फिलेमोन 1 - Sirmouri

नंमष्कार

¹ पौलुस की ढबे शी जू मसीया प्रभू यीशू का कय्दी असो, अरह् भाऐ तीमुथियुस की ढबे शी, अरह् अमाँरी काँम-काज दा साथ देणों वाल़े प्यारे फिलेमोन,

² अरह् बईण अफफिया, अरह् अमाँरे साथी जोंह्दा अरखिप्पुस अरह् तुवाँरे घर के कलीसिया के नाँम:

³ अमाँरे परंम-पिता पंण्मिश्वर अरह् प्रभू यीशू मसीया की ढबे शे कृपा अरह् शाँण्त्ति तुँओं भेंट्दी रंह्।

फिलेमोन को पियार अरह् बिश्वाष

⁴ हाँव सदा पंण्मिश्वर का धन्यबाद करू, अरह् आप्णी प्रार्थना दा भे ताँव चित्तै करू,

⁵ किन्देंखे के हाँव तेरा प्रभू यीशू गाशी बिश्वाष अरह् सोभी प्रभू के लोगो आरी पियार के बारे दी बातो के चर्चा शुणू,

⁶ हाँव प्रार्थना करू, के बिश्वाष दा तेरा साथी बंणू, तुँवारी बादी भलाई की पछयाँण दा, मसीया की ताँईऐं असरदार बंणू।

⁷ किन्देंखे के हे भाऐ, मुँह तेरे पियार शी बैजाऐ खुशी अरह् शाँण्त्ति भेंटी रूऐ, ईन्देंखे के तेरे जाँणें पबित्र लोगो के मंन हरे-भरे हऐ रूऐ।

उनेसिमुस खे ढाल-अरज

⁸ ईन्देंखे मसीया दा मुँह कैई तेरे फर्ज खे अज्ञाँ देणों का हंक-अधिकार असो,

⁹ तबे भे हाँव पियार शी ताँव्खे ढाल-अरज कर्णी जादा आछो जाँणू, हाँव पौलुस जू ऐबे बुड़ी रूवा, अचकालिऐं प्रभू यीशू मसीया के ताँईऐं कय्दी दा असो,

¹⁰ हाँव आप्णे धर्म का बैटा उनेसिमुस की ताँईऐं, जू मुँह कय्दी दा भेटा, अरह् मेरे जाँणें बिश्वाष दा मेरा गोद लुवा बैटा बंणा, हाँव तुँओं शी ढाल-अरज करू।

¹¹ से आगे तअ तेरे कोसी कामों-कार्थे का ने थी, परह् ऐबे से तेरे अरह् मेरे दुई के बड़े काँम-काज़ का असो।

¹² तैसी ही जू मतल्व मेरे काल़जे का टुक्ड़ा असो, मुँऐं तैसी ताँव कैई पाछू डियाल़ी थुवा।

¹³ ऐसी हाँव आपु ही कैई थंणा चहाऊँ थिया, के ऐ तेरी ढबे शा ईयों कय्दी दा जू खुषख्बरी के जाँणें असो, ऐ मेरी सेवा करदा।

¹⁴ परह् मुँऐ तेरी ईजाज्त के बिना, किऐ भे कर्णो ने चाई, के तेरी ऐजी कृपा दबाव शी ने परह् आँनन्द-खुशी शी हों।

¹⁵ किन्देंखे के का जाँण्णों के ऐ ताँव कैई शा ईन्दी की ताँईऐ कुछ देसो खे ज़ई हुआ, के सदा खे तेरे नंजीक ताँव कैई रंह्ला।

¹⁶ परह् ऐ हेबी शुबा बैटू-दास जिया ने, परह् दास शा भे आछा, मतल्व भाऐ के जैष्णाँ रंह्, मेरे तअ ऐसी बैगेही प्यारा असो, परह् ऐबे ईन्साँनियत के रूप अरह् प्रभू दा बिश्वाषी हंणों के नाँत्ते भे ऐ तेरा प्रभू यीशू के पियारा हुआ चेंई।

¹⁷ तअ: जे तू मुँह आप्णा साथी जाँणें, तअ ऐसी ऐशा मान जैष्णाँ के तू मुँह मुँह माँने।

¹⁸ जे ऐने तेरा किऐ नुकसाँन करी थुवा, के तेरो किऐ ऐस कैई असो ऐ, तअ मेरी नाव दो ऊबो लिखे।

¹⁹ मुँऐ पौलुस ऐ आप्णे हाथै लिखी लों, के हाँव आपु आगु देऊँबा; अरह् ऐस्खे बुल्णों के किऐ जरूरत ने आथी, के मेरी कर्जी जुण्जी ताँव कैई असो, से तू ही असो।

²⁰ हे भाऐ, ऐजा आँनन्द-खुशी मुँह प्रभू दी ताँव कैई शी भेंटी चेंई। मसीया दा मेरा जीऊँ हरा-भरा करी दे।

²¹ हाँव तेरे अज्ञाँ कारी हणों गाशी भूर्षा थईयों ताँव खे लिखू, अरह् ऐजो जाँणू, के जू किऐ हाँव बुलू, तू तिन्दे शो भे जादा बड़िया करदा।

²² अरह् ऐक बात हजो, के मुँखे रंहणों खे जागा तियार थो। मुँह भूर्षा असो, के तुँवारी प्रार्थना के जाँणें मुँह सुवाँ करियों तुँओं कैई देऐ देईदा।

आखरी बात

²³ इपफ्रास, जू मसीया यीशू दा मेरे गईलो कय्दी असो, तैस्का तुँओं खे नमंष्कार,

²⁴ अरह् मरकुस, अरह् अरिस्तर्खुस अरह् देमास अरह् लूका जू मेरी गईलो काँम-काज़ कर्णो वाल़ा असो, ईन का भे ताँव्खे नमंष्कार।

²⁵ अमाँरे प्रभू यीशू मसीया की कृपा तुँवारी आत्त्मा की गईलो रंह्। आमीन।