मत्ती 27 - Sirmouri

पिलातुस के साम्णें प्रभू यीशू

¹ जबे झ़ीष हऐ तअ बादे प्रधान-याजकों अरह् यहूदी लोगो के ठगड़े ऐ प्रभू यीशू मार्णों की ठाट करी।

² तिन्ऐ प्रभू यीशू बाँने, अरह् पिलातुस हाक्म के हाथों दे देऐ दिते।

यहूदा इस्करियोती ऐ दाँव लाओं

³ तबे प्रभू यीशू थँम्बड़ाँणा वाल़े यहूदा इस्करियोती ऐ दे:खो, के प्रभू यीशू कसूरबार बंणाया गुवा, तअ से पस्ताया अरह् सेजे तीष चाँदी के सिक्कै प्रधान-याजकों अरह् यहूदी लोगों के ठगड़े कैई पाछू आँणें

⁴ अरह् बुलो, “मुँऐ बै-कसूर मार्णो खे थंम्ब्ड़ाऐयों पाप करी थुवा!” तिन्ऐ बुलो, “आँमें कैई? तू ही जाँण।”

⁵ तबे यहूदा इस्करियोती ऐ सेजे चाँदी के सिक्के देऊँठी दे फेरकाऐयों आगू हुटा, अरह् ज़ाऐयों आपु-आप्खे दाँव लाओं।

⁶ प्रधान-याजकों ऐ तिनू चाँदी के सिक्कै करियों बुलो, “ईनू, देऊँठी के भंडारें दे थंहणें ठीक ने आथी; किन्देखे के ऐ लह्ऊँ का दाँम असो।”

⁷ तअ: तिन्ऐ ठाट करियों तिनू तीष चाँदी के सिक्कै शो प्रदेशी दाब्णों खे ऐक कुमार को खैच़ मोंले करो।

⁸ ईन्देखे ऐतलो तोड़ी तेथू खेच़ौ खे लह्ऊँ को खैच़ बुली।

⁹ तबे जुण्जा बचन ऋषी-यिर्मयाह पंणमिश्वर की बरंम्बाणीं कर्णो वाल़े के जाँणें बुला गुवा थिया, सेजा पुरा हुवा: “तिनिऐं तीष सिक्कै मंतल्व सेजा बंणाँया अंदा दाँम, (जेसी इस्राएल की अलादी मुँझ्शा भहिते ऐ बंणाँऐं थुवा थिया) ऊडा करा,

¹⁰ अरह् जेष्णी प्रभू ऐ मुँखे अज्ञाँ दिती थी; तेष्णें ही कुम्हाँर के खेच़ौ के मोलों मुझी देऐ दिता।”

पिलातुस के सुवाल

¹¹ जबे यीशू हाक्मों के साम्णें खड़ा थिया, तअ हाक्में तेस्शो पुछो, “कियों तू यूहदियों का राजा असो?” प्रभू यीशू ऐ तेस्खे बुलो, “तुँऐं आपु ही बुली लों।”

¹² जबे प्रधान-याजकों अरह् यहूदी लोगों के ठगड़ेें तिनू गाशी दोष-कसूर लाऐ लुऐं थिऐ, परह् प्रभू यीशू ऐ तिन्दें का किऐं जबाब ने दिती।

¹³ ईन्दें गाशी हाक्म पिलातुस ऐ प्रभू यीशू खे बुलो, “कियों तेरे शुणिदो ने, के ईन्ऐं तेरे बिरूध केत्री बड़ी गुवाह्-शाज़्त देऐ लऐ?”

¹⁴ प्रभू यीशू ऐ पिलातुस खे कोसी भी दोष-आरोप का किऐ जबाब ने दिती, तबे हाक्म के तूरंबाँणच़ूटे।

मंऊँत्ती की सजा की अज्ञाँ

¹⁵ फ़सह के तेयारों मुँझी रित्ति-रूवाज के मुँताबिक हाक्म की तरफ शा सेजा कय्दी, जेसी लोग चहाँव थिऐ, तेसी छुड़ी देई थिया।

¹⁶ तेसी बख्त्ते कय्दी दा बरअब्बा नाँव का खुखार अपराधी कय्द थिया।

¹⁷ ईन्देंखे जबे लोग कठे हुऐ, तअ पिलातुस ऐ तिन कैई शा ऐजा सुवाल करा, “हाँव तुओं खे कोसी छुड़ी देऊँ; बरअब्बा, के यीशू, जेस्खे मसीया बुली? तुँऐं का चहाँव?”

¹⁸ पिपातुस ऐजो जाँणों थिया, के सिर्फ जल़ण के कारण ही ईन्ऐं यीशू तेस्के हाथो दा देऐ थुवा।

¹⁹ जबे हाक्म पिलातुस नियाँव के सिंगास्हणों गाशी बईठा अंदा थिया, तअ तेस्की घरवाल़िऐं तेस्खे ऐजा शुज़ा दिता, के “तू ऐसी धरंमाँत्त्मा आदमी को किऐ ने करे, किन्देंखे के बियाल़ी रात्ती मुँह सुईंणें दा ऐस्के कारण बैजाऐ दु:ख संहणा पड़ा”।

²⁰ प्रधान-याजकों अरह् यहूदी लोगों के ठगड़ेें ऐ ओके लोग ऊक्साऐं के से आपु खे बरअब्बा माँगों, अरह् यीशू खत्त्म कराँव।

²¹ हाक्में तिनू लोगों कैई शो पुछो, “ईनू दुई मुँझ्शा तुँऐं कोसी चहाँव; के हाँव तुँवारी ताँईऐं छुड़ी देऊँ?” तिन्ऐ “बुलो, बरअब्बा।”

²² हाक्म पिलातुस ऐ तिन कैई शो पुछो, “तबे यीशू जेस्खे मसीया बुली, तेस्को का करू?” सभिऐं तेस्खे बुलो, “ऐसी शुँल़ी-फ़ाँशी चड़ाया ज़ाँव!”

²³ हाक्में बुलो, “कैई, ऐने का बुरो करी थो?” परह् से हजो भे बैगेही ले-लेल्याऐ-लेल्लियाऐयों बुल्दे लागे, “ऐसी शुँल़ी-फ़ाँशी चड़ाया ज़ाँव।”

²⁴ जबे हाक्म पिलातुस ऐ दे:खो, के किऐ ने करिन्दो, परह् ईन्दें के बिरूध बैगेही हाला-घुला हंदा लागा, तअ तेने पाँणी करियों लोगो की भीड़ के साम्णें आप्णें हाथ धुऐं अरह् बुलो, “हाँव ऐसी धर्मी के लह्ऊँ शा बै-कसूर असो; तुँऐं ही जाँणों।”

²⁵ लोगें जबाब दिता, “ऐस्को लह्ऊँ आँमों अरह् अमाँरी अलादी गाशी हों!”

²⁶ ईन्दें गाशी हाक्म पिलातुस ऐ बरअब्बा तिनकी ताँईऐं छुड़ी दिता, अरह् यीशू दे कोड़े लुवाऐयों देऐ दिता, के शुँल़ी-फ़ाँशी चड़ाया ज़ाँव।

सपाईऐं प्रभू यीशू की बैस्ती करी

²⁷ तबे हाक्मों के सपाईऐं यीशू किले दा नीईयों बादी पल़्टणं तेसी बाऐरी चौऊँ ढबे कठी हऐ,

²⁸ अरह् तेस्के खोट्णों खुलाऐयों, तेस कैई शा लाल रंग का चौगा बंम्बायाँ,

²⁹ अरह् काँडे को ताज बुणियों यीशू के मुँढो गाशी थुओं, अरह् तेस्के सुऐं हाथों दो सुरवाँठ दितो, अरह् तेस्के साम्णें घुन्ढू नाँऐयों ठाठै खे कर्दे लागे, अरह् बुलो, “हे यहूदियों के राजा, नंमष्कार!”

³⁰ अरह् तेसी गाशी थूको; अरह् सेजो ही सुरवाँठ तेस कैई शो ऊँडो करियों तेस्की ही मुँढों दी मार्दे लागे।

³¹ जबे तिन्ऐ तेसी ठाटै खे करी पाया, तअ सेजा चुंगा तेसी कैई शा ऊडा खुलाऐयों हजो पाछु तेस्के ही खोट्णों तेस कैई शे बंम्बाऐ, अरह् शुँल़ी-फ़ाँशी चढ़ाणों खे आगू नींयाँ।

यीशू शुँल़ी-फ़ाँशी चढ़ाऐंयाँ

³² बाँईडे ज़ाँदी बई तिनू शमौन नाँव का ऐक कुरेनी आदमी भेटा। तिन्ऐ तेसी बेंगार दा थाँम्ब्ड़ा, के यीशू का शुँल़ी-फ़ाँशी थागियों चाल।

³³ तेसी जागा दा जिन्दें गुलगुता मतल्व खोप्ड़ी की जागा बुली, तेथै पंऐचियों

³⁴ तिन्ऐ खाँटा दाख्ह्-अंगूरोह् का रंस यीशू खे पीणों खे दिता, परह् तेने चाखियों तेथू पीई ने आथी।

³⁵ तबे तिन्ऐ तेसी शुँल़ी-फ़ाँशी चढ़ाया, अरह् पार्ची पाऐयों तेस्के खोट्णों बाँडी पाँऐ।

³⁶ अरह् तेथै बऐठियों तेस्का पऐरा देंदे लागे।

³⁷ अरह् तेस्का दोष-कसूर की पत्री तेस्के मुँढो गाशी लाऐ, के “ऐजा यीशू असो जू यहूदियों का राजा असो”।

³⁸ तबे तेसी आरी दो डाकू ऐक सुऐं ढबे अरह् ओका डेरे ढबे शुँल़ी-फ़ाँशी चढ़ाऐ।

³⁹ आँणों-ज़ाणों वाल़े लोगे आप्णें मुँढो झिकाल़ी-झिकाल़ियों तेस्की नीदया करह् थिऐं,

⁴⁰ “अरे तू! तू तअ बुले थिया, के देऊँठी ढाल़ी दियों, अरह् हाँव ऐथू च़ीज़े को खड़ो करी देऊँबा, ऐबे आपु तअ बंचाऐयों दे:ख! जे तू पंणमिश्वर का बैटा असो, तअ ऊदा आ शुँल़ी-फ़ाँशी गैछ़ा।”

⁴¹ ऐशो ही दाँई प्रधान-याजकों यहूदी निय्म शिखाणों वाल़े, अरह् बुड़े बुजूर्गों आरी मीलियों ठाठे पाड़दे बुलो थिऐ।

⁴² “ऐने ओकी बंचाऐ थुऐ, तअ ऐबे ऐ आपु बंची ने सक्दा। ऐ तअ ‘इस्राएल का राजा’ असो। ऐबे जे शुँल़ी-फ़ाँशी गाछ़ा ऊदा आँव तअ आँमें भे ऐसी गाशी बिश्वाष कर्दे।

⁴³ ऐ पंणमिश्वर दा बिश्वाष करह्, किन्देंखे के ऐने ऐजो बुली थो, के ‘हाँव ही पंणमिश्वर का बैटा असो’, तबे पंणमिश्वर ऐसी छुड़ोऐ देला जे से ऐसी शो पियार करह्।”

⁴⁴ तेस्की गईलो शुँल़ी-फ़ाँशी, ऐष्णें ही दो डाकू भे जुण्जे तेस्की गईलो शुँल़ी-फ़ाँशी चढ़ाऐ थुऐ थिऐ, से भे तेस्की निंदया करह् थिऐ।

यीशू ऐ पराँण छुड़े

⁴⁵ दोपारों शे पुंडे ऊछाँणों तोड़ी तेसी बादे देशो दो ईनाँरो पंड़ों अंदो रूओं।

⁴⁶ ऊछाँणें के नंजीक यीशू ऐ जुराल़ों पुकारियों बुलो, “एली, एली, लमा, शबक्त्तनी?” जिन्दें का मतल्व असो, “मेरे पंणमिश्वर! मेरे पंणमिश्वर! तुँऐं मुँह कैई छुड़ी दिता?”

⁴⁷ तिनू मुँझ शो कईऐं जुण्जे तेथै खड़े थिऐ, तिनिऐं ऐजो शुणियों बुलो, “अरे! शुणों-शुणों! ऐने ऋषी-एलिय्याह धुवाऐ पुकारी लुवा!”

⁴⁸ तिनू मुँझ्षा ऐक झुंणा तेख्णी बिच़्ड़ा, अरह् तेने सियाँई च़ूष करियों सिर्के दो डुबोऐया, अरह् कंत्रेंन्डे-डाव दा लाऐयों यीशू के ओठों तोड़ी निंयाँ।

⁴⁹ परह् ओकी ऐ बुलो, “ठहरो, ठहरो, दे:खों, ऋषी-एलिय्याह ऐसी बचाँदा आँदा ऐ, के आँदी ने।”

⁵⁰ तबे यीशू ऐ ऐकी बंई हजो जुराल़ी लेरंह् मारियों बुलो, अरह् आप्णें पराँण, छुड़ी दिते।

⁵¹ तेसी बख्त्ते तेख्णी देऊँठी का पड़दा, ओपरो शा ऊँदा तह्ल़ तोड़ी दो धड़ हऐ गुवा: अरह् धर्ती गाशी भूईच्ल़ लागों, अरह् कफाडो कऐड़ी ऊँक्क्षी गई;

⁵² अरह् खात्ती-कबरो खुली गई, अरह् मरे अंदे पबित्र लोगो के बैजाऐ मुँड़्दे ऊबे जींऐं;

⁵³ अरह् ऊबे जीऊँणों गाशी से खात्ती-कबरो शे नीक्ल़ियों पबित्र नंगर यरूशलेम दे आऐ, अरह् भहीते लोगों कैई शे दे:खाई पड़े।

⁵⁴ तबे सुबेदांर अरह् जुण्जे तिनकी गईलो यीशू के पऐरे देंदे थिऐ, से भूईंच्ल़ो, अरह् जुण्जो किऐ तेथै हुओं थियों, तेथू दे:खियों बैजाऐ डरी गुऐ; अरह् बुलो, “सतिखे ऐ पंणमिश्वर का बैटा थिया!”

⁵⁵ तेथै बैजाऐ तिरोंई जुण्जी गलील शी यीशू की सेवा कर्दी आऐं रंई थी, तिनिऐं दुर्के शो ऐजो दे:खियों बुलो थियों।

⁵⁶ तिनू तिरोंई मुँझी मरियम मगदलीनी, अरह् याकूब अरह् योसेस की माँ मरियम, अरह् जबदी के बैटे की माँ थी।

यीशू दाबी दिते

⁵⁷ जबे संद पढ़ी, तअ यूसुफ नाँव का अरिमतिया का ऐक सेठ आदमी, जू आपु ही यीशू का चैला थिया, से आया।

⁵⁸ तेने हाक्म पिलातुस कैई ज़ाऐयों यीशू का मड़दा माँगा। ईन्दें गाशी हाक्म पिलातुस ऐ यीशू की देह् देणों की अज्ञाँ दिती।

⁵⁹ यूसुफ ऐ प्रभू यीशू के देह्-मड़दा माँगियों करा, अरह् चीट्टी टाली-कफन दा मेंठाया।

⁶⁰ अरह् तेसी आप्णी नंई खात्ती-कबरी दा थऐ दिता, जुण्जी तेने कफाड़ो दी खुँणाँऐं थऐ थी, अरह् खात्ती-कबरी के मुँह गाशी ऐक बड़ा पाथर रंड़काँऐयों तेथै शा आगू हुटा।

⁶¹ मरियम मगदलीनी अरह् ओकी मरियम तेथै खात्ती-कबरी के साम्णें बऐठी रंई थी।

खात्ती गाशी पऐरा

⁶² दूज़े देसे जुण्जों के तियारी के देसो पाछी को देस थियों; प्रधान-याजकों अरह् यहूदी भाट-बाँम्ण अरह् हाक्म पिलातुस कैई कठे हऐयों बुल्दे लागे,

⁶³ “महाँ-राजा, अमाँरें चींत्ते असो, के तेसी दुरंताणों भरमाणों वाल़े, ऐ जबे से जीऊँदा थिया, तअ से बुलो थियों, ‘हाँव च़ींन देसो पाछ़ी ऊबा जींऊँबा।’

⁶⁴ ईन्देंखे च़ींन देसो तोड़ी खात्ती-कबरी की रंख्वाल़ी करी ज़ाँव, कद्दी ऐशों ने हऐयों के तेस्के चैले आऐयों तेसी तेथै शा चोरी पाँदे, अरह् लोगो खे बुल्दे लागो, के ‘से मरे अंदे मुँझ्षा जीऊँदा हऐं रूवा।’ तबे पाँछ़ला धोखा, आगले धोखे शा भे जादा बुरा हंदा।”

⁶⁵ हाक्म पिलातुस ऐ तिनखे बुलो, “तुँओं कैई जगवाल़े तअ असो ऐ। ज़ाव आप्णी सम्झी के मुँताबिक शी रंख्वाल़ी करह्।”

⁶⁶ तअ: तिन्ऐ जगवाल़े गईलो नीऐं, अरह् पाथरो गाशी मुँहर-सिल लाऐयों खात्ती-कबरी के रंख्वाल़ी करी।