लूका 1 - Sirmouri

¹ श्रीमान् थियुफिलुस जी, नमंष्कार! बैजाऐ भहिते आदमी ऐ ईनू बातो का जुण्जी अमाँरे बीच दी बिती, ईन्दे का इतिहास लिख्णों का काँम-काज़ करी,

² जेष्णों के तिन्ऐं जुण्जे आगे ही शुभे ईनू बातो के दे:ख्णों वाल़े, अरह् बचन के सेवक थिऐ, तिन्ऐं ही आँमों तड़ी पईचाल़ी।

³ ईन्देंखे, मुँऐं आपु भी ऐजी बादी बातो ठीक-ठीक सुई करियों जाँणी, के तिनू बादी बातो का पुरा हाल शुरू ही शुबा सुवाँ करियों दे:खी-भाल़ियों तुओं खे लिखूँ,

⁴ जू तुँऐं ऐजो जाँणीं पाँव, के ऐजी बादी बातो जिन्दे के तुँऐं शिक्क्षा पाऐ थंऐ, सेजी केष्णी साची अटल़ असो।

संत्त-यूहन्ना नहाँण-नहाँणों वाल़े के जन्म का ऐलान

⁵ यहूदिया के राजा हेरोदेस के शाष्ण दो अबिय्याह के दल़ो दा ज़कर्याह नाँव का ऐक याजक थिया, अरह् तेस्की घरवाल़ी हारून की गड़ी के थी, जियारो नाँव इलीशिबा थियो।

⁶ से दुईनें पंणमिश्वर के साम्णें धरमाँईत्त थिऐ, अरह् प्रभू के बादी अज्ञाँ-निय्म, माँनों थिऐ, से बेकसूर चाल चाल़्णों वाल़े थिऐ।

⁷ तिनके किऐ आगाजाऐतरी अलाद ने थी, किन्देखे के इलीशिबा शूनी थे, अरह् से तबे दुईने बुड़ा-बुड़ी हऐ रूऐ थिऐ।

⁸ जबे तेसी दल़ के मुताबिक ज़कर्याह खे ऐकी देसो की याजक बंण्णों की बारी आऐ, तअ तेने पंणमिश्वर के साम्णें भेंट चड़ाऐ लई थी।

⁹ तबे याजक के रीति के मुँताबिक तेस्के नाँव की पार्ची निकल़ी, के प्रभू की देऊँठी दो ज़ाऐयों जोत्त धूप जल़ाव।

¹⁰ अरह् धूप बाल़्णों के बख्ते बाँईडे दाई बैजाऐ लोगे कठे हऐयों प्रार्थना करी लऐ थी।

¹¹ तबे ज़कर्याह के साम्णें प्रभू का ऐक दूत्त देऊँठी दा पुजो-बैदी के सुवें ढबै पर्गट हऐयों खड़ा हुवा, तअ तेस्के तेसी दे:खाई पड़ा।

¹² अरह् ज़कर्याह तेसी स्वर्गदूत्त दे:ख्यों डरी गुवा, अरह् से शूंन हऐयों आईना-आईना गुवा।

¹³ परह् स्वर्गदूत्त ऐ तेस्खे बुलो, “हे ज़कर्याह डरे ने, किन्देंखे के तेरी प्रार्थना शुणी थऐ, अरह् तेरी घरवाल़ी इलीशिबा के ऐक बैटा हंदा, अरह् तू तेस्को नाँव यूहन्ना थुऐ।

¹⁴ तुऐं आनन्दित अरह् खुशी हंदे, अरह् कंऐयों तेरे बैटे के जन्म हंणों के कारण आनन्द अरह् खुशी मनाँदे।

¹⁵ किन्देंखे के सेजा बालक प्रभू की नंजरी दा बड़ा माँना ज़ादा, से दाख्ह-अंगूरोह् का रंस अरह् सूर कंद्दी ने पींदी, परह् से माँ, की कुँखीं शा ही पबित्र-आत्त्मा शा भरा अंदा हंदा।

¹⁶ अरह् इस्राएल की गड़ी-बंष मुँझ शे से बैजाऐ लोग तिनके प्रभू पंणमिश्वर की ढबै फेरी देंदा।

¹⁷ से ऋषी-एलिय्याह के आत्त्मा अरह् शक्त्ति दा प्रभू के आगे-आगे चाल्णों वाल़ा बंणियों, बाबा का मंन अलादी की ढबै फेरी देंदा; अरह् अज्ञाँ ना माँनणों वाल़े लोग धरमाँईतों की संम्झ गाशी लियाँदा, अरह् प्रभू खे ऐक खास प्रजा तियार करदा।”

¹⁸ ऐजो शुणियों ज़कर्याह ऐ स्वर्गदूत्त शो पुछो, “हाँव ऐजो केशो दाँई ज़ाणू? किन्देंखे के हाँव तअ बूड़ा असो; अरह् मेरी घरवाल़ी भे बूड़ी हंऐ रंऐ।”

¹⁹ स्वर्गदूत्त ऐ तेस्खे जबाब दिता, “हाँव जिब्राईल असो, हाँव हमेशा पंणमिश्वर के साम्णें खड़ा रंऊँ”, अरह् मुँह पंणमिश्वर ऐ ताँव कैई ऐजी खुषख्बरी का प्रचार शुणाँणों खे डियाल़ी थुवा।

²⁰ अरह् दे:ख, जेस देसो तोड़ी ऐजी बातो पुरी ने हों, तेसी देसो तोड़ी तू गूँगा रंहिदा, किन्देंखे के मेरी बात जुण्जी आप्णी बख्तो गाशी पुरी हंदी, तिनका तुऐं बिश्वाष ने करी थई।

²¹ बाँईडे दाँई लोगो के बैसम्झी ज़ाऐ रंऐ थी, के ज़कर्याह के देऊँठी दी ऐत्री देर कैई लागी?

²² जबे से पूजो कैई शा बाँईडा आया, तअ तेस्के ऊबो ने बुलाई: तबे लोगे जाँणी पाव के ऐस्खे देऊँठी दा किऐ दर्शण हऐयों चंच्का हऐ रूवा; अरह् से तिनू लोगो आरी संनकाऐयों बात करदा लागा, अरह् से तबे गुँगा ही बंणा रूवा।

²³ जबे तेस्का भिना सेवा का बख्त पुरा हुवा, तअ सेजा ज़कर्याह आप्णें घरे हुटा।

²⁴ थुड़ै देसो पाछी तेस्की घरवाल़ी इलीशिबा के सूहंणों हुओ; अरह् ऐजो बुलियों पाँच भीनें तोड़ी से ऐकली रंऐ,

²⁵ के आदमी मुँझी मुँह बेस्त्ती हंणों शी बंचाऐ, अरह् “प्रभू ऐ मुँह गाशी ऐजी आप्णी कृपा-रंय्म की नंजर थंऐयों; मुँखे ऐष्णों करी थो।”

यीशू मसीया के पय्दा हणों के बरंम्बाणीं

²⁶ इलीशिबा के छठवें भीनें लाग्णों गाशी पंणमिश्वर की ढबै शा जिब्राईल स्वर्गदूत्त गलील के नासरत नंगर दा,

²⁷ ऐक कन्याँ-कुवाँरी कैई डेयाल़ा। जियारी सगाऐ यूसुफ नाँव के आदमी आरी पाकी हऐ रंऐ थी, जुण्जा के राजा दाऊद के घराने गड़ी-बंष का मंरोद थिया; अरह् तियों कुवाँरी-कन्याँ को नाँव मरियम थियों।

²⁸ मरियम कैई शो चंगराऐयों पर्गट हंऐयों स्वर्गदूत्त ऐ बुलो, “आँनन्द-खुशी अरह् जींत्त तेरी असो; जियों गाशी ईश्वर के कृपा हऐ! प्रभू तेरी गईलो असो!”

²⁹ ऐजो शुणियों से बैजाऐ डरी गऐ, अरह् सूच्दी लागी, के “ऐजो केष्णों बराल़िणों असो?”

³⁰ स्वर्गदूत्त ऐ तियोंखे बुलो, “हे मरियम, डरे ने, किन्देंखे के पंणमिश्वर की कृपा ताँव गाशी हऐ रंऐ।

³¹ अरह् दे:ख! तू पेटभारी हंऐदी, अरह् तेरे ऐक बैटा हंदा, तू तेस्को नाँव यीशू थुऐ।

³² से महाँन हंदा, अरह् तेस्खे परंम-पिता पंणमिश्वर का बैटा बुल्दा; अरह् प्रभू पंणमिश्वर तेस्के बाबा राजा दाऊद को सिंगास्हंण तेस्खे देंदा।

³³ अरह् से याकूब के घराने गड़ी-बंष गाशी सदा राज्य करला; अरह् तेस्को राज्य कद्दी भे खत्त्म ने हंदी।”

³⁴ मरियम ऐ स्वर्गदूत्त खे बुलो, “ऐजो कियो-कियो होंदो? हाँव तअ मंरोद जाँण्दी भे आथी ने।”

³⁵ स्वर्गदूत्त ऐ तियोंखे जबाब दिता, “पबित्र-आत्त्मा ताँव गाशी ऊतर्दे, अरह् (परंम-पिता पंणमिश्वर) के शक्त्ति ताँव गाशी छया कर्दे, ईन्देखे के सेजा बालक जू पय्दा हंणो वाल़ा असो, से पबित्र हंदा; तेस्खे पणमिश्वर का बैटा बुल्दा।

³⁶ अरह् दे:ख, तेरे कुड़्बे के इलीशिबा के भे बुढ़ापे दा बैटा हंणो वाल़ा असो, से सेजी जियों खे शुनी बुली थी, तियाँरे ऐबे छठा भीना असो।

³⁷ किन्देंखे के जुण्जा बचन पंणमिश्वर के ढबै शा हों, सेजा बचन कद्दी भे निष्फल़ ने हंदा।”

³⁸ मरियम ऐ बुलो, “दे:ख, हाँव प्रभू के दासी असो, मुँखे तेरे बचन के हिसाब शो हुओ चेंई।” तबे स्वर्गदूत्त तियों कैई शा आगू हुटा।

मरियम इलीशिबा कैई भेंटिंदी हुटी

³⁹ तबे तिनू देसे मरियम बीऊँजी अरह् शट्टे ही पहाड़ी देश दी यहूदा के ऐक नंगर दे हुटी।

⁴⁰ अरह् ज़कर्याह कागी हुटियों इलीशिबा खे नमंष्कार करा।

⁴¹ जैई तिऐं इलीशिबा ऐ मरियम के नमंष्कार शुणीं, तेई तियारे पैटो दो नहाँन्ड़िया छाटियो; अरह् इलीशिबा तेख्णी पबित्र-आत्त्मा के शक्त्ति लई भरपूर हऐ गऐ।

⁴² अरह् तिऐं बैजाऐ जुराल़ो लेल्लयाऐयो बुलो, “तू तिरोंई मुँझी भाँगोईंत असो! अरह् तेरे पेटो का जाँम्णाँ भे भागोईत असो!

⁴³ अरह् ऐजी कृपा मुँह गाशी कैथे शी हऐ, के मेरे प्रभू के माँ मुँह कैई आऐ?

⁴⁴ दे:ख जैई तेरा नमंष्कार मेरे काँने पड़ा, तैई मेरो नहाँन्ड़िया मेरी पेटो दो खुशी शो छाटियो।

⁴⁵ भागोईत असो! सेजा जेने बिश्वाष करा, के जुण्जी बातो प्रभू के ढबे शी बुली गई, सेजी परम्पार हंदी।”

मरियम को गीत,

⁴⁶ तबे मरियम ऐ बुलों, “मेरे पराँण प्रभू के बड़ियाऐं करह्।

⁴⁷ अरह् मेरी आत्त्मा मेरे छुटकारे देणों वाल़े, पंणमिश्वर शी खुशी हऐं।

⁴⁸ किन्देंखे के प्रभू ऐ आप्णी गरीब दासी के गरीबी गाशी रंय्म के नंजर थऐ, किन्देंखे के दे:खो, ऐबे शुबे ज़ूगौ-ज़ूगौ के लोग मुँखे भागोईत बुल्दे!

⁴⁹ किन्देंखे के तिनू शक्त्तिमाँन ऐ मुँखें बड़े-बड़े काँम-काज़ करी थई, अरह् तिनको नाँव पबित्र असो।

⁵⁰ अरह् तिनकी दया-रंय्म तिनू गाशी जुण्जे तिन शे डरो ऐ; पीड़ी दर पीड़ी तक बंणी अंदी रंह्।

⁵¹ प्रभू ऐ आप्णा बाँऊ-बल़ दे:खाया, अरह् जुण्जे आपु खे बड़े सम्झो थिऐ, तिनू खिदर-भिदर करी दिते।

⁵² प्रभू ऐ बल़वान लोग तिन के ही सिंगाँस्णों गैष्छ़ै ऊदे रिढ़ऐं, अरह् गरीब ऊबे करे।

⁵³ प्रभू ऐ भूखे आच्छ़ी चींजो लई छकऐं दिऐ, अरह् तिन्ऐ सेठ लोग रिते हाथै आगू ड़ेयाल़े।

⁵⁴ प्रभू ऐ आप्णे दास इस्राएली सभाल़े के से आप्णे सेजी दया-रंय्म अरह् कृपा चिते करह्,

⁵⁵ जू अब्राहम अरह् तिनकी अलाद-अंष पीड़ी गाशी सदा रंह्दे, जेष्णों तिन्ऐ अमाँरे पुराँणियाऐं आरी आगे ही बाय्दा करा थिया।”

⁵⁶ मरियम कम से कम च़ींन भीने इलीशिबा के पाऊँणी रंह्ऐयों आप्णे घरे हुटे।

संत्त-यूहन्ना नहाँण-नहाँणों वाल़ा पय्दा हुआ

⁵⁷ तबे इलीशिबा के सूहंणों को चाईत्त लागो, अरह् सुईयों तियाँरें बैटा हुवा।

⁵⁸ तबे तियाँरें कुड़्बे, अरह् पड़ोसिऐं ऐजो शुणियों के प्रभू ऐ तियों गाशी बैजाऐ बड़ी कृपा करी थऐ, तअ तबे तिन्ऐ तियाँरी गईलो खुशी मनाऐं।

⁵⁹ अरह् ऐशो हऐयों के आठवें देसे जबे बालक के खतना कर्णों के बीदी-रिवाज के घड़ी आऐ; अरह् तेस्को नाँव तेस्के बाबा के नाँव गाशी ज़कर्याह थंदे लागे,

⁶⁰ परह् तेस्की माँ ऐं तैख्णी जबाब दिता, के “ना अमाँरें ऐस्को नाँव यूहन्ना थणों।”

⁶¹ अरह् तिन्ऐं बुलो, के “तेरे कुड़बे दो ऐजो नाँव कोसी को ने आथी।”

⁶² तबे तिन्ऐ तेस्के बाबा खे साऊँन ईशारे करियों पुछो, के “तू ऐस्को नाँव का थंणों चाँऐ?”

⁶³ अरह् तेने लिख्णों के पाट्ड़ी माँगियों लिखी दितो, “ऐस्को नाँव यूहन्ना असो,” अरह् तबे सोभी लोगो के तूरंबाणच़ूंटे।

⁶⁴ तबे ज़कर्याह को मुँह अरह् जीभ तैख्णी खुली गऐ; अरह् से बुल्दा अरह् पंणमिश्वर का धन्यबाद करदा लागा।

⁶⁵ अरह् जै-तोड़े ज़कर्याह के ईरद-गीरद खल़िअंदे थिऐ, से बादे झुणें डरी गुऐ; अरह् तियों बातो के चर्चा बादे यहूदिया के पहाड़ी देशो दे फऐली गऐ।

⁶⁶ अरह् बादे शुण्णों वाल़े ऐ आप्णें-आप्णें सासो दो सुचियों बुलो, के “ऐजा केष्णा बालक असो?” किन्देखे के प्रभू का हाथ के कृपा आगे ही ऐसी गाशी असो।

ज़कर्याह के ढाल-अरज अरह् गीत

⁶⁷ अरह् तेसी बालक का बाबा ज़कर्याह पबित्र-आत्त्मा के शक्त्ति लई भरपूर हुआ, अरह् बरंम्बाणीं करदा लागा:

⁶⁸ “प्रभू इस्राएल का पंणमिश्वर खे धन्यबाद; किन्देंखे के तिन्ऐ आप्णे लोगो गाशी आप्णी दया-रंय्म के नंजर थऐ, अरह् तिन खे छुट्कारा दिता।

⁶⁹ अरह् आप्णे सेवक-दास दाऊद की गड़ी खाँनदाँन दा आँमु खे ऐक छुट्कारे कराणों वाल़ा पय्दा करा।

⁷⁰ जेष्णों तिन्ऐ आप्णे पबित्र ऋषियों के मुँह ज़ात्ती शो जुण्जे ज़ूगौ-ज़ूगौ शे ऊँबे हुऐ, अरह् आऐ; तिन्ऐं बुलो थियों।

⁷¹ मतल्व अमाँरे बऐरियों शो, अरह् अमाँरे सभी बऐरियों के हाथो शा अमाँरा छुट्कारा कराऐ थुवा;

⁷² के अमाँरे नाँना-बाबा गाशी कृपा, करियों आप्णा पबित्र-वाय्दा चींत्ते कराया।

⁷³ अरह् सेजी षोंह्-कस्मँ जूण्जी तिन्ऐ अमाँरे बाबा अब्राहम शी करी थऐ थी।

⁷⁴ के से हाँमों अमाँरे बऐरी कैई शे छुड़ाँव, के आँमें आप्णें बऐरियों कैई शे छ़ूटियों,

⁷⁵ तिन के साम्णें पबित्रत्ता अरह् धार्मिक्त्ता शे जीवन भर निडर रंऐयों तिनकी सेवा कर्दे रंह्।

⁷⁶ अरह् तू हे बालक, (परंम-पिता पंणमिश्वर) का बंरम्बाँणी कर्णो वाल़ा ऋषी बंण्ला, किन्देंखे के तू प्रभू के बाट तियाँर करदा तिन शा आगे-आगे चाल्दा।

⁷⁷ के तिनके लोगों खे छ़ूट्कारे का ज्ञाँन दे, जुण्जा तिनके पापो की माँफी शा तिनू भेंटदा।

⁷⁸ ऐजो अमाँरे पंणमिश्वर की तियों बड़ी कृपा के कारण स्वर्गो शा आँमों गाशी प्रकाषमाँन हुवा।

⁷⁹ किन्देंखे के ईनाँरो अरह् मंऊँत्त की छ़या दे बंईठणों वाल़े, गाशी से प्रकाष दियों; अरह् अमाँरी भीखो संही सीधी बाटो दी चलाव।”

⁸⁰ अरह् सेजा टंड्का बढ़दा लागा, अरह् आत्त्मा दा बलवाँन हंदा गुवा, अरह् इस्राएल दा चग्रिणों तोड़ी से जाँगल़ो दा रंह् थिया।