यूहन्ना 19 - Sirmouri

¹ ईन्देंखे हाकम-पिलातुस ऐ प्रभू यीशू आगू नीह्ऐयों तिन्दें कोड़े मंराऐ।

² अरह् सपाईऐं काँडे को मुँकुट गुंन्दियों प्रभू यीशू के मुँढों गाशी थो, अरह् तिन कैई शे राज के खट्णों बंम्बाऐ जुण्जे के बैंजनी रंह्ग दे मंह्खमंह्ल के थिऐ।

³ अरह् से ऐक-ऐक करियों प्रभू यीशू के सहाँम्णें आऐयों बुल्दे लागे, “हे यहूदियों का राजा नंमष्कार!” अरह् तिनदी थापै लाँव थिऐ,

⁴ तबे हाकम-पिलातुस हजो मंह्लो शा बाँईडा हुटा, अरह् लोगों खे बुल्दा लागा; “देखो, मुँऐ तेसी आदमी तुओं लोगो कैई बाँईडा आँणी लुवा, जिन्दें लंई तुऐं भे ऐजो जाँणी पाँव, के हाँव ऐस्दा किऐ भे दोष-कसूर ने जाँण्दा।”

⁵ तबे प्रभू यीशू के मुँढों गाशी काँडे को मुँकुट अरह् बैजनी रंह्ग के मंह्खमंह्ल के खोटूणो बंम्बाऐयों तिनू बाईडे आँणें; अरह् हाकम-पिलातुस ऐं तिनखे बुलो, “देखो, ऐसी मंरोद्!”

⁶ जबे: मुँख्या-याजक अरह् सपाई ऐ प्रभू यीशू देखे, तअ तिनू देख्दे ही से लेल्याँदें लागे; “ऐसी शुँल़ी-फ़ाँशी चढ़ाव! ऐसी शुँल़ी-फ़ाँशी चढ़ाव!” तबे हाकम-पिलातुस ऐं तिनखे बुलो, ऐसी आगू नींयों अरह् “तुऐं ही शुँल़ी-फ़ाँशी चढ़ाव; किन्देंखे के हाँव तअ ऐस्दा किऐ भे दोष-कसूर ने लाँदा।”

⁷ यहूदी अगवाल़ ऐ, जबाब दिता, “अमाँरे भे ऐक निय्म-रूवाज असो, अरह् तेसी निय्म-रूवाजो के मुँताबिक ऐ मंऊँत्ती की सजा ज़ूगा असो; किन्देंखे के ऐ आपु खे पंण्मिश्वर का बैटा बुलो।”

⁸ हाकम-पिलातुस ईयों बात शुँणियों बैगे ही डरी गुवा,

⁹ तबे हाकम-पिलातुस हजो मंह्लों दा भीटा हुटा, अरह् तेने प्रभू यीशू कैई शो पुछ़ो, “तुऐं केथै के असो?” परह् प्रभू यीशू ऐ तेस्खे किऐ भी जबाब ने दित्ती।

¹⁰ ईन्दें गाशी हाकम-पिलातुस ऐं प्रभू यीशू खे बुलो, “तुऐं मुँह आरी कैई ने बुलादें? कियों तुऐं ऐजो जाँण्दें ने, के मुँह कैई तुओं छ़ुह्ड़्णों का भे हंक-अधिकार असो; अरह् तुओं शुँल़ी-फ़ाँशी चड़ाणों का भे हंक-अधिकार असो?”

¹¹ प्रभू यीशू ऐ जबाब दिता, के “तेरा मुँह गाशी किऐं भे हंक-अधिकार ने आथी; जे ताँव खे ऐजा हंक-अधिकार ऊप्रो शा ने भेंटा हंदा; परह् तेने बैजाऐ नींच पाप करी थुवा, जेने मुँह तेरे हाथों दा देऐ थुवा।”

¹² ईन्दें गाशी हाकम-पिलातुस ऐ प्रभू यीशू छुह्ड़णों की बैजाऐ कोशिष करी; परह् यहूदी अगवाँल़ लेल्याँऐ-लेल्याँऐयों बुल्दे लागे; “जे तू ऐसी आदमी छुह्ड़ी देईला, तअ तू कैसर का साथी ने आथी; परह् जुण्जा कुँऐं आपु-आप्खे राजा बुलो, से रोमन महाँ राजा कैसर का बिरोध करह्।”

¹³ ऐजो शुँणियों हाकम-पिलातुस ऐं प्रभू यीशू खे बाँईडे आँण्णों के अज्ञाँ दिती, अरह् से आपु नियाँव के जागे दा बंईठा; जिन्देंखे इब्रानी भाषा दा “गब्बथा” बुली थिया, मंतल्व “च़ौत्रा” जेथै नियाँव कर्णो को सिंगाँस्हणँ थियो।

¹⁴ सेजो देस (फ़सह) के तैयारो को देस थियो, अरह् दुऊँपारो के उडे-पुडे का बख्त थिया; तबे हाकम-पिलातुस ऐ यहूदी अगवाँल़ खे बुलो, “देखो, ऐजा असो; तुवाँरा राजा।”

¹⁵ ईन्दें गाशी से लेल्याँऐं दे लागे, के ऐसी ईथै शा “आगू नींयों! आगू नींयों! ऐसी शुँल़ी-फ़ाँशी चढ़ाव!” हाकम-पिलातुस ऐ तिनखे बुलो, “कियों हाँव तुवाँरा राजा शुँल़ी-फ़ाँशी चड़ाऊँ?” मुँख्या-याजकों ऐं जबाब दिता, “रोमन महाँ राजा कैसर के सुवाऐं ओका कुँऐं भे अमाँरा राजा ने आथी।”

¹⁶ तबे हाकम-पिलातुस ऐ प्रभू यीशू तिनके हवाले करी दित्ते, जू से तिनू शुँल़ी-फ़ाँशी चढ़ाँव।

प्रभू यीशू शुँल़ी-फ़ाँशी चढ़ाऐ गुऐ

¹⁷ तबे तिन्ऐं प्रभू यीशू तेसी जागे दे नींऐं; जिन्देंखे (इब्री भाषा दा “गुलगुता” बुली; जिन्दें का मंतल्व “खोपड़ी” के जागा बुली ज़ाँव; अरह् प्रभू यीशू ऐं आप्णा शुँल़ी-फ़ाँशी आपु थागी थुवा थिया)।

¹⁸ तेथै तिन्ऐ प्रभू यीशू, ओकी दू: आदमी आरी; ऐक सुऐं ढबै, अरह् ओका डेरे ढबै; अरह् प्रभू यीशू तिनके बीच दे शुँल़ी-फ़ाँशी चढ़ाँऐ।

¹⁹ अरह् हाकम-पिलातुस ऐं प्रभू यीशू के शुँल़ी-फ़ाँशी ऐक पाट्ड़ी कीलियों टाँगी, जिन्दो ऐजो लिखी थो थियो: के नाँसरत्त गाँव का “यीशू यहूदियों का राजा असो!”

²⁰ सेजा दोष-पत्र बैजाऐ यहूदी लोगे ऐ पढ़ा; किन्देंखे के जेथै प्रभू यीशू शुँल़ी-फ़ाँशी चढ़ाऐ गुऐ, सेजी जागा बंईजारो के नंजींक ऊडी-पुडी थी; अरह् सेजा दोष-पत्र, इब्री, लातीनी, अरह् यूनानी भाषाँओं दा लिखा अंदा थिया।

²¹ ईन्देंखे यहूदियों के मुँख्या-याजकों ऐं हाक्म-पिलातुस खे बुलो, “तुऐं ऐजो ने लिखे: के ऐजा ‘यहूदियों का राजा असो’; परह् ऐने ऐजो आपु ही आप्खे बुली थो; के ‘हाँव यहूदियों का राजा असो’।”

²² हाकम-पिलातुस ऐ ऐजा जबाब दिता, “मुँऐं जुण्जो लिखी पाओ, सेजो लिखी पाओ।”

²³ प्रभू यीशू शुँल़ी-फ़ाँशी चढ़ाणों पाँछ़ी, सपाई ऐ तिनके बाईले खोट्णों आगु करे; अरह् तिन्दें के चार टुक्ड़े करियों, आपु मुँझी बाँडी पाऐ; परह् प्रभू यीशू का भित्त्ला च़ौगा ऊप्रो शा ऊदा तोल़ तोड़ी जोड़ो आरी बुणाँ अंदा थिया।

²⁴ ईन्देंखे तिनू सपाईऐं आपु मुँझी बुलो, ऐसी “चौगा चिरे ने; परह् ईन्दें की ताँईऐ आँमें आपु मुँझी पार्ची पाऊँबे; के ऐजा च़ौगा कोस्खे भेट्दा।” ऐष्णों ईन्देंखे हुओ, के पबित्र-ग्रन्थों का सेजा लिखा पुरा हों: के से मेरे खोट्णों आपु मुँझी बाँडी पाँह्ले, अरह् मेरे च़ौगे खे पार्ची पाँह्दें; अरह् तिनू सपाई ऐं भे तेष्णों ही करह्।

²⁵ प्रभू यीशू के माँ, अरह् तियाँरी बंईण, मंतल्व प्रभू यीशू के मोंऊँसी क्लोपास के घहरवाल़ी मरियम, अरह् मरियम मगदलीनी तिनकी शुँल़ी-फ़ाँशी कैई खह्ड़ी थी।

²⁶ प्रभू यीशू ऐ आप्णी माँ, अरह् तेसी चैला, जुण्जा प्रभू यीशू के प्यारा थिया; तेसी भे आप्णीं माँ कैई खह्ड़ा देखा, तअ तिन्ऐं आप्णीं माँ खे बुलो; “हे माँ! ऐजा तेरा बैटा असो।”

²⁷ अरह् तबे प्रभू यीशू ऐ आप्णे तेसी चैले खे बुलो, “देख, ऐजी तेरी माँ असो!” अरह् तबे तेने चैले ऐं प्रभू यीशू की माँ-मरियम आप्णी गंईलो आप्णें घहरे नींह्।

प्रभू यीशू की मऊँत्त

²⁸ ईन्दें पाछ़ी जबे प्रभू यीशू ऐ ऐजो जाँणीं पाव, के ऐबे सब-कुछ पुरो हऐ गुओं; तअ पबित्र-ग्रन्थों का सेजा लेख्ह पुरा कहर्णो खे बुलो; “हाँव च़ींषा असो”।

²⁹ तेथै ऐक सिर्के शो भरो अंदो बास्णं थऐ अंदो थियों; तबे: तिन्ऐं सिर्के शो रूझ़ोऐ अंदो सियाई च़ौष का ऐक टुक्ड़ा लाँम्बें कत्रेंडे दा बाँना, अरह् तेसी सिर्के दा डूबोऐयों रूझ़ऐया, अरह् प्रभू यीशू के ओठों दा छुवाँऐया।

³⁰ जबे प्रभू यीशू ऐ तेसी सिरका चाखा तअ बुलो, के “सब-कुछ पुरो हंऐ गो।” अरह् तिन्ऐं आप्णों मुँढ नाँऐयों आप्णें प्राँण छुह्ड़ी दित्ते।

बह्ड़छ़ै लई भींने

³¹ सेजो बिषाँव के देसो की तियारी को देस थियों, अरह् यहूदी अगवाल़ ऐजो ने चहाँव थिऐ; के कोसी की देह्-शरीर बिषाँव के देसे शुँल़ी-फ़ाँशी ने टंगी अंदी रंह् च़ेंई; ईन्देंखे से हाकम-पिलातुस कैई आऐयों तेसी ढह्लयाँदे लागे; के ईनू लोगों की बागंणीं च़ुड़ियों ईनू शुँल़ी-फ़ाँशी गाच्छ़ै ऊदे गाड़ो; किन्देंखे के ऐजे लोग बिषाँव के देसे शुँल़ी-फ़ाँशी टाँगें अंदे ने रूऐ चेंई; किन्देंखे के सेजो बिषाँव को देस खास थियों।

³² ईन्देखे सपाई ऐं आऐयों प्रभू यीशू की गंईलो शुँल़ी-फ़ाँशी चड़ाऐ अंदे, आगले आदमी की बाँगणी च़ूड़ी, अरह् तबे दुज़ै आदमी की बाँगणी भे तैष्णी च़ूड़ी दिती।

³³ परह् जबे तिनू सपाईऐ प्रभू यीशू कैई आऐयों देखो, के से मंरी गुऐ; तअ तबे तिन्ऐं तिनकी बाँगणी ने च़ुड़ी।

³⁴ परह् ऐकी सपाई ऐं तिनकी शाप्ड़ी के बीचो; दा भाला माँरा, अरह् तिन्दें शो तैख्णी पाँणी अरह् लह्ऊँ नींक्ल़ों।

³⁵ जेने सपाई ऐं ऐजो देखो, तेने गुवाऐ-शाज़्त्त दिती; अरह् तेस्की गुवाऐ-शाज़्त्त साच्ची थी; से ऐजों जाँणों थिया, के ऐने साच्चो बुली लो, जिन्दें लई तुऐं भे बिश्वाष करह्।

³⁶ ऐष्णो ईन्देंखे हुओ, के पबित्र-ग्रन्थों दो जुण्जो बुलो गुओ थियों, सेजो पुरो हों, के “तिनकी कुँण्जी भे हाड़की ने च़ूड़ी ज़ाँव।”

³⁷ पबित्र-ग्रन्थों के ऐकी जागे दो ऐष्णों भे लिखी थो; के “जेसी तिन्ऐ बह्ड़छै लई भींना थिया, तेसी से हजो देख्ले।”

यीशू दाबी दित्ते

³⁸ ऐजो सब हंणों पाछ़ी अरिमतियाह गाँव का यूसुफ जुण्जा यहूदी अगवाल़ो के डरो शा चुप्पी प्रभू यीशू का चैला थिया, से हाकम-पिलातुस कैई आऐयों ढाह्ल-अरज करियों प्रभू यीशू को मित्तको ऊदो गाड़ियों तेथै शो आगू नींहणों के अज्ञाँ माँगी; तबे हाकम-पिलातुस ऐं सेजी बात माँनी पाँऐ, अरह् तबे तेने चैले ऐं प्रभू यीशू को मित्तको तेथै शो ऊदो गाड़ियों आगु नींयाँ।

³⁹ तबे नीकुदेमुस भे जुण्जा आगे प्रभू यीशू कैई रात्ती भेंट करदा आया थिया, से भे तेथै आया, अरह् तेने किऐ तैंतीस किलो सुगोंन्धित्त सैंन्ट अरह् कपुरो राल़ियों कट्ठा मिलाऐयों आँणा।

⁴⁰ तबे तिनू दु:ईं लोगें ऐ यीशू मसीया को मित्तको कोरो, अरह् यहूदी रित्ती-रूवाज के हिसाब शी आखरी संस्कार के बिद्दी पुरी कंरियों सेजी सुंगन्धित्त चींजों तेसी मित्तके दी लाऐयों, अरह् कफ़न-धोऐ की टाली लेई मेंठाऐ दितो।

⁴¹ जेथै प्रभू यीशू शुँल़ी-फ़ाँशी चड़ाऐ थुऐ थिऐ, तेथै ऐक बाग थिया; जिन्देंके खेच़ौ की निंयोंटी दा ऐक ओराड़ थिया, अरह् तेसी ओराड़ों दे ऐक नुंऐं खात्त-कबर खुणीं अंदी थी; अरह् तियों खात्ती-कबर दा ऐत्त्लो तोड़ी कोसी को भे मित्तकों ने थंऐ थई थी।

⁴² ईन्देंखे तिनू चैले ऐ प्रभू यीशू को मित्तकों ओराड़ो की तियों खात्ती-कबर दो थंऐ दितो; किन्देंखे के सेजी जागा नंजीक थी, अरह् तदी सेजो देस यहूदियों के (बिषाँव) की तियारी को देस थियो।