मरकुस 9 - Sirmouri

¹ प्रभू यीशू ऐ आप्णें चैले खे बुलो, “हाँव तुँओं खे खास बात बुलू, के जै-तोड़े ईथै खड़े असो, इन मुँझ्षे कुँऐं-कुँऐं ऐष्णें असो, के जाँव तोड़ी पंणमिश्वर को राज्य शक्त्ति लई आऐयों ने दे:खी पाँव, ताँव-तोड़ी मंऊँती के हाथो दे ने ज़ाँदे।”

प्रभू यीशू का रूप बद्ल़ा

² छ: देसो बेत्त्णो गाशी प्रभू यीशू ऐ पतरस, याकूब अरह् यूहन्ना आप्णी गईलो, ऐकलाल़े दे कोसी ऊँची धारंह् गाशी नींऐं। तेथै चैले के साँमणिऐं प्रभू यीशू का रूप बद्ल़ी गुआ।

³ अरह् प्रभू यीशू का चोंगा चंम्मक्दा लागा, अरह् ऐत्रा ज़ूगा चंम्मका के कुँऐ ईयों धर्ती गाशी धुब्बी भे ऐष्णें खोट्णों ने धुऐ सक्दा।

⁴ अरह् चैले के ऋषी-मूसा, अरह् ऋषी-एलिय्याह, दुन्नें दे:खिऐ, अरह् से प्रभू यीशू की गईलो पह्ली रूऐ थिऐ।

⁵ ईन्देंखे गाशी पतरस ऐ प्रभू यीशू खे बुलो, “हे गुरू जी! अमाँरो ईथे रंहणों ठीक असो: ईन्देंखे आँमें ईथे च़ींन थाँनं-देऊँठी जेई बाँणबे; ऐक तुँओं खे ऐक ऋषी-मूसा खे अरह् ऐक ऋषी-एलिय्याह खे तियाँर करूबे।”

⁶ किन्देंखे के से जाँणों ने थिया, के का जबाब देंणा, ईन्देंखे खे से बैजाऐ डरी गुऐ थिऐ।

⁷ तबे ऐक बादल़ जिओ आओं अरह् तिन्देशी ऐक धाव शुणाँई पढ़ी, “ऐ मेरा प्यारा बैटा असो, ऐस्कि शुण्णों।”

⁸ तबे चैले ऐ चफेर झ़ेंठों पाँऐयों दे:खो, अरह् तबे प्रभू यीशू के सुवाऐ तिनके आप्णी गईलो ओका कोसी ने दे:खी।

⁹ धारह् गेछ़ै ऊदे आँदिऐं, प्रभू यीशू ऐ तिनखे अज्ञाँ दिती, के जाँव तोड़ी आदमी का बैटा मरे अंदे मुँझ्षा, जीऊँदा ने हुआ, ताँव-तोड़ी जू किऐ तुँऐं दे:खो, सेजो ओकी कोसी कैई ने बुले।

¹⁰ अरह् चैले ऐ सेजी बात चींत्ते थऐ; अरह् आपु मुँझी भंऐस कर्दें लागे, के “मरे अंदे मुँझ्षा जीऊँदा हंदा, ईन्देका का मतल्व असो?”

¹¹ चैले ऐ प्रभू यीशू शो पुछो, “यहूदी-निय्म शिखाँणों वाल़े कैई बुलो, के ‘मसीया’ के आँणों शा आगे ऋषी-एलिय्याह की आँवणीं आगे जरूरी असो?”

¹² प्रभू यीशू ऐ तिनखे जबाब दिता, “ऋषी-एलिय्याह सत्तिखे आगे आऐयों बादो सुवाँरीं देंदा, परह् आदमी के बैटे के बारे दो ऐजो कैई लिखी थो, के से बैजाऐ दु:ख भोग्दा, अरह् छूटा माँना ज़ाला?

¹³ शुणों! ऐष्णों हऐ रंहो, ऋषी-एलिय्याह तअ आऐ रूवा, अरह् तिन्ऐ तेस्की गईलो, तेष्णों ही करो, जेष्णों से चहाँव थिऐ।”

दुष्टो का भूँह्चा अंदा चाँगा करा

¹⁴ जबे प्रभू यीशू चैले कैई आऐयो दे:खो, के तिन कैई चोऊ ढबे लोगो की बैजाऐ बड़ी भीड़ लागी रऐ, अरह् यहूदी-निय्म के शिखाँणों वाल़े ऐ तिनू आरी भंऐस करी लई थी।

¹⁵ प्रभू यीशू मसीया ऐ दे:ख्दे ही लोगो के तोंरंबाणच़ूंटे, अरह् बादे लोग बिच़ड़ियों नमंष्कार कर्दे प्रभू की ढबे आऐ।

¹⁶ प्रभू यीशू मसीया ऐ तिन कैई शो पुछो, “तुँऐं ईनकी गईलो, का भंऐस करी लऐ थी?”

¹⁷ लोगों की भीड़ो मुँझ शा ऐकी ऐ जबाब दिता, “हे गुरू जी! मुँऐ आप्णा बैटा जेस्दी गूँगी दुष्ट-आत्त्मा समाऐ रंऐ, तेसी आँमें तुँओं कैई आँणा थिया।

¹⁸ किन्देंखे के जबे सेजी गूँगी आत्त्मा ऐस्दी पिच़राल़ी ज़ाँव, तअ ऐसी थाँम्बड़ियों से पंट्की-पंट्कियों लाँव, अरह् ऐस्के ज़ात्ति-मुँहों शी शैफो लागो, अरह् ऐ दाँदो च़ाक्दे दन्दकिलो बईठाल़ों, ऐसी मुँऐ तुओं कैई आँणा थिया, परह् तुवाँरे चैले कैई ईयों दुष्ट-आत्त्मा गाड़णों की ढाल-अरज करी थी, परह् ऐ गाड़ी ने सकी।”

¹⁹ ऐजो शुणियों, प्रभू यीशू ऐ तिनखे जबाब देऐयों बुलो, “ओ बै-बिश्वाषी लोगो, हाँव कबे तोड़ी तुँवारी गईलो रंह्ऊँबा? अरह् कबे तोड़ी तुँवारी सऐन करूबा? ऐसी मुँह कैई आँणों।”

²⁰ तबे तिन्ऐ तेसी प्रभू यीशू कैई आँणा: अरह् जैई प्रभू ऐ तेसी दे:खा, तैई तेख्णी तियों गूँगी दुष्ट-आत्त्मा ऐ तेसी च़ूड़ी मुँछ़ियों अकेड़ा; अरह् से धनियों पुँड़ा रीड़ा, अरह् तेस्के ज़ात्ति-मुँह शी शैफो लागी, अरह् से धनियों धर्ती गाशी पट्की-पट्कियों अरह् रीड़ीं-रीड़ियों हुटा।

²¹ प्रभू यीशू ऐ तेस्के बाबा कैई शो पुछो, “ऐस्कि ऐजी दषा कबे-शुभे असो?” तेने बुलो होंदणू शी ऊबी ऐजी ही दषा असो।

²² ईयों दुष्ट-आत्त्मा ऐ ऐसी नाँष कर्णो खे कभिऐ आगी मुँझी अरह् कभिऐ पाँणी मुँझी पाया, अरह् जे किऐ तुँऐं करी सको, तअ आँमों गाशी तरष करियों, दया-रंय्म करो।

²³ प्रभू यीशू ऐ तेस्खे बुलो, “जे किऐ तुँऐं करी सको? ऐजी का बात हऐ! बिश्वाष कर्णो वाल़े खे सब-कुछ हऐ सको।”

²⁴ बालको के बाबा ऐ तैख्णी प्रभू के हाथे-लात्तें पड़ियों बुलो, “हे प्रभू हाँव बिश्वाष करू, मेरे बै-बिश्वाष का किऐ ऊपाया करह्।”

²⁵ जबे प्रभू यीशू ऐ दे:खो, के लोगे बिच़ड़ियों भीड़ लाऐ लऐ, तअ तियों नींच दुष्ट-आत्त्मा ऐशी बुलियों झाड़ी, “ओ गूँगी अरह् जाईरीं दुष्ट-आत्त्मा, हाँव ताँव्खे अज्ञाँ देऊँ ऐस शी निक्ल़ी ज़ा, अरह् ऐस्दे हजो कद्दी ने आऐं।”

²⁶ तबे सेजी नींच दुष्ट-आत्त्मा लेरंह् मारियों तेसी टंड्के च़ुड़ी-मुछियों, तेस शी आगू निक्ल़ी, अरह् सेजा टडंका अदमंरा जिया हुआ, ऐत्रे ज़ूगा के कंई लोगे बुलो, ऐ मरी गुवा।

²⁷ तबे प्रभू यीशू ऐ तेस्का हाथ थाँम्ब्ड़ा, अरह् तेसी ऊबा बिऊँजाल़ा अरह् तबे से तैख्णी खड़ा हुआ।

²⁸ जबे प्रभू यीशू घरे आऐ, तअ चैले ऐ ऐकलाल़े दो तिन कैई शो पुछो, “अमाँरी जाँणे ऐजी दुष्ट-आत्त्मा कैई ने निक्ल़ी?”

²⁹ तबे प्रभू यीशू ऐ चैले खे बुलो, “ऐजी जात्ति बिना प्रार्थना के कोसी ओकी ऊपाऐ शी निक्ल़ी ने सक्दी।”

आप्णी मँऊती अरह् हजो ऊबे जीऊँणों के बारे दी प्रभू यीशू के दुज़ी: बरंम्बाणीं

³⁰ तबे तेथै शे निकल़ियों प्रभू यीशू गलील ईलाके बाटी चाले, अरह् से ऐजो चहाँव ने थिऐ, के कोसी कैई ईयों यात्रा का किऐ पता लागो।

³¹ किन्देंखे के प्रभू यीशू आप्णे चैले खे शिक्क्षा देंदे बुलो थिऐ, के “आदमी का बैटा, आदमी के हाथे थँम्ब्ड़ाया ज़ाँदा, अरह् से तेसी मारी देले; अरह् से हजो च़ीज़े का ऊबा जीऊँदा।”

³² परह् सेजी बात चैले के बै-सम्झी गऐ, अरह् से सेजो प्रभू यीशू कैई शो पुँछ़णों शे डरह् थिऐ।

सोभी शा बड़ा कुँण असो?

³³ तबे प्रभू यीशू आप्णें चैले आरी कफरनहूम दे आऐ, अरह् भीतर आऐयों प्रभू ऐ चैले शो पुछो, “बाटो पुँडीं तुऐं कियों बातो गाशी भंऐस करी लऐ थी?”

³⁴ तबे चैले चुप्पी रूऐ, किन्देंखे के तिन्ऐ बाटो पुँडीं ऐजी ठाट करी लऐ थी, के आँमों मुँझ शा बड़ा कुँण असो।

³⁵ तबे प्रभू यीशू ऐ बऐठियों बारंह् चैले बईदे अरह् तिनखे बुलो, “जे कुँऐं तुओं मुँझी बड़ो बण्णों चहाँव, तअ से आगे तुओं सभी शा छूटा अरह् सोभी का दास बणों।”

³⁶ तबे प्रभू यीशू ऐ ऐक बालक खड़ा करा, अरह् तेसी आप्णी हँगाल़ीं दा करियों चैले खे बुलो।

³⁷ “जुण्जा कुँऐं मेरे नाँव शा, ऐसी बालक जेष्णाँ, कोसी ऐक बालक माँनंला, से मुँह मान्दा, अरह् जू कुँऐं मुँह माँनंला, से मेरा डियाल़णो वाल़ा भे माँन्दा ऐ।”

जू बिरूध ने करदा से अमाँरी गईलो असो

³⁸ तबे संत्त-यूहन्ना ऐ प्रभू यीशू खे बुलो, “हे गुरू जी! आँमें ऐक आदमी तुवाँरे नाँव शा दुष्ट-आत्त्मा गाड़दिऐ दे:खा, अरह् आँमें तबे तेस्खे मंना करो, किन्देंखे के से अमाँरी गईलो ने हंदा।”

³⁹ प्रभू यीशू ऐ चैले खे बुलो, “तेस्खे मंना ने करे, किन्देंखे के ऐशा कुँऐं ने आथी, जू मेरे नाँव शे चींन-चंम्त्तकार करह्, अरह् तबे तैख्णी मुँखे बुरो-भलो बुल़्ला।

⁴⁰ किन्देंखे के जुण्जा अमाँरा बिरूध ने करदा, से अमाँरी गईलो असो।

⁴¹ जुण्जा कुँऐं ऐक गिलास पाँणी तुँओं कैई शो मेरे नाँव, अरह् ईन्देंखे पियाला के तुँऐं मसीया के असो, तअ हाँव तुँओं खे खास बात बुलू, के तेसी तिन्दे का ईनाँम जरूर भेंट्ला।

ठोकंर-ढैस का कारण ने बणें

⁴² “जुण्जा कुँऐं ईनू नहाँन्ड़िया मुँझ्षा शा जिन्ऐं मुँह गाशी बिश्वाष करी थुवा, ईनू कसी खे भे ढैस-ठोकंर पाप का कारण बंणों, तअ तेस्खे ऐजो भलो हंदो के ऐक बड़ी चाक्की का पाट तेस्की टाटी दा बानियों तेसी संमुन्द्रो दा पाईदा।

⁴³ जे तेरा हाथ ताँव कैई शो पाप कराँव, तअ तेसी काटी दे, किन्देंखे के तेसी दुई हाथे नंर्को दो ज़ाणों पड़ो; तअ तेस्खे ऐजो आछो असो, के तू टूडा हऐयों ऐसी जीवन शा स्वर्गो दा हुटे, किन्देंखे के नंर्को के आग कद्दी ने हिष्दी,

⁴⁴ (जेथै नंर्को का किड़ा कद्दी ने मरदा, अरह् ना तेथै के आग कद्दी भे हिष्दी)

⁴⁵ जे तेरा लात्त ताँव कैई शो पाप कराँव तअ तेसी काटी दे, किन्देंखे के दूई लात्तें नंर्को दो ज़ाणों शो भलो-आछो ऐजो असो, के तू लंगड़ा हऐयों ऐसी जीवन शा स्वर्गो दा ज़ाऐं।

⁴⁶ (जेथै ना तअ नंरक का किड़ा कद्दी मरदा, अरह् ना तेथै के आग कंद्दी भे हिष्दी।)

⁴⁷ जे तेरी आँख ताँव कैई शो पाप कराँव तअ तियों ऊँडी गाड़, किन्देंखे के काँणा हऐयों पंणमिश्वर के राज्य दो ज़ाँणों ताँव्खे भलो असो, जू कद्दी ऐशो ने हईयों के ताँव दूई आ:खिऐं नंर्को दा ने पाऐ देंई।

⁴⁸ जेथै नंरक का किड़ा कद्दी ने मरदा अरह् तेथै के आग कंद्दी ने हिष्दी।

⁴⁹ किन्देंखे के बादे झोणें आगी लई खँरियाल़ें कर्ले।

⁵⁰ खारो जीवन दी ऐक जरूरी चींज असो, परह् जे खारे का सुवाद बिगड़ी ज़ाँव, तअ ऊको किदे लई खँरयाल़ों बण्दों? आपु खारे जेष्णें शाँण्त्ति शे मिली-चालियों रूऐ।”