यूहन्ना 8 - Sirmouri

चुरी-जारी कर्णों वाल़ी तिरंई खे माँफी

¹ प्रभू यीशू जैतून नाँव की धारंह् गाशी हुटे;

² अरह् हजो झ़ीषों-भैयाँसरो आरी देऊँठी दे आऐ; अरह् तबे बादे लोग कट्ठै हऐयों तिन कैई आऐ, अरह् से बऐठियों तिनखे शिक्षा अरह् बचन का ज्ञाँन देंदे लागे।

³ तेसी बख्त्ते यहूदी शिक्षा देणों वाल़े, अरह् यहूदी भाट-बाम्णें ऐ ऐक तिरंऐ तेथै आणी, जुण्जी चोरी-जारी कर्दे पाक्ड़ी गऐ थी, अरह् तियों तिरंऐं सोभी लोगो की बीचो दी खल़ियाऐयों प्रभू यीशू खे बुलो;

⁴ “हे गुरू जी! ऐजी तिरंऐ चोरी-जारी कर्दे पाक्डी गऐ।

⁵ ऋषी मूसा खे भेटे गुऐ ज्ञाँन-निय्म दी आँमों खे ऐजी अज्ञाँ देऐ थऐ, के ऐष्णी तिरंई गाशी पत्थराँच़ करे। तअ तबे: तुँऐं ऐष्णी तिरंई के बारे दो का बुलो?”

⁶ यहूदी भाट-बाँम्णें प्रभू यीशू पर्खोणों खे ऐजी बात बुली थी, जू तिनू कसूबार बाँण्णों का किऐं मोंक्का भेटो; परह् प्रभू यीशू ऊँदे नंऐयों गूँठी लई धनियों माँट्टी मुँझ़ी लिख्दे लागे।

⁷ जबे से तिन शे जबाब देणों खे पुछ़्दे लागे, तबे प्रभू यीशू ऐ आप्णों मुँढ ऊबे करियों बुलो; “तुओं मुँझ्शा जुण्जा कुँऐ नींरदोष असो; सेजा ईयों तिरंई दा आगे पाथर लाव।”

⁸ अरह् तबे से हजो गूँठी लई धनियों धर्त्ती माँट्टी गाशी लिख्दे लागे।

⁹ परह् से ऐजो शुँणियों बादे अगुवाल़ अरह् बादे छ़ोटे-बड़े बेरा-बेरिऐ ऐक-ऐक करियों तेथै शे नीकल़ी गुऐ; अरह् प्रभू यीशू तेथै ऐक्ली रूऐ, अरह् सेजी तिरंई भे तेथै बीचो ठाँई खह्ड़ी रंऐ।

¹⁰ तबे प्रभू यीशू ऐ आप्णों मुँढ ऊबे करियों तियों तिरंई खे बुलो, “ओ, तिरंई! सेजे लोग केथै गुऐ? कियों कुँणिऐं भे ताँव्खे सजा देई ने?”

¹¹ तिऐं तिरंई ऐं जबाब दिता, “हे प्रभू! कुँणिऐं भी ने”, प्रभू यीशू ऐ तियों खे बुलो, “हाँव भे ताँव्खे किऐ सजा की अज्ञाँ ने देंदा; अरह् ऐबे हजो पाप ने करे।”)

प्रभू यीशू संईसारी खे ज्योत्ति असो

¹² प्रभू यीशू ऐ हजो लोगो खे बुलो, “संईसारी खे ज्योंत्ति-प्रकाष हाँव असो; जुण्जा मुँह पाछी आला से ईनाँरे दा ने हाँड्दा, किन्देंखे के जीवन का प्रकाष ज्योत्ति हमेशा खे तेसी आरी रंह्दी।”

¹³ यहूदी भाट-बाम्णें ऐ प्रभू यीशू खे बुलो, “तू आप्णें बारे दी आपु गुवाऐं-शाज़्त्त दिऐं, ईन्देंखे तेरी गुवाऐ-शाज़्त्त ठीक ने आथी।”

¹⁴ प्रभू यीशू ऐ तिनखे जबाब दिता, “हाँव भाँव आप्णें गुवाऐ-शाज़्त्त आपु देऊँ; तबे भे मेरी गुवाऐ-शाज़्त्त ठीक माँणी ज़ाँव; किन्देंखे के हाँव जाँणू ऐं? के हाँव केथै शा आऐ रूआ, अरह् केथै खे ज़ाँदा लागा? परह् तुँऐं लोग ने जाँण्दे के हाँव केथै शा आऐ रूआ, अरह् केथै खे ज़ाँदा लागा।

¹⁵ तुँऐं आदमी की नंजरिऐं शा नियाँव करह्; परह् हाँव कोसी का नियाँव ने करदा।

¹⁶ अरह् जे हाँव नियाँव भे करू, तअ मेरा फंऐस्ला संही हंदा; किन्देखे के हाँव ऐक्ला ने आथी: ईन्दा हाँव, अरह् पंरम-पिता, जिन्ऐं मुँह डेयाल़ी थुवा; से भे मेरी गईलो असो।

¹⁷ तुवाँरे ज्ञाँन-निय्म दो ऐजो लिखी थो, के दू-आदमी की गुवाऐ-शाज़्त्त मीलियों ठीक माँनी ज़ाँव;

¹⁸ हाँव आप्णें बारे दी आपु गुवाऐ-शाज़्त्त देऊँ, अरह् मेरे बारे दा ओका गुवाह्-शाज़्त्त मेरा परंम-पिता असो; जिन्ऐं मुँह डेयाल़ी थुवा।”

¹⁹ ईन्दे गाशी यहूदी भाट-बाँम्णें ऐ प्रभू यीशू शो पुछो; “केथै असो, तेरा बाबा?” प्रभू यीशू ऐं तिनखे जबाब दिता; “ना तअ तुऐं मुँह जाँण्दे, अरह् ना मेरा बाबा जाँण्दें। अरह् जे तुऐं मुँह जाँण्दें, तअ तुऐं मेरा बाबा भे जरूर जाँणी पाँदें।”

²⁰ प्रभू यीशू ऐ ऐजे बचन देऊँठी के भडारे दे शिक्षा देंदे बख्त्ते बुले, तबे भे कुँणिऐं तिन दा हाथ तक ने लाई; किन्देंखे के हेभी तोड़ी तिन का बख्त्त ने आऐ रंई थी।

आप्णें बारे दा प्रभू यीशू का बुल्णाँ

²¹ प्रभू यीशू ऐ लोगो खे हजो बुलो, “हाँव ज़ादा लागा; तुँऐं लोग मुँह जुह्ले, परह् तुऐं आप्णे पाप दे मंर्ले; हाँव जेथै ज़ाँदा लागा, तुऐं तेथै ने आऐ सक्दे।”

²² ईन्दें गाशी यहूदी अगुवाल़े ऐं बुलो, “कोदी ऐ दाँव लाऐयों ऊबा ने टाँगियों मतल्व खुद्कुँशीं तअ ने करदा? ऐ तअ ऐशो बुलो, के ‘हाँव जेथै ज़ाँदा लागा; तुऐं तेथै आऐ ने सक्दे।’”

²³ प्रभू यीशू ऐ तिनखे बुलो, “तुँऐं धर्त्ती के असो, अरह् हाँव स्वर्गो का असो; तुँऐं संईसारी के असो, अरह् हाँव संईसारी का आथी नें।

²⁴ ईन्देंखे मुँऐं तुँओं खे बुलो, के तुँऐं आप्णे पापे मर्ल़े; किन्देंखे के जे तुँऐं बिश्वाष ने कर्दे, के ‘हाँव सेजा ही असो’, तअ तुँऐं आप्णे पापे आपु मर्दे।”

²⁵ तबे लोगे ऐं प्रभू यीशू शो पुछ़ो, “तुऐं कुँण असो?” प्रभू यीशू ऐ जबाब दिता, “सेजा ही; जुण्जो मुँऐ शुरू शो ऊँबो, तुओं खे बुलो थियों।

²⁶ तुवाँरे बारे दो मेरे भह्त्त-कुछ बुल्णों, अरह् ऐजा फ़हऐस्ला करणाँ; के हाँव बादी संईसारी खे सेजो ही बुलू; जुण्जों मुँऐ आप्णें डेयाल़्णों वाल़े कैई शो शुँणीं थों; किन्देंखे के मुँह डेयाल़्णों वाल़ा साच्चा बिश्वाष ज़ूगा असो।”

²⁷ से हेबी तोड़ी ऐजो संहम्झ़ी ने रंई थी, के प्रभू यीशू मसीया ऐ तिनके परंम-पता पंण्मिश्वर के बारे दो ही बुली लो।

²⁸ तबे प्रभू यीशू ऐ तिनखे बुलो, के “जबे तुँऐं आदमी का बैटा ऊगला टाँगले, तअ जाँणी पाह्ले, के ‘हाँव सेजा ही असो’; अरह् हाँव आप्णें आप किऐ ने करदा, परह् हाँव सेजो ही बुलू, जुण्जों बाबा ऐं मुँह कैई शो शिखाँऐ थो।

²⁹ मुँह डेयाल़्णों वाल़ा, मेरी गंईलो असो; तिन्ऐं मुँह ऐक्ली ने छ़ूड़ी थंई, किन्देंखे के हाँव सदा सेजो ही करू; जिन्दें लई से बैजाऐ खुशी हों।”

³⁰ ऐजी बादी बातो शुँणिंयों भहित्ते लोगें ऐं प्रभू यीशू गाशी बिश्वाष करा।

सच्चाऐ तुँओं अजाद कर्ली

³¹ तबे: प्रभू यीशू ऐ तिनू यहूदियों लोगो खे बुलो, जिन्ऐं तिनू गाशी बिश्वाष करी थुवा थिया; के “जे तुँऐं मेरी शिक्षायों का पाल़्ण कर्दे रंह्ले; तअ तुँऐं सोत्तिखे मेरे चैले बंण्ले।

³² तुँऐं सच्चाऐ जाँण्ले, अरह् सच्चाऐ तुँओं अजाद कर्लीं।”

³³ यहूदी लोगे ऐ प्रभू यीशू खे जबाब दिता, “आँमें अब्राहम के अलाद असो, ईन्देंखे आँमें कद्दी भे कोसी के गुलाम ने बंणीं; तअ तबे तुँऐं ऐजो कैई बुलो: के तुँऐं अजाद हऐ ज़ाले?”

³⁴ प्रभू यीशू ऐ तिनखे जबाब दिता, “हाँव तुँओं खे ऐक खास बात बुलू: के जुण्जा कुँऐ आदमी पाप करदा ही रंह्, से पाप का दास गुलाँम हों।

³⁵ गुलाँम-दास सदा घरह् दा ने रंह्दा; परह् बैटा सदा घरह् दा रंह्।

³⁶ ईन्देंखे जबे बैटा तुँओं अजाद करला, तअ तुँऐ सोत्तिखे अजाद हऐ ज़ाले।

³⁷ हाँव जाँणु ऐं के तुऐ सोत्तिखे अब्राहम के अलाद असो; तबे भे तुऐं मेरी हंत्त्या कर्णो की ताक दे असो; से ईन्देंखे के तुँऐ मेरे बुले अंदे बचन धारंण ने करी थंई।

³⁸ मुँऐं सेजो ही बुली लो, जुण्जों मुँऐ साक्षात आप्णें बाबा कर्दे देखी थो, परह् तुँऐं सेजो ही करह्, जुण्जों तुँऐं आप्णें बाबा कैई शो शुँणीं थों।”

³⁹ यहूदी लोगे ऐ प्रभू यीशू खे जबाब दिता; “अमाँरा बाबा अब्राहम असो;” प्रभू यीशू ऐ तिनखे बुलो, “जे तुँऐं अब्राहम की अलाद असो; तअ अब्राहम जेष्णा बरताव भे करह्।

⁴⁰ तुँऐं मेरी हंत्त्या कर्णीं चहाँव, मेरी, जेने पंण्मिश्वर कैई शी भेंटी अंदी सच्चाऐ तुओं कैई बुली थंऐ; परह् बाबा अब्राहम तअ ऐष्णों करी ने थीं।

⁴¹ तुवाँरा बरताव बिलकुल तुवाँरे बाबा जेष्णाँ असो”, ईन्दें गाशी यहूदी लोगे ऐ प्रभू यीशू का बिरोध करा; अरह् बुल्दें लागे, के “आँमें बिलकुल भे झ़ोट्करे ने आथी; अमाँरा ऐक ही बाबा असो, मंतल्व पंण्मिश्वर।”

⁴² प्रभू यीशू ऐ तिनखे बुलो, “जे पंण्मिश्वर तुवाँरा बाबा हंदा; तअ तुऐं मुँह आरी प्यार कर्दे, किन्देंखे के हाँव पंण्मिश्वर शा पय्दा हऐ रूवा; हाँव आप्णी हिछ़़या शा ने, परह् पंण्मिश्वर ऐ मुँह डेयाल़ी थुवा।

⁴³ तुँऐं मेरी बातो ईन्देंखे ने सहम्झों दे? के तुँओं दी मेरे बचन शुँण्णों के हिमम्त्त ने आथी।

⁴⁴ तुऐं आप्णें बाबा शैतान के असो, अरह् तुऐं आप्णें बाबा के हिछ़या पुरी कर्णी चहाँव; से शुरू शा ही ऊँबा हत्त्यारा असो। अरह् से सच्चाई का हिस्सा कंद्दी ने बंणीं, किन्देंखे के तेस्दी सच्चाऐ ने आथी; किन्देंखे के जबे भे से झुठो बुलो, तअ से आप्णें ही सभाव के कारण बुलो; किन्देंखे के से झुठा, अरह् झुठे का बाबा असो।

⁴⁵ हाँव साच्चो बुलू; ईन्देंखे तुँऐं मुँह गाशी बिश्वाष ने कर्दे।

⁴⁶ तुँओं मुझ्षा ऐष्णाँ कुँण असो, जुण्जा मुँह पापी साबित्त करी सको? तअ जबे हाँव साच्चों बुलू, तअ तुँऐ मेरा बिश्वाष कैई ने कर्दे?

⁴⁷ सेजा जू पंण्मिश्वर का असो, अरह् पंण्मिश्वर के बचन शुँणों; परह् ऐजे बचन तुऐ ईन्देंखे ने शुण्दें, के तुऐं पंण्मिश्वर के ने आथी।”

प्रभू यीशू अरह् अब्राहम

⁴⁸ यहूदी निय्म के शिखाँणों वाल़े ऐ, प्रभू यीशू खे बुलो, “कियो आँमें ऐजो ठीक बुल्दे ने, के तू सामरी असो; अरह् ताँव्दी दुष्ट-आत्त्मा संमाँऐ रंऐ?”

⁴⁹ प्रभू यीशू ऐ तिनखे जबाब दिता, “मुँदी किऐ दुष्ट-आत्त्मा ने आथी; परह् हाँव आप्णें बाबा के आदर-ईज्त्त करू, अरह् तुँऐं मेरी बैस्त्ती करह्।

⁵⁰ हाँव आप्णी बड़ियाई की ताँईऐ, ऐत्री मेंह्नत्त-कोशिष ने करदा, होर, ऐक ऐष्णा असो, जुण्जा ऐष्णों‍ चहाँव ऐ; अरह् ईन्देंखे कोशिष करह्; अरह् फ़ंऐस्ला भे से ही करह्।

⁵¹ हाँव तुँओं खे ऐक खास बात बुलू: के जे कुँऐं मेरे बचन का पाल़्ण करह्; तअ तेस्की मंऊँत्त कद्दी ने हंदी।”

⁵² यहूदी निय्म के शिखाँणों वाल़े ऐं प्रभू यीशू खे बुलो, “ऐबे आँमों पाक्का बिश्वाष हऐ गुवा, के ताँव्दो किऐ लागियों को असो; बाबा अब्राहम, अरह् बादे ऋषी भे मंरी गुऐ; परह् तू बुले, के ‘जे कुँऐ मेरे बचन का पाल्ण करला; तअ से कद्दी ने मंर्दी।’

⁵³ कियो तू अमाँरे बाबा-अब्राहम शा भे बड़ा असो? से बादे झ़ोणें मंरी गुऐ, बाबा अब्राम, अरह् ऋषी लोग भे मंरी गुऐ; परह् तू आपु खे का जाँणें?”

⁵⁴ प्रभू यीशू ऐ तिनखे जबाब दिता, के “जे हाँव आप्णी बड़ियाऐं आपु करू; तअ मेरी बड़ियाऐ बै-कार असो, जिन्ऐं मुँखे बड़ियाऐ देऐ थंऐ; से मेरा बाबा असो, जिनखे तुँऐं भे आप्णाँ पंण्मिश्वर माँनों।

⁵⁵ तुँऐं तिनू जाँण्दें ने, परह् हाँव तिनू जाँणू ऐं: जे हाँव ऐजो बुल्दा के हाँव तिनू जाँण्दा ने; तअ हाँव भे तुओं जेष्णा झ़ूठा साबित हंऐ ज़ाँदा; परह् हाँव तिनकी बचन दा चालू।

⁵⁶ तुवाँरा बाबा अब्राहम भे मेरे देसो देख्णों की हिछ़या शे बैजाऐ मंगन थिऐ; अरह् तिन्ऐं जबे ऐजो सब कुछ़ देखो, तअ से बैजाऐ खुशी-आँनन्दित्त हुऐ।”

⁵⁷ यहूदियों ऐ, प्रभू यीशू खे झ़ीह्ड़्कियों बुलो; “हेबी तेरी ऊमर पंचाष साल के भे हऐ ने रंई? अरह् तू बुले ऐशो, के तुऐं बाबा अब्राहम देखी थुवा?”

⁵⁸ प्रभू यीशू ऐ तिनखे बुलो, “हाँव तुओं खे खास बात बुलू; के बाबा अब्राहम के पय्दा हंणों शा आगे भे हाँव थिया।”

⁵⁹ ऐजों शुँण्दें ही लोगे ऐं प्रभू यीशू गाशी पंथराच़ देंणों खे पाथर थागे; परह् प्रभू यीशू देऊँठी कैई शे ही तिनकी नंजर शे छ़ाँई-माँई हुऐ।