लूका 13 - Sirmouri

आप्णा मंन बद्ल़णों ना तअ छ:त्तिया नाँष हलो

¹ तेसी बख्त्ते किऐ लोगे ऐं प्रभू यीशू कैई तिनू गलीलियों के बारे दे चर्चा करी, जिन्को लह्ऊँ हाकंम-पिलातुस ऐ तिन के ही बल़ीदाँण आरी मिलाऐ दितो।

² प्रभू यीशू ऐ तिनखे बुलो, “कियो तुऐं ऐशो जाँणो के सेजे गलीली ओकी सोभी गलीलियों शे जादा पापी थिऐ; ईन्देंखे हुऐ तिन के ऐजे हाँल?

³ हाँव तुँओं खे ऐशो बुलू, के ऐष्णों ने आथी; परह् जे तुँऐं आप्णा मंन ने बद्ल़ो, तअ तुवाँरो भे ऐष्णों ही छ:त्तिया नाँष होंदो।

⁴ कियों तुँऐं ऐशो जाणों के शिलोह को छ़त्रों के ऊँदे पड़णों लई, सेजे अठारह् झ़ुणें आदमी दबे थिऐ; सेजे यरूशलेम के सोभी रंणों वाल़े शे जादा अपराधी-कसूरबार थिऐ?

⁵ हाँव तुँओं खे बुलू, के ऐष्णों ने आथी: परह् जे तुँऐं मंन ने बद्ल़ो तअ तुवाँरो भे सोभी को ऐष्णों ही छ:त्तिया नाँष हंदो।”

बाढ़ूई तेर्मोल़ी को अनाँणों

⁶ तबे प्रभू यीशू ऐ ऐजो अनाँणों दितो: के “कोसी आदमी के अंगूर-दाख्ह का बागो दा ऐक तेर्मोंल़ी का डाल़ थिया; अरह् से तियों तेर्मोंल़े के डाल़ो दा फल़ जुह्दा हुटा; परह् तेसी तियों तेर्मोंल़ी की डाल़ी दा ऐक भे फल़ के दाँणा ने भेटी।

⁷ तबे तेने बाग के माँलिक ऐं तैसी बागो के माल़ी खे बुलो; ‘दे:ख, हाँव च़ींन साल शा ऊबा ईयों तेर्मोंल़ी के डाल़ो दा फल़ जुह्दा आँदा लगा; परह् मुँह ईन्दा ऐक भे दाँणा ने भेट्दा, अरह् ऐजा डाल़ काटी दिऐ, किन्देंखे के ऐने ईथै ईयों जीम्मीं दी ऐई जागा घेरी थऐ।’

⁸ परह् तेने माल़ी ऐ तैस्खे जबाब दिता, ‘हे मालिक! ईयों बर्ष भे ऐसी डाल़ रंहणों दियों; किन्देंखे के हाँव ईन्दें के चौऊँ ढबै खुणियों तोऊँलिया बाणियों ईन्दी खाद पाऊँबा।

⁹ अरह् जे ईन्दें आगली बर्ष खे भे फल़ ने लागले तअ आछो असो; अरह् जे ईन्दें तबे भे फल़ ने लागो, तअ ऐजी डाल़ी काटी देईली।’”

बिषाँव के देसे ऐक कुँब्बड़ी तिरंऐ चाँग्गी करी

¹⁰ प्रभू यीशू ऐं बिषाँव के देसे कोसी यहूदी च़ौत्रें दे शिक्क्षा देऐ लऐ थी।

¹¹ तेथै ऐक तिरंऐ थी, तियों अठारह् साल शी ऊँबी ऐक कंम्जोर कर्णो वाल़ी दुष्ट-आत्त्मा ऐं पाक्ड़ी थऐ थी; अरह् से तियों ही कारण कुँब्बड़ी ज़ाऐ रंऐ थी, अरह् से कोदी शुभे ऊबे सीधी ने खह्ड़ी हऐ सको थी।

¹² प्रभू यीशू ऐ तियों दे:खियों आपु कैई बय्दी; अरह् तियों खे बुलो, “हे नाँरी! तू आप्णी कंम्जूरी शी छुटी गऐ।”

¹³ तबे प्रभू यीशू ऐ तियों गाशी आप्णा हाथ थुवा, अरह् से तैख्णी सिधी खह्ड़ी हऐ गऐ, अरह् से पंण्मिश्वर के बड़ियाऐं कर्दे लागी।

¹⁴ अरह् तेसी यहूदी च़ौत्रें का ढेमेंदार रूशी गुवा; किन्देंखे के प्रभू यीशू ऐ बिषाँव के देसे तियों तिरंऐ चाँग्गी करी, अरह् से लोगो खे बुल्दा लागा; के “छ़: देसो असो, जिन्दा काँम-काज़ कर्णी ठीक असो; ईन्देंखे ईनू ही देसो दे चाँग्गै हंदे आऐ, परह् बिशाँव के देसे चाँग्गै हंदे ने आऐ।”

¹⁵ ऐजो शुणियों प्रभू यीशू ऐ तैस्खे जबाब दिता, “ओ, पार्ख्ंडियों, का बिषाँव के देसे तुँओं मुँझी कुँऐं आप्णे गाद्दै, के बोल़्दो कैई नियाँरा पाँदे ने, के तैसी थाच़ी शा खुलियों पाँणी प्‍याँदे नींदे ने?

¹⁶ शैताने ईयों नाँरी, जुण्जी अब्राहम की बैटी असो, ईयों अठारह् साल्ह शी ऊबी बाँनी थंऐ थी; तअ कियो ईयों बिषाँव के देसे ऐसी बंन्धण शी छ़ुड़ोंणी ठीक आथी ने थी?”

¹⁷ प्रभू यीशू के ईयों बात शुणियों तिन के बादे बिरोधी संरमाँऐ गुवे; परह् ओकी बादे लोगो के सेजा चंम्तकार दे:खियों तूरंबाणच़ूंटे अरह् बादे खुशी हुऐ।

राई के दाँणे को अनाँणों

¹⁸ तबे प्रभू यीशू ऐ बुलो, “पंण्मिश्वर को राज्य कैष्णों अरह् किन्दें ऊनंरो असो; अरह् हाँव तैथू किन्दें आरी सनाँऊ?

¹⁹ से राई के दाँणे ऊनंरो असो, जैसी दाँणा ऐकी जिम्दारे आप्णी खेच़ौ दा बुआ: अरह् से जाँमियों बड़ियों बड़ा डाल़ बंणा, अरह् असमाँनों के चंच्चैटू ऐ तिन्दे की शाँऐं दे आप्णें कुह्लो बाणें।”

खाट्टे आटे के खमीर को अनाँणों

²⁰ प्रभू यीशू ऐ हजो बुलो, “हाँव पंण्मिश्वर के राज्य कसी आरी संनाँऊ?

²¹ पंण्मिश्वर के राज्य के बराबरी तेसी ख़मीर जेष्णी असो, जेथू ऐकी तिरंई ऐ च़ींन पंण्सेरी आटे मुँझ़ी मिलाव, अरह् तबे सेजो बादो आटा खाटो बंणीं गो।”

साँगड़ी देओल़

²² प्रभू यीशू नंगर-नंगर, अरह् गाँव-गाँव दे बचनों का बखाँण कर्दे रूऐ, अरह् से यरूशलेम की ढबे जाँदे लागे।

²³ तबे कुँणिऐ प्रभू यीशू कैई शो पुछो, “हे प्रभू! कियो ठीकै ही लोगो खे मुँक्त्ति भेट्दी?” तबे प्रभू यीशू ऐं तैस्खे जबाब दिता;

²⁴ “साँगड़ी देओल़ी दो भिटो ज़ाणों कठींण हो, परह् तुँऐं भे कोशिष करह्; किन्देंखे के हाँव तुँओं खे बुलू, के कोशिष कर्णो गाशी भे भहिते लोग तिन्दें दाखिल ने हऐ बल़्दे।

²⁵ जबे घरह् का माँलिक दुवार डाकी देला, अरह् तुँऐं बाँइडे दाँई शो दुवार खह्ट-खह्टाले अरह् तुँऐं बुल्ल़े, ‘हे प्रभू! आँमों खे दुवार ऊडो खुलो’; तअ से तुओं खे जबाब देला, के ‘हाँव ने जाँण्दा के तुऐं केथै शे आऐ रूऐ।’

²⁶ तबे तुँऐं बुल़्ले, के ‘आँमें तुँवारी गईलो खाओ-पीयों अरह् तुँऐं अमाँरे बईजारंह् दा बचन का बखाँण करा थिया।’

²⁷ परह् से तुओं खे ऐजो बुल़्ले, के ‘हाँव ने जाँण्दा के तुँऐं केथै शे आऐ रूऐ, ओं, कू-कर्णी कर्णो वाल़े! तुँऐं बादे मुँह कैई शे दुर्के ज़ाव।’

²⁸ जबे तुऐं, अब्राहम, इसहाक, याकूब, अरह् सोभी ऋषियों के पंण्मिश्वर के राज्य दो दे:ख्ले, परह् आपु खे फींट्कारा ही पाले, तबे तुऐ रूले, अरह् आप्णें दाँदो की च़ुरी च़ाक्ले।

²⁹ पोर्बो, पंछ़ियों, ऊत्रो, अरह् दखिणों शे लोग आले; अरह् पंण्मिश्वर के राज्य की भोज़ दे दाखिल हले।

³⁰ दे:खो, कुछ लोग जुण्जे सोभी शे पाछ़ू दाँई असो; तिनू सोभी शे आगु दाँई करे ज़ाले, अरह् जुण्जे सोभी शे आगु दाँई असो, तिनू सोभी शे पाछ़ू दाँई करे ज़ाले।”

राजा हेरोदेस को बईर

³¹ तेख्णी किऐ यहूदी भाट-बाँम्णें आऐयों, प्रभू यीशू खे बुलो; “ईथै शे आगु ज़ाव, किन्देंखे के राजा हेरोदेस तुओं माँर्णे चहाँव।”

³² प्रभू यीशू ऐ तिनखे जबाब दिता, “ज़ाऐयों तैसी चप्लूस सियाल्टे खे बुलो, के हाँव ऐत्त्लो अरह् दोत्ती दुष्ट-आत्त्मा गाड़्दा, अरह् रूगी-बीमार चाँग्गै करदा, अरह् च़ीज़े के मेरी टह्ल पुरी हंदी।

³³ ऐत्त्लो, दोत्ती, अरह् पंशोंऐं, मुँह चाल्णों जरूरी असो; किन्देंखे के ऐष्णों हऐ ने सक्दो के कोसी ऋषी यरूशलेम शा बाऐरा ही माँरा ज़ाँव।

यरूशलेम खे रूओं

³⁴ “हे, यरूशलेम! हे, यरूशलेम! तू जू ऋषी की हंत्त्या करे; अरह् ताँव कैई जुण्जे खुषख्बरी शुणाँदे डेयाल़ी थुऐ, तिन गाशी तुऐं पंत्थराच़ दियों, अरह् कैत्ती ही बंई मुँऐं चहाँव के जेष्णें कुँक्ड़ी आप्णें कुक्ड़ू आप्णी पख्याव दे कंट्ठै करियों थों; तेष्णें ही हाँभे तुवाँरे नहाँन्ड़िया कंट्ठै करू, परह् तुऐं ऐष्णों चहाँन्दें ने।

³⁵ दे:खो, तुवाँरो घोरह् तुओं खे‌ छ़ुड़ी देंईदो, हाँव तुओं खे खास बात बुलू; के तुऐं मुँह ताँव तोड़ी ने दे:ख्ले, जाँव तोड़ी तुऐं बख्त्त आँणों गाशी, ऐजो ने बुलो; के ‘भागोईत्त असो! सेजा जुण्जा प्रभू के नाँव शा आँव!’”