यूहन्ना 2 - Sirmouri

प्रभू यीशू का आगला चींह्न-चंमम्त्तकार

¹ च़ीज़ै देसे गलील ईलाके के काना नंगर दा कोसी के जाज्ड़ा थिया, अरह् प्रभू यीशू की माँ भे तेथै आऐ रऐ थी।

² प्रभू यीशू अरह् तिनके चैले भे जाज्ड़े दे बय्दी थुऐ थिऐ।

³ तेथै जबे दाख्ह-अंगूरोह् का रंस चुकी गुआ, तअ प्रभू यीशू की माँ ऐ तिनखे बुलो, “ईनू लोगों कैई दाख्ह-अंगूरोह् का रंस चुक्की गुवा।”

⁴ प्रभू यीशू ऐ जबाब दिता, “हे माँ, तुँऐं ऐजो मुँह कैई किन्देखे बुली लो? हेबी मेरा बख्त्त आऐ ने रंई।”

⁵ तबे प्रभू यीशू की माँ ऐं तिनू टोह्लुवा खे बुलो, के “जुण्जो किऐ ऐ तुओं खे बुलो, तुऐं सेजो ही करे।”

⁶ तेथै यहूदियों के शुद्ध हणों के मुँताबिक शे हाथ, लात्त, छ़ाल्णों-धुणों की ताँईऐं पाथरो के छ: घह्ड़े बड़े-बड़े माँट भरे अंदे थिऐ, जिदो दो-दो, च़ींन-च़ींन मंण पाँणी आँव थियो।

⁷ प्रभू यीशू ऐ तिनू टोह्लुवा खे बुलो, “ऐजे घह्ड़े, माँट, पाँणी लई भरी दियो।” टोह्लुवा ऐ सेजे घह्ड़े, बड़े-बड़े माँट शिऐ-शी पाँणी लई भरी दिते।

⁸ तबे प्रभू यीशू ऐ टोह्लुवा खे बुलो, “ऐबे ऐथू पाँणी गाड़ियों ज़ागौ के सियाँणें कैई नींयों, अरह् तिन्ऐ तेष्णों ही कोरो।”

⁹ तबे ज़ागौ के सियाँणें ऐ सेजो पाँणी चाखों, तअ सेजो पाँणीं अंगूरोह् का दाख्ह रंस बंणी गुवा थिया; (तेसी सियाँणें कैई ऐजा पता ने थीं; के ऐजा दाँख्ह रंस केथै शा आँणीं थुवा), परह् जेने टोलुवा ऐ सेजो पाँणी तिनू माँटो-घह्ड़े शो ऊडो गाड़ी थुओं थियों, तेस कैई ऐजा पता थिया; ईन्देखे तेने सियाँणें ऐं तेसी दुल्हा बईदा।

¹⁰ अरह् तेने तेस्खे बुलो, “बादे लोग आगे आछा अंगूरोह् का दाख्ह रंस दियों; परह् जबे बादे लोग पीईयों छकी ज़ाँव, तअ से दाँणिक हल़्का अंगूरोह् का दाख्ह रंस दियों, परह् तुँऐं तअ हेभी तोड़ी आछा अंगूरोह् का दाख्ह् रंस थऐ थुवा थिथा।”

¹¹ प्रभू यीशू ऐ गलील के काना नंगर दा ऐजा आगला ही चींह्न-चंम्त्तकार देखाऐयों आप्णी बड़ियाऐ पर्गट करी। अरह् तिनके चैले ऐ तिन गाशी बिश्वाष करा।

¹² तबे तिन्दे पाछ़ी प्रभू यीशू आप्णी माँ, आप्णें भाई, अरह् आप्णें चैले आरी कफ़रनहूम नंगर खे हुटे, अरह् तेथै से किऐ देसो तोड़ी तेथी रूवे।

देऊँठी शे प्रभू यीशू ऐ बईपारी आगू गाड़े

¹³ यहूदियों के फ़सह को तैयारह् नंजीक थियों, ईन्देंखे प्रभू यीशू यरूशलेम खे हुटे।

¹⁴ तेथै तिन्ऐं देऊँठी दे बोल़ोद, भैंड़ो, अरह् कबूतर बिक्णों वाल़े; अरह् रूपिऐ साटा-बाटा कर्णो वाल़े बंईपार कर्दे बंईठे अंदे देंखे।

¹⁵ तबे प्रभू यीशू ऐ पागोई की डींडी बाँणीं, अरह् बादी भैड़ो अरह् बोल़ोह्दो संहमेंत्त सोभी देऊँठी शे बाँईडे गाड़ी दिते; अरह् रूपिऐ साटा-बाटा कर्णो वाल़े के सिक्कै खिदर-भिदर पाऐ दिते, अरह् तिनके बंईठंणों के पीड़े-पाट्डै ऊँटमुल़े पाड़ी दित्ते।

¹⁶ अरह् कबूतर बिकणों वाल़े खे बुलो, “ऐजो सब-कुछ ईथै शो आगु नींहयों; मेरे पंरम-पिता को घहर बंईजार ने बणाँऐ।”

¹⁷ तिनके चैले के पबित्र-ग्रन्थों का सेजा कंथन चींत्ते आया: “तेरे घहर की धूंन मुँह खाऐ पाँदी।”

¹⁸ ईन्दें गाशी यहूदी निय्म के शिखाँणों वाल़े ऐं प्रभू यीशू खे बुलो, “तू जू ऐजो बुले, तअ तबे आँमों कैई शा कुँण्जा चींह्न-चंम्त्तकार देखाँई दा? जिन्दें लई आँमें ऐजो जाँणों, के ताँव कैई ऐजा हंक-अधिकार असो?”

¹⁹ प्रभू यीशू ऐ तिनखे जबाब दिता, “ईयों देऊँठी ढाल़ी दियों, अरह् हाँव ईयों देऊँठी च़ीज़े के हजो पाछ़ू खह्ड़ी करियों देखाँऊबा।”

²⁰ ईन्दें गाशी यहूदी निय्म के शिखाँणों वाल़े ऐ बुलो, “ईयों देऊँठी बाँण्णों खे छियाल़िष सालों लागी रंई, अरह् कियों तू ईयों देऊँठी च़ीज़े की खह्ड़ी करी देंई दा?”

²¹ परह् प्रभू यीशू ऐ सेजो आप्णी देह्-शरीर रूपी देऊँठी के बारे दो बुली लो थियो।

²² ईन्देंखे जबे प्रभू यीशू मँरे अँदे मुँझ्शे पाछ़ू ऊबे जीऊँदें हुऐ, तअ तिनके चैले के सेजी बात चींत्ते आऐ; के प्रभू यीशू ऐ ऐजो आगे ही बुलो थियो, अरह् तबे तिनके पबित्र-ग्रन्थों अरह् प्रभू यीशू के तिनू बचन गाशी बिश्वाष हुवा।

प्रभू यीशू आदमी के मंन जाँणों थिऐ

²³ जबे प्रभू यीशू फ़सह के तैयारह् के बख्त्ते यरूशलेम दे थिऐ, तअ तिनके जाँणें बैजाऐ चींह्न-चंम्त्तकार देखाऐ ज़ाँव थिऐ, तबे तिनके नाँव गाशी बैजाऐ लोगें ऐ बिश्वाष करा।

²⁴ परह् प्रभू यीशू तिनकी तारिफ के मोंह्ताज ने थी; किन्देंखे के तिन कैई आदमी के संभाव का पता थिया।

²⁵ प्रभू यीशू ऐ आप्णें बारे दी आदमी के जाँणें, देऐ गऐ गुवाऐ-शाँज़्त्त के किऐ भे जरूरत्त ने थी, किन्देंखे के से जाँणों थिऐ के आदमी का सभाँव केष्णाँ असो।