मरकुस 8 - Sirmouri

¹ तेथै जबे लोगो के बैशुमाँर बड़ी भीड़ कठी हऐ, अरह् तिन कैई किऐ खाँणों खे ने थी, तबे प्रभू यीशू ऐ आप्णे चैले आपु कैई बऐदियों तिनखे बुलो।

² “मुँह ईयों भीड़ो की घीणो लागी रोही, ईनू गाशी तरष आऐ रूवा, किन्देंखे के ऐ च़ींन देसो शुभे बराबर मेरी गईलो चाली रूऐ, अरह् इन कैई खाँणो खे किऐ ने आथी।

³ जे हाँव ईनू भूखी घरे डियाल़ू तअ बाटो पूडे ऐ खड़ी ज़ाँदे, किन्देंखे के ईन मुझशे कऐ लोग दुर्के शे आऐ रूऐ।”

⁴ चैले ऐ प्रभू यीशू खे जबाब दिता, “ईथे जाँगल़ों दी ऐत्री रोटी केथै शी लियाँणी जू ईन कैई शो छ़कियों खियावं।”

⁵ प्रभू यीशू ऐ चैले शो पुछो, के “तुँओं कैई ईथे केतोड़ी रोटी असो”? चैले ऐ बुलो, के आँमों कैई “सात्त” रोटी असो।

⁶ तबे प्रभू यीशू ऐ लोगो खे ज़ूब्ड़ी धर्ती गाशी बईठणों के अज्ञाँ दिती, अरह् सात्त रोटी आप्णें हाथो दी करियों धन्यबाद देऐयों च़ुड़ी, अरह् आप्णे चैले कैई दिती के ईनखे बाँडो, अरह् चैले ऐ लोगों खे बाँडी।

⁷ चैले कैई दाँणिक नहाँन्ड़ी-नहाँन्ड़ी माँछी घिऊँरी थी, सेजी भे प्रभू यीशू ऐ धन्यबाद करियों आप्णे चैले कैई बाँडणों के अज्ञाँ दिती।

⁸ सेजे लोग खाऐयों छ:की गुवे, अरह् चैले ऐ बंचे अंदे टूक्ड़े की सात्त शेक्ड़ी भरियों शियों लाऐयों संलाई।

⁹ अरह् से किऐ चार हजार के लगं-भगं मरोद् थिऐ, अरह् तबे प्रभू यीशू ऐ तिनू बिदा करे।

¹⁰ अरह् प्रभू यीशू ऐ तैख्णी आप्णे चैले आरी नाँव दे बऐठियों दलमनूता इलाके खे हुटे।

यहूदी भाट-बाँम्ण ऐ स्वर्गो के चींन-नीसाँणीं माँगी

¹¹ तबे यहूदी भाट-बाँम्ण ऐ आऐयों, प्रभू यीशू की गईलो भंऐस कर्दे लागे, अरह् तिन्ऐं तिनू पर्खणों खे स्वर्गो की चींन-नीसाँणीं की माँग करी।

¹² प्रभू यीशू ऐ आप्णी पबित्र-आत्त्मा शो जाँणी पाओ, अरह् शुष्कार छुड़ियों बुलो, “ऐसी ज़ुगौ के लोग चींन-चम्तकार कैई जूवों? हाँव तुँओं खे खास बात बुलू, के ऐसी ज़ुगौ के लोगो खे किऐ चींन-चम्तकार ने दिऐ ज़ाँदे।”

¹³ तबे प्रभू यीशू तिनू लोग छुड़ियों हजो नाँव गाशी बईठे अरह् पाईले ढबे हुटे।

यहूदी भाट-बाँम्ण अरह् हेरोदेस को खाटो आटा

¹⁴ चैले रोटी नींणीं बिसरी गुऐ, अरह् तिन कैई नाँव गाशी सिर्फ ऐक रूटी थी।

¹⁵ अरह् प्रभू यीशू ऐ तिनखे अज्ञाँ दिती, “दे:खो यहूदी भाट-बाँम्ण अरह् हेरोदेस के खाटे आटे शे च़ौक्क्ष रूऐ।”

¹⁶ चैले आपु मुँझी भंऐस कर्दे लागे, के “आँमों कैई रोटी ने आथी” ईन्देंखे प्रभू यीशू ऐ ऐष्णों बुली लों।

¹⁷ प्रभू यीशू ऐ ऐजो जाँणी पाओ, अरह् तिनखे बुलो, तुँओं कैई “रोटी ने आथी ईन्दें के बारे दी तुँऐ कैई भंऐस करी लऐ? कियों तुवाँरे ऐबे भे सम्झ आऐ ने रंई? कियों तुवाँरा दिल कुठूर हऐ रूआ।

¹⁸ आँ:खी हंदे भे तुँऐं दे:ख्दे ने अरह् काँन हंदे भे तुँऐं शुण्दे ने, कियों तुवाँरे किऐं ने चींत्ते आथी?

¹⁹ के जबे मुँऐ पाँच हजारंह् आदमी खे पाँच रोटी च़ुड़ी थी, तअ तुँऐं टूक्ड़े की केतोड़ी शेक्ड़ी भरियों सलाऐ थी?” चैले ऐ बुलो, “बारंह् शेक्ड़ी।”

²⁰ “जबे चार हजारंह् लोगो खे सात्त रोटी थी, तअ तुँऐं टूक्ड़े की केतोड़ी शेक्ड़ी भरियों सलाई?” चैले ऐ प्रभू यीशू खे बुलो, “सात्त शेक्ड़ी।”

²¹ तबे प्रभू यीशू ऐ आप्णें चैले खे बुलो, “कियो तुँऐं हजो भे सम्झी ने रोही?”

बैतसैदा दा ऐक शेड़ा चाँगा करा

²² प्रभू यीशू अरह् चैले बैतसैदा दे आऐ, अरह् लोगे ऐक शैड़ा तिन कैई लियाऐया, अरह् ढाल-अरज करी के ऐसी छुवों।

²³ प्रभू यीशू ऐ तेसी शैड़ा थाँम्ब्ड़ियों गाँव शा बाऐरा नीयाँ, अरह् तेस्की आँ:खी दो थूको, अरह् तेस गाशी हाथ थह्ऐयों तेस कैई शो पुछो, “कियो तेरे किऐ दे:खींदों लागो?”

²⁴ तेने ऊबे खे दे:ख्दे बुलो, “मेरे लोग झाँमंरे दे:खिदे लागे, परह् ऐ ऐशे दे:खी रूऐ, जेष्णें डाल़ चाली रूऐ।”

²⁵ तबे प्रभू यीशू ऐ दुज़ाल़िऐं तेस्की आँ:खी गाशी आप्णा हाथ थुवा, अरह् तेसी शैड़े के सूवों करियों साफ-साफ दे:खिदों लागो, अरह् से बिलकुल चाँगा हुआ।

²⁶ प्रभू यीशू मसीया ऐ तेसी शैड़ा तेथै शा घरे डेयाल़ा, अरह् ऐजो बुलो, के “ऐबे ऐसी गाँव दे भीख भे ने पाऐ।”

संत्त-पतरस ऐ प्रभू यीशू “मसीया” माना

²⁷ प्रभू यीशू आप्णे चैले आरी कैसरिया ईलाके के फिलिप्पी के नंगर कैई आईले-पाईले गाँव दे हुटे। अरह् बाटो पुडो तिन्ऐं आप्णें चैले कैई शो पुछो, के “लोग मुँखे का बुलो”?

²⁸ चैले ऐ जबाब दिता, “संत्त-यूहन्ना नहाँण-नहाँणों वाल़ा, परह् कुँऐ-कुँऐं बुलो, ऋषी-एलिय्याह, अरह् कुँऐ-कुँऐ बरंम्बाणीं कर्णो वाल़ा कुँऐं ऐक ऋषी जेष्णाँ ऋषी बुलो।”

²⁹ प्रभू यीशू ऐ चैले शो पुछो, “परह् तुँऐं मुँखे का बुलो? तबे संत्त-पतर ऐ जबाब दिता, के तुँऐं मसीया असो।”

³⁰ तबे प्रभू यीशू मसीया ऐ तिनखे अज्ञाँ दिती, के मेरी बारे दो कोसी कैई ने बुले।

प्रभू यीशू ऐ आप्णी मऊँत्ती अरह् ऊबे जीऊँणों की आगली बरंम्बाणीं करी

³¹ तबे प्रभू यीशू मसीया तिनू कैई शो ऐजो शिखाँदे लागे, के ऐजो जरूरी असो, के आदमी का बैटा बैजाऐ दु:ख भोग्दे, अरह् यहूदी लोगो के ठग्ड़ै, प्रधान-याजकों, अरह् यहूदी-निय्म, शिखाणों वाल़े, तिनू छुटे बाँण्ले, अरह् तेस्की हंत्त्या करी देले, अरह् से च़ींन देसो पाछी मरे अंदे मुँझ शे जीऊँदे हले।

³² प्रभू यीशू ऐ ऐजी बातो तिनशी साफ-साफ बुली, ईन्दें गाशी संत्त-पतरस ऐ तिनू ज़ई नींऐं अरह् सम्झाँदा लागा।

³³ परह् प्रभू यीशू तेख्णी पाछू फिरीयों चैले संत्त-पतरस की ढबे दे:खियों झिंड़कियों तेस्खे बुलो, “ओ शैतान, मेरी साम्णें शा दूरका ज़ा; किन्देंखे की तू पंणमिश्वर की बातो गाशी ने, परह् आदमी की बातो दा आप्णा मंन लाऐं।”

प्रभू यीशू पाछी चाल्णों का मतल्व

³⁴ प्रभू यीशू ऐ लोगो की बादी भीड़ो आरी आप्णें चैले समेंत आपु कैई बऐदियों बुलो, के “जुण्जा कुँऐं मुँह पाछी आँणो चहाँव, सेजा आपु-आप्खे बिसरी ज़ाव, अरह् से आप्णा शुँल़ी-फ़ाँशी थागियों मुँह पाछी चालो।

³⁵ किन्देंखे के जुण्जा कुँऐं आप्णा जीवन बंचाँव, से तेसी गुवाल़ा; परह् जुण्जा कुँऐं मेरे अरह् खुषख्बरी की ताँईऐं आप्णें प्राण गुवाऐं देला से आप्णा जीवन बचादा।

³⁶ का फाय्दा असो, के आदमी खे बादी संईसारी को राज भेंट्लो; अरह् से आप्णी जीवन प्राण का नुकसाँन करला?

³⁷ आदमी आप्णे जीवन प्राण के बरा-बरी किदे आरी करह्?

³⁸ जुण्जा कुँऐं ईयो नाँष बाँन अरह् पाप वाल़े ज़ूंग दा मुँह अरह् मेरे बचन दा सरमाँऐं ज़ाव तेस्खे आदमी का बैटा भे जबे आप्णें पिता की बड़ियाई दा पबित्र स्वर्गदूत्त की गईलो आला, तअ से भे तेसी मानणों दा सरमाँऐं ज़ाँदा।”