मरकुस 7 - Sirmouri

¹ तबे किऐ यहूदी भाट-बाँम्ण अरह् किऐ यहूदी-निय्म के शिखाणों वाल़े यरूशलेम शे आऐ, अरह् से प्रभू यीशू मसीया कैई कठे हुऐ।

² अरह् तिन्ऐ प्रभू यीशू मसीया के चैले बिना हाथो धूई खाणों खाँदे दे:खे,

³ यहूदी भाट-बाँम्ण अरह् बादे यहूदी लोग हाथ आछे करियों धुऐ बिना, भोजन ने करो थिऐ, ऐष्णों कर्दे से आप्णें बुड़े पुराँणियाऐं शुभी चाले अंदे रीत्ति-रूवाज का पाल़्ण करो थिऐ।

⁴ हाटों शे पाछू आणों गाशी से बिना नहाँई-धूई शुद्ध हुऐ बिना, भोजन ने करह् थिऐ, से आप्णें पाछले रीत्ति-रूवाज का पाल़्ण करह् थिऐ, अरह् ऊकी भे कंऐं बातो थी, जू से माँनों थिऐ, जैष्णाँ बेलुऐ-लूट्ड़ीं, घड़े, अरह् च़ाँबे के बास्णों धूणें-माँज्णें।

⁵ यहूदी भाट-बाँम्ण अरह् यहूदी-निय्म के शिखाणों वाल़े, प्रभू यीशू मसीया शे सुवाल कर्दे लागे। “तुवाँरे चैले बुड़े पुराँणियाऐं शे ऊबे चाले अंदे रीत्ति-रूवाज का पाल़्ण कैई ने कर्दे? ऐ बिना हाथो धूई खाणों खे कैई खाँव।”

⁶ प्रभू यीशू मसीया ऐ तिनखे जबाब दिता, तुओं पार्खंडियों खे “बरंम्बाणीं कर्णो वाल़े ऋषी-यशायाह ऐ जैष्णो पबित्र-ग्रन्थों दो लिखी थो: ऐजे लोग सिर्फ ओंठो लई ही मेरा आदर-ईज्जत करह्, परह् ईन का दिल मुँह शा बैजाऐ दूरका असो।

⁷ मेरी प्रार्थना ऐ बै-कार ही करह्, किन्देंखे के ईनकी शिक्क्षा सिर्फ आदमी के दिमाँक के ही अज्ञाँ असो।

⁸ “तुँऐं आदमी के रीत्ति-रूवाज का तअ पाल़्ण करह्, परह् पंणमिश्वर की अज्ञाँ टाल़्दे जाँव।”

⁹ प्रभू यीशू ऐ तिनखे बुलो, “तुँऐं आप्णे मतल्व की ताँईऐं पंणमिश्वर के अज्ञाँ आच्छ़ी करियों टाल़ो!

¹⁰ ईन्देखे के ऋषी-मूसा खे भेटे गुऐ, यहूदी-निय्म दो बुलो गुओ, के तुँऐं ‘आप्णे माँ-बाबा का आदर-ईज्जत करह्, अरह् जुण्जा कुँऐं आप्णें माँ-बाबा खे बुरो बुलो, तेस्खे तुऐं मऊँत्ती की सजा की अज्ञाँ दियों।’

¹¹ परह् तुँऐं बुलो, के जे कुँऐं आप्णे माँ-बाबा खे बुलो, के जुण्जा तुँओं किऐ मुँहँ शा फाय्दा हंदा थिया, सेजा मुँऐं पंणमिश्वर खे दाँण करियों संकल़प करी थूवा।

¹² अरह् तुँऐं तिनू आप्णें माँ-बाबा के सेवा ने कर्णो देंदे।

¹³ आप्णें ईनू रीत्ति रूवा के कारण जुण्जे के तुओं मुझी ज़ूगौ शे ऊबे चाली रूऐ; ईन्दें लई तुऐं पंणमिश्वर का बचन टाल़ी दियों; अरह् आपू ऐष्णें ही कंऐयों काँम-काज़ करह्।”

पंणमिश्वर के साम्णें अशुद्ध कर्णो वाल़ी बातो

¹⁴ तबे प्रभू यीशू ऐ लोग आपु कैई बऐदियों बुलो, “तुँऐं बादे झुणे मेरी शुणो अरह् सम्झो।

¹⁵ ऐष्णी किऐ चीज ने आथी, जू बाऐरे शी आदमी के करंम-भूटों, परह् जुण्जी चींजो आदमी शी बाँईडी निंक्ल़ो, सेजी ही चींजो आदमी के करंम-भूटों।

¹⁶ (जे कुँऐं शुण्दे-भोंण्दे हों जिनके शुण्णों खे काँन हों से काँनों लाऐयों शुणें)”

¹⁷ जबे प्रभू यीशू लोगो के भीड़ो कैई शे घरे हुटे, तअ तिनके चैले ऐ तिन कैई शो तेसी अनाँणें के बारे दो पुछो।

¹⁸ प्रभू यीशू ऐ तिनखे बुलो, “कियो तुँऐं ऐत्रें ज़ंगोर असो? कियो तुँऐं भे ऐष्णे बै-सम्झ असो? ऐजो सम्झो दे ने, के जुण्जी चीज आदमी खाँव से तिन्दे के जाँणें अशुद्ध ने हंदी?

¹⁹ किन्देंखे के सेजी चींज तेसी आदमी के सासो दे ने, परह् तेसके पेटो दे ज़ाँव, अरह् सेजी चीज तेस्के हगदी बई गूओ आरी निक्ल़ी ज़ाँव? ऐजो बुलियों प्रभू यीशू ऐ बादी खाँणों के चींजो शुद्ध बाणी।

²⁰ प्रभू यीशू ऐ बुलो, के जुण्जो आदमी शो निक्ल़ो तिन्दी लई आदमी पंणमिश्वर के साम्णें अशुद्ध हों।

²¹ किन्देंखे के भित्रो शी मतल्व आदमी के मंन शे बुरे-बूरे बिचार, चोरी-जारी, चोरी, हंत्त्या, पराई तिरोंई आरी कुकर्म कर्णें।

²² लोभ, लाल़्च, दुष्टता, छल़-कप्ट, लूची, बुरी नंजर, नीदया-चुगली, घमन्ड अरह् मुरूख्ता ही निकल़ो।

²³ ऐजी बादी बुरी बातो आदमी के सासो शी ही निक्ल़ो, अरह् ईदे लई आदमी पंणमिश्वर के साम्णें अशुद्ध बंणों।”

सुरूफिनीकी गऐर यहूदी के तिरंई का बिश्वाष

²⁴ प्रभू यीशू तेथै शे बिऊँजिऐयों सूर अरह् सैदा के इलाके दे आऐ, अरह् ऐकि घर दे हुटे, ऐजो जाँणियों के कोसी कैई पता ने लागो, परह् प्रभू लोगो कैई शे छूटी ने सकी।

²⁵ तिनके बारे दो शुंणियों ऐक तिरंऐ तिन कैई भेंट कर्दी आऐ, जिंयाँरी धीं-बैटी दी दुष्ट-आत्त्मा थी, से तिन्दे शी बैजाऐ दु:खी थी, अरह् से आँदे ही प्रभू यीशू मसीया की लातो गाशी पढ़ी।

²⁶ से यूनानी अरह् सुरूफिनीकी गऐर यहूदी थी, तिऐं प्रभू यीशू शी बिनती करी; के मेरी बेटी शी दुष्ट-आत्त्मा निकाल़ी दियो।

²⁷ प्रभू यीशू ऐ तियों खे बुलो, “आगे नहाँन्ड़िया ढँटियों-छ:कियों खाँणों दियों, किन्देंखे के नहाँन्ड़िया की रोटी कुत्ते खे ने दिऐं, ऐजो ठीक आथी ने।”

²⁸ तिऐं प्रभू यीशू खे जबाब दिता, “संत्तिऐ प्रभू जी, परह् कुत्ते तअ आपु धनियों शो चूगों नहाँन्ड़िया को जूठो जूँऐयों खाँव।”

²⁹ प्रभू यीशू ऐ तियों खे बुलो, “ऐजी बात असो, तअ आगू ज़ा किन्देंखे के तेरी बेटी दुष्ट-आत्त्मा शी छूटी गऐ, से ठीक हऐ रंह्ऐ।”

³⁰ तबे तिऐं तिरंई आप्णे घरे ज़ाऐयों दे:खो के तियारी धीं-बैटी माँजे गाशी सुत्ति अंदी थी, अरह् दुष्ट-आत्त्मा तियों शी निक्ल़ी रंऐ थी।

जाऐरा होक्ल़ा आदमी चाँगा हुआ

³¹ तबे प्रभू यीशू सूर अरह् सेदा के इलाके शे नीक्ल़ियों दिकापुलिस बाटी गलील के झील गाशी पईचे।

³² तबे लोगे ऐक जाऐरा जू होक्ल़ा भे थिया, प्रभू यीशू कैई लियाऐया, अरह् तिनखे ऐशी ढाल-अरज करी, के आप्णा हाथ ऐस गाशी थो।

³³ तबे प्रभू यीशू ऐ तेसी लोगो के भीड़ो शा ज़ई नीयाँ, अरह् आप्णी गूट्ठी तेस्के काँनों दे पाई, अरह् आप्णी ज़ात्ति-मुँह शो थूक तेस्की जीबो दो लाव।

³⁴ अरह् स्वर्गो के ढबे दे:खियों, शुष्कार भरा, अरह् तेस्खे बुलो, “इप्फतह”! मतल्व “खुल ज़ा।”

³⁵ तेस्के काँन खुली गुऐ, अरह् तेस्के जीबो की गाँठ भे खुली गऐ, अरह् से साफ-सुथंरा बुल्दा लागा।

³⁶ तबे प्रभू यीशू ऐ तेस्खे अज्ञाँ दिती, के कोसी कैई ने बुले, परह् जेतोड़ो तेस कैई शो सम्झाव थियो, तेने तिन्दें शा जादा प्रचार करा।

³⁷ लोग बैजाऐ हेराँन हऐयों बुल्दे लागे, के “प्रभू यीशू ऐ जुण्जो किऐ करो, सेजो आछो करो; तिन्ऐ जाऐरें-हुक्ल़े खे शुंण्णों अरह् बुल्णों के शक्त्ति दिती।”