फिलिप्पियों 1 - Sirmouri

¹ मसीया प्रभू यीशू के दास संत्त-पौलुस अरह् तीमुथियुस के ढबे शे बादे फिलिप्पियों के पबित्र लोग मसीया प्रभू यीशू आरी बिश्वाष करियों रंह्, कलीसिया के अगवाँल़ अरह् कलीसिया दे सेंवा कर्णों वाल़े सोभी लोगो खे ऐजी पत्री लिखी थऐ थी;

² अमाँरे परंम-पिता पंण्मिश्वर अरह् प्रभू यीशू मसीया की ढबे शी तुँओं खे कृपा अरह् शाँण्त्ति भेंटी चेंई।

संत्त-पौलुस के प्रार्थना अरह् धन्यबाद

³ हाँव जेख्णों-जेख्णों तुँओं चितोऊँ तेख्णों-तेख्णों आप्णे पंण्मिश्वर का धन्यबाद करू।

⁴ अरह् जबे कभिऐ तुँओं सोभिखे प्रार्थना करू, तअ सदा आँनन्द-खुशी आरी प्रार्थना करू।

⁵ ईन्देंखे के तुँऐं आगले देसो शे ऊबे ऐतलो तोड़ी खुषख्बरी देणों खे अमाँरें साथी असो।

⁶ मुँह ईयों बातो का भूर्षा असो, के जिन्ऐं तुँओं कैई शे आच्छ़े काँम-काज़ कराँणें शुरू कराऐ थिऐ, सेही तिनू यीशू मसीया के आँणों के देसो तोड़ी पुरो करला।

⁷ ठीक असो, के हाँव तुँओं सोभिखे ऐष्णा ही सोंच-बिचार करू, किन्देंखे के तुँऐं मेरे सासो दे बसी रूऐ; अरह् मेरी कय्दी दे अरह् खुषख्बरी खे जबाब अरह् नंतीजा देणों खे तुँऐं बाद्दे झुणे मेरी गईलो पंण्मिश्वर की कृपा के साथी असो।

⁸ ईदा पंण्मिश्वर मेरा गुवाह्-शाज़्त असो, के हाँव मसीया प्रभू यीशू का जिया प्यार करियों; हाँव तुँओं सोभी की हिछ़या करू।

⁹ हाँव ऐजी प्रार्थना करू, के तुवाँरा प्यार ज्ञाँन अरह् बादी सम्झ आरी हजो भे बढ़दा ज़ाऊँ,

¹⁰ ऐथे तोड़ी के तुँऐं आच्छ़ी शी आच्छ़ी बातो प्यारी जाँणो, अरह् मसीया के देसो तोड़ी साच्चै अरह् बै-कसूर बणे अँदें रंह् अरह् तुऐं ढैस-ठूकर ने खाँव,

¹¹ प्रभू यीशू मसीया के कृपा लऐयों, तुँऐं प्रभू के नंजर दे बैजाऐ आच्छ़ै काँम-काज़ करह्, जिन्दें लंई पंण्मिश्वर के बड़ियाऐ हों, अरह् तिनकी संत्तुति हों।

संत्त-पौलुस के कय्दी शी खुषख्बरी के बड़ोत्री

¹² हे भाऐ-बईणों, हाँव चहाऊँ के तुँऐं ऐजो जाँणी पाव के मुँह गाशी जू बिती रंऐ, तिन्दे लई खुषख्बरी की ही बड़ोत्री हऐ रंऐ।

¹³ ऐथै तोड़ी के कंय्दखाँने दे बादी पल़ट्ण, अरह् बचे अंदें लोगो शो ऐजो पर्गट हऐं रूओं, के हाँव मसीया पाँऐयों कय्दी दा असो।

¹⁴ अरह् प्रभू दी जुण्जे भाऐ-बंईणों असो, तिन मुँझ्शे जादा लोग मेरे कय्द हंणो के कारण हिमम्त्त करियों पंण्मिश्वर का बचन बै-धड़क शुँणाँणों खे बैगेही हिमम्त्त करह्।

¹⁵ ऐजो साच्चो असो, के किऐ तअ डाँह्-झगड़े के कारण मसीया का प्रचार करह् अरह् कुँऐं भली हिछ़या शा मसीया का प्रचार करह्।

¹⁶ कुँऐं तअ ऐजो जाँणियों के मुँह खुषख्बरी देणों की जबाब खे चूणी थुवा, अरह् से प्यार शा प्रचार करह्।

¹⁷ किन्देंखे के कंऐं लोग सच्चाई आरी ने आथी, परह् आप्णे मतल्व की हिछ़या शे, मसीया का प्रचार करह्; से ऐशो जाँणों के जैष्णें दाँई कय्दी दे मुँखे कष्ट पय्दा करी पाँदे।

¹⁸ तबे का हुओं? सिर्फ ऐजो असो, के हर तरेह् शे, भाव भाने शे भाँव सच्चाई शे, परह् हों तअ मसीया का ही प्रचार हों; अरह् हाँव ईन्देशा खुशी असो, अरह् खुशी रंह्ऊँबा भे।

जीऊँदो रंहणों मसीया असो

¹⁹ किन्देंखे के हाँव जाँणूऐं के तुँवारी बिन्त्ती के जाँणें अरह् यीशू मसीया की आत्त्मा के दाँण के जाँणें, ईन्देंका प्रत्तिफ़ल़ ऐजा असो; के मेरा छ़ुट्कारा हऐ ज़ाँदा।

²⁰ हाँव तअ दिल शो चहाऊँ, अरह् भूर्षा थऊँ; के हाँव कोसी बातो दा शर्मिन्दा ने होंऊ, परह् जेष्णी मेरी बड़ी हिमम्त्त के जाँणें मसीया के बड़ियाऐ मेरी देह्-शरीर के जाँणें सदा हंदी रंह्, तैष्णी ही ऐबे बे हंदी रंह्, हाँव जीऊदा रंऊँ भाँव मँरी ज़ाऊँ।

²¹ किन्देंखे के मुँखे जीऊँदो रंहणों मसीया असो, अरह् मँरी ज़ाँणों लाभ असो।

²² परह् जे देह्-शरीर दो जीऊँदो रंहणों ही मेरी काँम-काज़ खे फाय्दे बंद असो, तअ हाँव ने जाँण्दा के का चूणु अरह् का छ़ाँटू।

²³ किन्देंखे के हाँव दूई के बिचो दा अदमो दा लटकी रूआ, दिल तअ ऐशो चहाँव, के आप्णीं ऐजी देह्-शरीर छ़ुड़ियों ऐकदंम मसीया कैई ज़ाऊँ; किन्देंखे के ऐजो मुँखे बैजाऐ आछो असो।

²⁴ परह् देह्-शरीर दो रंहणों तुँवारी ताँईऐं बैगेही जरूरी असो।

²⁵ ईन्देंखे के मुँह ईन्दें का पाक्का भूर्षा असो, अंत्त: हाँव जाँणूऐं के हाँव जीऊँदा रंह्दा, परह् तुँओं सोभी की गईलो रंहूबा; जिन्दे लई तुँऐं बिश्वाष दे डटे अंदे रंह्, अरह् बिश्वाष दे खुशी रंह्।

²⁶ ऐशो दाँई जबे हाँव हजो तुँओं कैई आऊँबा तअ तुँऐं मेरे जाँणें मसीया यीशू गाशी हजो भे तारीफ करी सक्दे।

²⁷ सिर्फ ऐतड़ो करह्, के तुवाँरा चाल-चल़्ण मसीया के खुषख्बरी के ज़ुगा हों, के हाँव आऐयों तुँओं देखू, भाँव ना देखू; परह् हाँव तुवाँरे बारे दो ऐजो ही शुणू, के तुँऐं ऐक ही आत्त्मा दे अट्ल़ असो, अरह् ऐक मंन हऐयों खुषख्बरी के बिश्वाष खे मेंह्नत कर्दे रंह्,

²⁸ अरह् कोसी बात दे बईरी दे ने डरो; तुँवारी ऐजी हिम्मत्त पंण्मिश्वर का बरंदाँण असो; अरह् बईरी के नाँष का नंतीजा असो, अरह् तुँओं खे ऐजा पंण्मिश्वर की ढबै शा मुँक्त्ति का नंतीजा असो।

²⁹ किन्देंखे के मसीया के जाँणें तुँओं गाशी ऐजी कृपा हऐ रऐ, तेस गाशी सिर्फ बिश्वाष ही ने करे, परह् तिनकी ताँईऐं दु:ख भे भूगो,

³⁰ अरह् तुँओं ऐष्णा ही मुकाब्ला करणा पड़ला; जेष्णाँ मुकाब्ला तुँऐं मुँह कर्दें देखी थुवा; अरह् हाँव हेबी भी सेजा ही मुकाब्ला करू, जिन्दे के बारे दो तुँऐं शुँणों हले।