मत्ती 14 - Sirmouri

संत्त-यूहन्ना नहाँण-नहाँणों वाल़े की हंत्त्या

¹ तेसी बख्ते हेरोदेस चौथाई देश का राजा थिया, तेने प्रभू यीशू के बारे दो शुणों।

² अरह् तेने आप्णें दासों खे बुलो, “ऐजा संत्त-यूहन्ना नहाँण-नहाँणों वाल़ा असो! से मरे अंदे मुझ्षा ऊबा जीऊँदा हऐ रूवा, ईन्देखे तेसके जाँणे ऐजे चींन-चंम्त्तकार हंदे लागे।”

³ किन्देखे के राजा हेरोदेस ऐ आप्णें भाऐ फिलिप्पुस की घरवाल़ी हेरोदियास की ताँईऐं, संत्त-यूहन्ना थंम्बड़ाऐयों बाँना अरह् कय्दखाने दा पाऐ दिता;

⁴ किन्देखे के संत्त-यूहन्ना ऐ तेस्खे बार-बार बुलो थियों, के ईयों आप्णें भाई के घरवाल़ी आप्णें थणी ताँव्खे निय्म के बिरूध असो।

⁵ ईन्देंखे राजा हेरोदेस तेसी संत्त-यूहन्ना नहाँण-नहाँणों वाल़ा माँरी देणा चहाँव थिया, परह् तेसी लोगो का डर थिया, किन्देखे के यहूदी लोग संत्त-यूहन्ना खे पंणमिश्वर की बरंम्बाणीं कर्णो वाल़ा मानों थिऐ।

⁶ परह् जबे राजा हेरोदेस का जन्म को देस आओं, तअ हेरोदियास की बेटी ऐ नाँचियों राजा हेरोदेस खुशी करा।

⁷ ईन्देंखे गाशी तेने षोंह्-कस्म खाऐयों बचन दिता, के “जू किऐं तू मागली, सेजो हाँव ताँव्खे देऐ देऊँबा।”

⁸ तिऐ धियाँण्टी ऐ आप्णी माँ की ऊक्साणों गाशी बुलो, “संत्त-यूहन्ना नहाँण-नहाँणों वाल़े के मुँट्करी ऐकी थाल़ौ दी सज़ाऐयों मुँखे दियों।”

⁹ राजा हेरोदेस दु:खी हुआ, परह् तेने आप्णी षोंह्-कस्म की ताँईऐं, अरह् आपु आरी बईठणों वाल़े के साम्णें आप्णा माँन थंणों खे ऐजी अज्ञाँ दिती के ऐयाँरी माँग पुरी करह्।

¹⁰ अरह् तेने जऐल-कय्द खाने दा कोसी डियाल़ियों संत्त-यूहन्ना के मुँट्करी कटाऐयों ऊँडी अणाँऐ।

¹¹ अरह् संत्त-यूहन्ना को काटो अंदो मुँढ ऐकी थाल़ौ दो सजाऐयों तियों धियाँण्टी खे देऐ दितो, तबे तिऐ सेजो मुँढ आप्णी माँ हेरोदियास कैई दितो।

¹² तबे संत्त-यूहन्ना के चैले आऐं, अरह् तेस्का मड़दा माँगियों दाबी दिता, अरह् तियों बातो का प्रभू यीशू खे, दु:ख भरा समाँचार दिता।

पाँच हजार मरोद् कैई शो खियाव

¹³ जबे प्रभू यीशू ऐ, ऐजो शुणों, तअ तेथै शे नाँव दे बऐठियों शुन-शाँन जागे दे ऐकली हुटे। लोग ऐजो शुणियों नंगर-नंगर शे हाँडियों ही तिनू पाछी हुटे।

¹⁴ तिनिऐं नीक्ल़ियों लोगों की ऐक बेशुमाँर बड़ी भीड़ दे:खी अरह् तिनू दे:खियों तिनके तिनू गाशी तरष आया, अरह् तिनके बीमार लोग चाँगे करे।

¹⁵ जबे संद पढ़ी तअ प्रभू यीशू के चैले ऐ आऐयों तिन कैई बुलो, “ऐजी शुन-शाँन जागा असो, अरह् बड़ी देर हऐ रंऐ; ऐबे ईनू लोग बिदा करह्, जू ऐ गाँव बोस्तीं दे ज़ाऐयों आपु खे भोजन मोल करह्।”

¹⁶ परह् प्रभू यीशू ऐ तिनखे बुलो, “ईनको ज़ाणों जरूरी ने आथी! तुँऐं ही ईनखे किऐ खाणों खे दियो।”

¹⁷ तबे चेलै ऐं प्रभू यीशू खे बुलो, “ईथे आँमों कैई पाँच रोटी अरह् दो माँछी के सुवाऐ ऊको किऐ ने आथी।”

¹⁸ प्रभू यीशू ऐ तिन्खे अज्ञाँ दिती, “तिनू ईथै मुँह कैई लियाओं।”

¹⁹ तबे तिन्ऐ लोगो खे ज़ुब्ड़ी गाशी बईठाल़्णों की अज्ञाँ दिती, अरह् तिनू पाँच रोटी अरह् दो माँछी लई; अरह् स्वर्गो की ढबे ऊबो दे:खियों धन्यबाद करा अरह् रोटी च़ूड़ी-च़ूड़ियों आप्णें चैले कैई दिती, अरह् तिन चैले लोगों खे दिती।

²⁰ जबे बादे लोग खाऐयों छ़ह्कि गुऐ, तअ चैले ऐ बंचे अंदे टूक्ड़े की भरी अंदी बारंह् शेक्ड़ी टिपी।

²¹ अरह् खाणों वाल़े तिरोंई अरह् नहाँन्ड़िया के सुवाऐ पाँच हजार मरोद् के ऊँडे-पूँडे लोग थिऐ।

प्रभू यीशू पाँणी गाशी हाँडे

²² तबे प्रभू यीशू ऐ तेख्णी आप्णे चैले नाँव गाशी ईन्देंखे बईठणों खे मंज़बूर करे, के से तिन शे आगे झील शे पाईले ढबे ज़ाव, जाँव तोड़ी हाँव लोग ईथै शे बिदा करू।

²³ प्रभू यीशू लोग बिदा करियों, प्रार्थना कर्णो खे आपु ज़ई धार-पाह्ड़ी गाशी हुटे; अरह् संदो आरी से तेथै ऐक्ली थिऐ।

²⁴ तेसी बख्ते नाँव झील के बिचो, दी थी, अरह् ओकी दिषाँ की ढबे शी बैजाऐ बागूर फिरी रंऐ थी, जिन्दें के झ़ूलै-थपेड़े लई नाँव फालो आरी तेसी ईलाके की टिराँव्टी शी झीक्दे-पीघ्दे बैजाऐ दुर्की हुटी गऐ थी।

²⁵ तबे प्रभू यीशू रात्ती के चौऊथे पएरे के मतल्व च़ुट्दी रात्ती झील की पाँणी गाशी हाडियों चैले कैई आऐं।

²⁶ चैले ऐ कोसी झील की पाँणी गाशी हाड्दे दे:खियों डरी गुऐ, अरह् बुल्दे लागे, के ऐ तअ “भूत्त हंणाँ!” अरह् चैले डरह् के मारे लेल्लियाँदे लागे।

²⁷ तबे तेख्णी प्रभू यीशू चैले आरी बातो कर्दें लागे, अरह् बुलो, “हिम्मत थंह्! हाँव असो, डरे ने!”

²⁸ संत्त-पतरस ऐ प्रभू यीशू खे जबाब दिता, “हे प्रभू जे तुँऐं ही असो, तअ मुँह आपु कैई आँणों खे पाँणी गाशी हाँड्णों की अज्ञाँ दियों।”

²⁹ प्रभू यीशू ऐ तेस्खे अज्ञाँ दिती, “आ!” तबे संत्त-पतरस नाव शा ऊतरियों प्रभू यीशू कैई ज़ाँणों खे पाँणी गाशी हाँड्दा लागा।

³⁰ परह् बागुर दे:खियों संत्त-पतरस डरी गुवा, अरह् जबे से डूब्दा लागा, तबे तेने लेल्याऐयों बुलो, “हे प्रभू, मुँह बंचाव!”

³¹ प्रभू यीशू ऐ तेख्णी तेस दी पाची पाऐयों ऊडा थाँम्ब्ड़ा अरह् बुलो, “ओ कंम-बिश्वाषी, तुँऐं षकं-शुभा किन्देखे करा?”

³² जबे से दुईनें नाँव दे बऐठी गुऐ, तअ बागुर फीर्णी बंद हऐ गऐ।

³³ ईन्दें गाशी तिन्ऐ जुण्जे नाँव गाशी बईठे अंदे थिऐ, तिन्ऐ आप्णों मूँढ नाऐयों प्रभू यीशू खे ढाल-बिनती करियों बुलो, “सत्तिखे तुँऐं पंणमिश्वर का बैटा असो।”

गन्नेसरत दे रूगी चाँगे करे

³⁴ तबे से झील के पाईले ढबे ज़ाऐयों गन्नेसरत ईलाके की टिराँव्टी गाशी पईचे।

³⁵ तेथै के रंहणों वाल़े लोगे तिनू पछ़्याँणीं पाऐ, अरह् उडे-पुंडे के बादे इलाके दा तिन्दे का शुज़ा दिता, तबे तेथै के सोभी लोगे आप्णें बीमार लोग तिन कैई आँणें,

³⁶ तबे तेथै के लोग प्रभू यीशू खे ढालो-बिनती कर्दे लागे, के तुँऐं ईनू बीमार लोग आप्णें चोगै का पाला ही छूणों दियो; अरह् जै-तोड़े लोगे ऐ प्रभू यीशू छ़ूऐं, ते-तोड़े लोग चाँगे हऐ गुऐ।