-बार करी थऐ, अरह् ऐबे भे रूई-रूईयों बुलू; के कुछ़ लोग आप्णी चाल-चलण लंई यीशू मसीया की शुँल़ी-फ़ाँषी की कुरूबाँणीं के बऐरी असो।

¹⁹ तिनको ऊगल़ी ज़ाँदो, तिनका पंण्मिश्वर सिर्फ पेट असो, से आप्णी बै-शर्मी की बातो दे शियाँगियों ऐ; अरह् धर्ती की बादी चीज़ो दा आप्णा मंन लाँव।

²⁰ परह् अमाँरा आप्णा देश स्वर्गो दा असो, अरह् आँमें ऐक मुँक्त्ति देणों वाल़े प्रभू यीशू मसीया की तेथै शी आँणो के बाट जूई लऐ।

²¹ से आप्णी शक्त्ति के तेसी असर के मुँताबिक शे जिन्दे के जाँणें, से बादी चींजो आप्णी बंष दी करी सको; अमाँरी नाँष बाँन देह्-शरीर का रूप बद्ल़ियों, आप्णी बड़ियाऐ की देह्-शरीर के जैष्णें बंणाऐं देंदे।